កំពង់ធំៈ ឯកឧត្តមគន់ គីម អគ្គលេខាធិការសមាគមអតីតយុទ្ធជនកម្ពុជា ក្រោយពីបានទទួលព័ត៌មានថា មានអតីតយុទ្ធជន និងជាជនពិការ រស់នៅក្រោមដំបូងខ្ទមដ៏ធ្លុះធ្លាយ តូចចង្អៀតជាមួយក្រុមគ្រួសារ ដែលមានសមាជិក៥នាក់ ទើបបានបញ្ជាឲ្យសមាគមអតីតយុទ្ធជនកម្ពុជាខេត្តកំពង់ធំ ចាត់ចែងដឹកគ្រឿងឈើនិងសម្ភារៈសម្រាប់សាងសង់ផ្ទះ ជូនអតីតយុទ្ធជនជាបន្ទាន់។
ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ បានមានប្រសាសន៍ថា មិនថា នៅគ្រប់ទីកន្លែង ទាំងនៅទីប្រជុំជន និងនៅជនបទ ចុងកាត់មាត់ញក ត្រូវចុះឲ្យដល់មូលដ្ឋានដែលអតីតយុទ្ធជនរស់នៅ ដើម្បីពិនិត្យឲ្យច្បាស់ ទើបដោះស្រាយបានបញ្ហាដែលមានការខ្វះចន្លោះបាន ជាក់ស្តែង នៅរសៀលថ្ងៃទី ០៨ ខែកុម្ភះ ឆ្នាំ២០១៧ បានចុះទៅភូមិ ពោន ឃុំគគីរធំ ស្រុកបារាយណ៏ ខេត្តកំពង់ធំ ជាប់ព្រំប្រទល់ឃុំបឹងល្វា ស្រុកចំការលើ ខេត្តកំពង់ចាមជាមួយ សហការី អមដំណើរដោយលោកមេឃុំគគីធំដើម្បីចុះសួរសុខទុក្ខអតីតយុទ្ធជនដែលនៅដាច់ស្រយាលឯជនបទ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ក្រោយពីបានចុះដល់មូលដ្ឋាន បានជួបអតីតយុទ្ធជន ឈ្មោះ ចាន់ ញ៉ឹប អាយុ៥៥ ឆ្នាំ ជាជនពិការជើងដោយសារជាន់មីនក្នុងសម័យសង្គ្រាមនៅឆ្នាំ១៩៩០ នៅសមរភូមិទិសប៉ៃលិន មានកូន 3នាក់ និងភរិយា រួមទាំងអស់សមាជិកគ្រួសារចំនួន5នាក់រស់នៅក្នុងខ្ទមតូចចង្អៀត ធ្លុះធ្លាយ តែលោក ចាន់ ញ៉ឹប និងក្រុមគ្រួសារប្រាថ្នាចង់បានផ្ទះតូចសមរម្យមួយខ្នងរស់នៅដូចគេដូចឯង តែគាត់គ្មានលទ្ឋភាពធ្វើទៅបាន ទើបបានរាយការណ៍ជូន ឯកឧត្តមគន់ គីម បញ្ជាឲ្យសមាគមអតីតយុទ្ធជនកម្ពុជាខេត្តកំពង់ធំដឹកគ្រឿងឈើសាងសង់ផ្ទះជូនអតីតយុទ្ធជនតែម្តង។
ក្នុងឳកាសនៃការចុះសួរសុខទុក្ខ ក្រុមការងារបានផ្តល់ជូនគាត់នូវ អង្ករ 25គីឡូក្រាម មីយើងមួយកេស ទឹកត្រី មួយយួរ ទឹកស៊ីអ៊ីវ មួយយួរ និងថវិកាចំនួន100.000រៀល ហើយនៅថ្ងៃទី៩ ខែកុម្ភះ និងចាត់ចែងសហការីដឹកឈើ និងគ្រឿងសម្ភារៈសម្រាប់សាងសង់ផ្ទះ ដែលជាអំណោយដ៍ថ្លៃថ្លារបស់សម្តេចតេជោហ៊ុន សែន ដើម្បីសាងសង់ផ្ទះឲ្យបានសមរម្យជូនគាត់ ។
ដោយ ប៊ុន រដ្ឋា
