កំពង់ធំៈ ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនខេត្តកំពង់ធំ បានដឹកនាំសហការី នៃប្រធានសមាគមស្រុក ចុះពិនិត្យស្ថានភាព ពីជីវភាពរស់នៅរបស់អតីតយុទ្ធជន និងជាអតីតជាមេប៉ូលិសម្នាក់ មានស្នាដៃបំរើជាតិមាតុភូមិនាសម័យរដ្ឋកម្ពុជា កន្លងមក ដែលកំពុងមានជីវភាពខ្វះខាតជួបនូវការលំបាក គ្មានជម្រកស្នាក់នៅសមរ្យ។
ក្រោយពីក្រុមការងារសមាគមអតីតយុទ្ធជន បានពិនិត្យឃើញនូវភាពខ្វះខាត និងមានជីវភាពក្រីក្រ ពិតប្រាកដ ក៏បានដឹកនាំក្រុមការងារចុះនាំយក ស័ង្ខសី និងឈើ រួមទាំងឧបករណ៍ជាង ដើម្បីសាងសង់ផ្ទះជូនលោក ម៉ា គឹមយុង អាយុ ៦៥ឆ្នាំ អតីតប្រធាន គ3 នៃកងកម្លាំងនគរបាលប្រយុទ្ឋ អា៣ ខេត្តកំពង់ធំបច្ចុប្បន្នរស់នៅភូមិត្បូងក្រពើ ឃុំត្បូងក្រពើ ស្រុកសន្ទុក ខេត្តកំពង់ធំ នៅព្រឹកថ្ងៃទី ០៥ ខែកុម្ភះ ឆ្នាំ ២០១៧ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានឲ្យដឹងថា ដោយបានប្រទះឃើញផ្ទះរបស់លោក ម៉ា គឹមយុង ស្ថិតនៅក្នុងសភាពពុកផុយ និងធ្លុះធ្លាយ ស្ទើតែគ្មានកន្លែងជ្រក ម្យ៉ាងទៀតមានជីវភាពក្រីក្រ រស់នៅក្នុងសភាពជាជនពិការ ដែលអតីតជា ប្រធានគ្រប់គ្រងនិងដឹកនាំកម្លាំងនគរបាលប្រយុទ្ឋអា៣ ចំនួន១២០នាក់ក្នុងសម័យរដ្ឋកម្ពុជា ទប់ស្កាត់ការវិលត្រឡប់មកវិញនៃរបប ប៉ុលពត បច្ចុប្បន្នគាត់ធ្លាក់ខ្លួនពិការមិនអាចធ្វើការងារអ្វីធ្ងន់បាន តែលោក ម៉ា គឹមយុង បានប្តេជ្ញាចិត្តហើយថា ស្មោះត្រង់ និងស្រឡាញ់ សម្តេចតេជោ ហ៊ុន សែន អស់មួយជីវិតដោយក្តីអាណិតអាសូរ ក្នុងនាមខ្ញុំជា ប្រធានសមាគមអតីតយុទ្ឋជនខេត្តកំពង់ធំ បានសម្រេចដឹកនាំសហការី ដឹកឈើមកសាងសង់ជូននៅថ្ងៃនេះ។
ដោយ ប៊ុន រដ្ឋា
