VDEO នាវា២គ្រឿងរបស់កងឆ្មាំឆ្នេរសមុទ្រចិន បានបើកចូលដែនទឹកនៃប្រជុំកោះសេនកាគូ ចិនហៅឌីអាវយូ ដែលត្រួតត្រាដោយជប៉ុន តែចិនទាមទារក្រោយពីសេចក្តីថ្លែងការណ៍មួយរបស់ G-7 ស្តីពីភាពតានតឹងនៅសមុទ្រចិនខាងកើត និងខាងត្បូង ។ កងឆ្មាំឆ្នេរសមុទ្រជបុ៉នបញ្ជាក់ថា នាវាចិនទាំង២គ្រឿងនោះត្រូវប្រទះឃើញក្នុងដែកទឹកជុំវិញកោះ UOTSURIJIMA ។
ការលុកលុយថ្មីនេះរបស់នាវាចិន ធ្វើឡើងក្រោយពី G-7 ដែលរួមប្រជុំនៅក្រុងព្រុចសែល បានសម្តែងកាលពីថ្ងៃទី៥ មិថុនា ពីការព្រួយបារម្ភជាពិសេសចំពោះការកើនឡើងនៃភាពតានតឹងក្នុងតំបន់ នោះនៃពិភពលោក តែមិនលើកឈ្មោះប្រទេសចិនដោយចំៗឡើយ ។ មេដឹក នាំរបស់ប្រទេសមហាឧស្សាហកម្មទាំង៧ ថ្លែងថា យើងមានការព្រួយបារម្ភយ៉ាងខ្លាំងចំពោះភាពតានតឹងនៅសមុទ្រចិនខាង កើត និងខាងត្បូង ។
ក្នុងសេចក្តីប្រកាសដដែល មេដឹកនាំរបស់ G-7 អះអាងថា ប្រឆាំងនឹងរាល់ការបុ៉នប៉ងជាឯកតោភាគីទាមទារយកដែនដី ឬដែនសមុទ្រតាមរយៈការសម្លុតបំភ័យ ឬការប្រើកម្លាំង ។ ស្ថិតនៅចម្ងាយ២០០គីឡូម៉ែត្រភាគឦសានកោះ តៃវ៉ាន់ និងចម្ងាយ៤០០គីឡូម៉ែត្រខាងលិចកោះអូគីណាវ៉ា ប្រជុំកោះសេនកាគូ ដែលជបុ៉នគ្រប់គ្រងត្រូវទាមទារយកដោយចិនក្រោមឈ្មោះថា ប្រជុំកោះឌីអាវយូ ។
អ្នកនាំពាក្យក្រសួងការបរទេសចិន លោកហុងឡី គូសបញ្ជាក់កាលពីថ្ងៃទី៥ មិថុនាថា ចិនមិនរារែកឡើយក្នុងការឆ្លើយតបចំពោះរាល់ការបង្កហេតុ ដែលធ្វើឱ្យប៉ះពាល់ដល់អធិបតេយ្យភាព ឬសន្តិសុខ ព្រមទាំងស្ថេរភាពសមុទ្រ ។ លោកហុងឡី ថ្លែងបែបនេះក្នុងសន្និសីទសារព័ត៌មានមួយស្តីពីសេចក្តីប្រកាសរបស់ មេដឹកនាំ G-7 ដែលសម្តែងការបារម្ភទាក់ទិនដល់សមុទ្រចិនខាងកើត ឬសមុទ្រចិនខាងត្បូង ។
យោងតាមអ្នកនាំពាក្យរូបនេះថា ចិនជានិច្ចជាកាលបង្ហាញពីការប្តេជ្ញាចិត្តមិនរាថយទាក់ទិនដល់ ការថែរក្សាស្ថេរភាព និងសន្តិភាពក្នុងដែនទឹកទាំងនោះ ហើយថែរក្សាធម្មនុញ្ញ អ.ស.ប ព្រមទាំងគោរពបណ្តាបទដ្ឋានជាមូលដ្ឋានអំពីទំនាក់ទំនងអន្តរជាតិ និងបណ្តាគោលការណ៍ជាមូលដ្ឋាននៃច្បាប់អន្តរជាតិ ។
លោកហុងឡី បញ្ជាក់ថា ចិនថែរក្សាយ៉ាងម៉ឺងម៉ាត់នូវអធិបតេយ្យភាពដែនដី សិទ្ធិសមុទ្រ និងសន្តិសុខជាតិរបស់ខ្លួន ហើយថែរក្សារបៀបរៀបរយ និងសេរីភាពនៃការធ្វើនាវាចរណ៍ ។
