កំពង់ធំៈ លោកស្រម័យ ថា គឺជាអតីតយុទ្ធជនមួយរូប បំរើការងារនៅអង្គភាពវរសេនាតូចលេខ៣នៃយោធាខេត្តកំពង់ធំ បានធ្លាក់ខ្លួនពិការជើង នៅលើសមរភូមិសម័យសង្គ្រាម ហើយមានភរិយា ជាជនពិការដៃម្ខាង មានជីវភពទីទ័លក្រ រកព្រឹកខ្វះល្ងាច ត្រូវបានទទួលផ្ទះមួយខ្នង ដែលជាអំណោយរបស់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា តាមរយះសមាគមអតីតយុទ្ធជនខេត្តកំពង់ធំ។
លោក ស្រម័យ ថា មានចាប់ដៃគ្នាជាគូរស្វាម៉ីភរិយា ដែលជាជនពិការដូចគ្នា បានកូន៥នាក់ជាចំណងដៃ បច្ចុប្បន្ន បានបញ្ជូនកូនៗឲ្យរៀនសូត្របច្ចុប្បន្នរស់នៅ ក្នុងខ្ទមធ្លុះធ្លាយ តូចចង្អៀត មានមុខរបរស៊ីឈ្នួលគេ រស់នៅភូមិ ស្វាយកាល់ ឃុំកកោះ ស្រុកសន្ទុក ខេត្តកំពង់ធំ ដោយការអាណិតអាសូ ពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈឯកឧត្ដមនាយឧត្តមសេនិយគន់គីម អគ្គលេខាធិការសមាគមអតីតយុទ្ធជនកម្ពុជា ឲ្យសមាគមអតីតយុទ្ធជនខេត្តកំពង់ធំសាងសង់ផ្ទះមួយខ្នងដែលមានទំហំ ៤មគុណ៦ម ដែលត្រូវបានចំណាយថវិកានៃការសាងសង់អស់ទឹកប្រាក់ ៤.៩៥០.០០០រៀល ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាករតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជាខេត្ត បានប្រគល់ផ្ទះជូនលោក ស្រម័យ ថា នៅថ្ងៃទី២២ ខែមិនា ឆ្នាំ ២០១៧ ហើយជាខ្នងផ្ទះទី៣២ ដែលបានសាងសង់ជូនអតីតយុទ្ធជនកម្ពុជាខេត្តកំពង់ធំ ដែលមានការខ្វះខាតជម្រកស្នាក់នៅពិតប្រាកដ ក្នុងពិធីប្រគល់ផ្ទះថ្មីនេះ ឯកឧត្តម សោម ស៊ុន និងសហការី រួមជាមួយអាជ្ញាធរដែនដីបានផ្តល់ជូនបន្ថែមនូវអង្ករចំនួន២៥គីឡូក្រាម មីយើងមួយកេស ទឹកត្រីទឹកស៊ីអ៊ីវពីរយួរ និងថវិកាចំនួន១០០.០០០រៀល ផងដែរ ។
ដោយ ប៊ុន រដ្ឋា
