កំពង់ធំៈ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការដ្ឋានតំបន់ប្រតិបត្តិការសឹករងកំពង់ធំ បានដឹកនាំ ក្រុមការងារចុះផ្តល់ផ្ទះមួយខ្នងដល់ អតីតយុទ្ឋជន ដែលមានជីវភាពក្រីក្ររ ខ្វះទីជម្រកស្នាក់នៅ ត្រូវបានយកចិត្តទុកដាក់ ពីសំណាក់សម្តេចតេជោ ហ៊ុន សែន នាយករដ្ឋមន្រ្តី ប្រធានសមាគមអតីតយុទ្ធជនកម្ពុជា បានផ្តល់អំណោយផ្ទះមួយខ្នង ដែលជាខ្នងផ្ទះលើកទី២៧ តាមរយះសមាគមអតីតយុទ្ធជនកម្ពុជាខេត្តកំពង់ធំ ។
លោក ម៉ា គឹមយុង អាយុ65ឆ្នាំ រស់នៅភូមិកាល់មេឃ ឃុំត្បូងក្រពើ ស្រុកសន្ទុក ខេត្តកំពង់ធំ បានទទួល ផ្ទះសាងសង់ផ្ទាល់ដី រៀបឥដ្ឋខាងក្រោម ក្រាលការ៉ូបាត ទំហ៊ុ 5×6 ម៉ែត្រ ដែលត្រូវចំណាយក្នុងការសាងសង់អស់ទឹកប្រាក់ 4.980.000រៀល កាលពីព្រឹកថ្ងៃទី១៩ ខែកុម្ភះ ឆ្នាំ ២០១៧ តាមរយះឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនខេត្ត ព្រមទាំង ក្រុមការងារអតីតយុទ្ធជនស្រុក ក្នុងនោះក្រុមការងារបាន ឧបត្ថម្ភគ្រឿងឧបភោគបរិភោគ ជូនគាត់បន្ថែមនូវ អង្ករ ២៥គីឡូក្រាម មីយើងមួយកេស ទឹកត្រីទឹកស៊ីអ៊ីវ២យួរ ត្រីខ ១យួរ ស៊ីម៉ងត៍ ៥ បេ និង ថវិកាចំនួន ១០០,០០០រៀល ។
លោក ម៉ា គឹមយុង ក្នុងសម័យសង្គ្រាម ធ្លាប់ធ្វើជាប្រធានកងអនុសេនាធំ A3 (អាបី) ហើយបន្ទាប់មកធ្វើជាអធិការរងស្រុកកំពង់ស្វាយ បច្ចុប្បន្នជាជនពិការជើង ដើរមិនបានឆ្ងាយ ហើយមានជម្ងឺប្រចាំកាយផងដែរ ក្រុមគ្រួសារអតីតយុទ្ធជន បានជូនពរសម្តេចតេជោហ៊ុន សែន និងសម្តេចគិត្តិព្រឹត្តបណ្ឌិត ប៊ុន រ៉ានីហ៊ុន សែន ឲ្យទទួល បានភាពជោគជ័យ ក្នុងអណត្តិថ្មីនេះ ដើម្បីដឹកនាំនាវាសន្តិភាព ទៅរកភាពរីកចំរើនបន្តទៀត ។
ឯកឧត្តម ឧត្តមសេនីយ៍ត្រី សោម ស៊ុន បានមានប្រសាសន៍ថា អតីតយុទ្ធជនទាំងអស់ នៅក្នុងខេត្តកំពង់ធំ កំពុងតែត្រូវបានដោះស្រាយ ហើយមួយចំនួនទៀតកំពុងតែ ដុតដៃដុតជើងមមាញឹក ក្នុងការចុះធ្វើបច្ចុប្បន្នភាព ពីអតីតភាព ពីជីវភាពរស់នៅ ហើយបានរាយការជូន ឯកឧត្តមគន់ គីម អគ្គលេខាធិការសមាគមអតីតយុទ្ធជនកម្ពុជា ដើម្បីដោះស្រាយផ្ទះជូន អតីតយុទ្ធជនជាបន្តបន្ទាប់ និងបានចាត់ទុកអតីតយុទ្ធជន ជាវរៈបុរសស្នេហាជាតិ មានបុណ្យគុណចំពោះប្រទេសជាតិ ហើយអាជ្ញាធរទាំងអស់ នៅតាមមូលដ្ឋានត្រូវផ្តល់ ការជឿជាក់ និងទំនុកចិត្ត ទាំងការមើលថែរដូចបងដូចប្អូន ដូចម៉ែដូចឪ ដោយមានការផ្សារភ្ជាប់ចំណងមិត្តភាពជាមួយ ក្រុមគ្រួសារអតីតយុទ្ធជនឲ្យមានភាពកក់ក្តៅ ។
ដោយ ប៊ុន រដ្ឋា
