មណ្ឌលគីរី ឯកឧត្តម ទេសរដ្ឋមន្ត្រី អ៊ឹម ឈុនលឹម រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់បានអញ្ជើញជាអធិបតីក្នុងពីធីប្រកាសចូលកាន់តំណែងក្រុំប្រឹក្សាខេត្តនៅសាលប្រជុំសាលាខេត្តមណ្ឌលគិរីនាព្រឹកថ្ងៃទី៦ ខែមិថុនា ឆ្នាំ២០១៤។ ពិធីនេះក៏មានការអញ្ជើញចូលរួមពីមន្ត្រីរាជការ ប្រធានមន្ទីរ អនុប្រធានមន្ទីរជុំវិញខេត្តផងដែរ។
ក្នុងឳកាសនោះ ឯកឧត្តមអេង ប៊ុនហ៊ាង អភិបាលនៃគណៈអភិបាលខេត្តបានធ្វើរបាយការណ៍បញ្ជាក់អោយដឹងថា ក្នុងក្រុមប្រឹក្សាអាណត្តិទី១ គណៈអភិបាល មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តបានរួមសាមគ្គីសហការគ្នាល្អក្នុងការក៏សាងនិងអភិវឌ្ឍន៍ខេត្តមណ្ឌលគិរីឲ្យមានការរីកចំរើនលើគ្រប់វិស័យ។
ឯកឧត្តមបានបញ្ជាក់ថា ការីកចំរើនទាំងនោះរួមមាន ការផ្តល់សេវាសាធរណៈ ការអភិវឌ្ឍសេដ្ឋកិច្ច សង្គមកិច្ចនៅមូលដ្ឋាន ការជួយសង្គ្រោះប្រជាពលរដ្ឋពីគ្រោះធម្មជាតិនាៗ ការថែរក្សាសន្តិសុខ សណ្តាប់ធ្នាប់សាធារណៈ ក៏ដូចជាសន្តិសុខសម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី២នេះផងដែរ។
មានប្រសាសន៍ចូលរួមក្នុងពិធីនោះ ឯកឧត្តម អ៊ឹម ឈុនលឹម បានកោតសរសើរចំពោះឯកឧត្តម លោកជំទាវ ជាសមាជិកក្រុមប្រឹក្សាខេត្តមណ្ឌលគិរីដែលទទួលបានការគាំទ្រ ដើម្បីបំពេញការងារក្នុងក្រុមប្រឹក្សាអាណត្តិតី២នេះ ព្រមទាំងសង្ឃឹមយ៉ាងមុតមាំថា ក្រុមប្រឹក្សាដែលទទួល ភារៈកិច្ចសំរាប់រយៈពេល៥ឆ្នាំខាងមុខនេះទទួលបានជោគជ័យក្នុងការងារផងដែរ។
ដើម្បីទទួលជោគជ័យក្នុងការងារ ឯកឧត្តមទេសរដ្ឋមន្ត្រីបានក្រើនរំលឹកឲ្យខិតខំពង្រឹងស្មារតីសាមគ្គីភាព ឯកភាពផ្ទៃក្នុងឲ្យបានល្អ នៅក្នុងក្រុមប្រឹក្សា គណៈអភិបាល មន្ត្រីរាជការ និងកងកម្លាំងសមត្ថកិច្ចក្រប់លំដាប់ថ្នាក់ ដោយឈលើមូលដ្ឋាននៃការលើកម្ពស់ប្រសិទ្ធភាពការងារ ការគោរពច្បាប់ គោរពគោលការណ៍នាៗរបស់រដ្ឋ សំដៅអភិវឌ្ឍន៍មូលដ្ឋាន និងឆ្លើយតបចំពោះតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួន។