កំពង់ធំៈឧត្តមសេនីយ៍ត្រី សោម ស៊ុន មេបញ្ជាការតំបន់សឹករងកំពង់ធំ និងជាប្រធានសមាគមអតីយុទ្ឋជនកម្ពុជាខេត្តកំពង់ធំ បានដឹកនាំសហការីចុះសួរសុខទុក្ខអតីតយុទ្ធជន នៅតាមមូលដ្ឋាន ដើម្បីឲ្យបានដឹងពីសុខទុក្ខផ្ទាល់ ពីការរស់នៅ ពីជីវភាព និងការប្រកបមុខរបរចិញ្ចឹមជីវិតប្រចាំថ្ងៃ ដែលត្រូវបានធ្វើឡើងជាបន្តបន្ទាប់ ដោយពុំមានការខ្លាចនឿយហត់នោះឡើយ ដោយសារឯកឧត្តម បានគិតថា សុខទុក្ខរបស់អតីតយុទ្ធជន គឺជាសុខទុក្ខរបស់យើងទាំងអស់គ្នា ។
សកម្មភាពការចុះសំណេះសំណាលជាមួយអតីតយុទ្ធជន និងបងប្អូនប្រជាពលរដ្ឋ ត្រូវបានធ្វើឡើងជាការងារមមាញឹកដោយមិនគិតពីថ្ងៃឈប់សម្រាក ជាក់ស្តែងនៅថ្ងៃទី១៧ ខែមិនា ឆ្នាំ ២០១៧ ឯកឧត្តម ឧត្តមសេនីយ៍ត្រី សោម ស៊ុន បានជួបអតីតយុទ្ធជន ដែលជាមិត្តចាស់ធ្លាប់រួមសុខរួមទុក្ខ រួមអាវុធជាមួយគ្នា ក្នុងគ្រាមួយនាសម័យសង្រ្គាម ដែលមានឈ្មោះ អ៊ុច ពត អតីតអនុប្រធានគណបញ្ជាការយោធាស្រុកបារាយណ៍ មេបញ្ជាការរងវរសេនាតូចលេខ១ ចំណុះអង្គភាពយោធាខេត្តកំពង់ធំ ដែលជាមិត្តរួមអាវុធ ធ្លាប់បានឆ្លងកាត់សមរភូមិប្រយុទ្ធជាច្រើនជាមួយគ្នា ទាំងនៅលើភូមិសាស្ត្រខេត្តកំពង់ធំ ការវាយបើកផ្លូវជាតិលេខ១២ (បច្ចុប្បន្នហៅថាផ្លូវជាតិលេខ ៦២) និងចុងក្រោយនៅលើសមរភូមិទិសអន្លង់វែងនៅឆ្នាំ១៩៩៨ ។
ក្រោយពីបែកគ្នាអស់មួយរយះ លោក អ៊ុច ពត មានអាយុ ៦៥ឆ្នាំ រស់នៅជាមួយភរិយានិងក្រុមគ្រួសារបានធ្លាក់ខ្លួនពិការហើយមានជម្ងឺប្រចាំកាយមិនអាចដើរបាន តែទឹកចិត្តនៅតែក្លាហានមិនពិការដូចរៀងកាយទេ បច្ចុប្បន្នរស់នៅ ភូមិក្រូចឃុំស្វាយភ្លើង ស្រុកបារាយណ៍ ខេត្តកំពង់ធំ ។
ក្នុងឱកាសសំណេះសំណាលលើកទឹកចិត្តជាអតីតមិត្តរួមអាវុធនេះ ក្រុមការងារយើងបានផ្ដល់ជូនគាត់នូវអង្ករចំនួន៥០គីឡូក្រាម មីយើងមួយកេស ទឹកផ្លែឈើពីរកេស និងថវិកាចំនួន១០០.០០០៛ ដោយក្តីរំភើបក្នុងចិត្តខណៈពេលបានជួបមិត្តធ្លាប់រួមអាវុធ ព្រមទាំងបានជូនពរ ឲ្យទទួលបានជោគជ័យលើការបោះឆ្នោតខាងមុខនេះ ។
ដោយ ប៊ុន រដ្ឋា
