កំពង់ធំៈ ឯកឧត្តម សោម ស៊ុន សមាជិកអចិន្ដ្រៃយ៍គណបក្សប្រជាជនកម្ពុជាខេត្តកំពង់ធំ និងជាប្រធានក្រុមការងារចុះជួយឃុំបន្ទាយស្ទោង បានដឹកនាំសហការីចុះសួរសុខទុក្ខ សមាជិកគ្រួសារគណបក្សប្រជាជនកម្ពុជាចំនួន៩គ្រួសារដែលមានជីវភាពលំបាកខ្វះខាត ព្រមទាំងផ្តល់ជូននូវ អំណោយឧបត្ថម្ភពីក្រុមការងារចុះជួយឃុំបន្ទាយស្ទោង ស្រុកស្ទោង ខេត្តកំពង់ធំ ។
សមាជិកគ្រួសារ គណបក្សប្រជាជនកម្ពុជា ចំនួន៩ គ្រួសារ មានជីវភាពខ្វះខាត ត្រូវបានយកចិត្តទុកដាក់ ពីក្រុមការងាររបស់ជួយឃុំបន្ទាយស្ទោង ចុះមកសំណេះសំណាល និងសួរសុខទុក្ខ ដល់លំនៅដ្ឋានរបស់ប្រជាពលរដ្ឋ ដើម្បីជួយជាកំលាំងចិត្ត និងបានជួយគ្នាក្នុងគ្រាលំបាក ក៏ដូចជាការផ្សារភ្ជាប់នូវចំណងមិត្តភាពរវាង ក្រុមការងារនិង អាជ្ញាធរ ដោយមិនទុកអោយលំបាកវេទនា ដោយមិនមានការអើពើនោះទេ ។
ឯកឧត្តម សោម ស៊ុន សមាជិកអចិន្ដ្រៃយ៍គណបក្សខេត្ត និងជាប្រធានក្រុមការងារចុះជួយឃុំបន្ទាយស្ទោង បានមានប្រសាសន៍ថា ក្រោយពីការងារស្នូលរបស់អង្គភាព គឺបានដឹកនាំសហការី ក្នុងក្រុមការងារចុះជួយឃុំបន្ទាយស្ទោង ទៅសំណេះសំណាលសាកសួរសុខទុក្ខ ដល់លោកយាយលោកតា ដែលមានជីវភាពលំបាកខ្វះខាត នៅភូមិបន្ទាយស្ទោង ចំនួន៩គ្រួសារ និងបានពាំនាំនូវការផ្តាំផ្ញើសាកសួរសុខទុក្ខរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ហើយនិងបានផ្ដល់ជំនួយជូនគាត់ ដោយក្នុងមួយគ្រួសារទទួលបាន អង្ករ២៥គីឡូក្រាម មីយើងមួយកេស និងថវិកាចំនួន៤០.០០០៛ ផងដែរ។
លោកយាយលោកតា សមាជិកគណបក្សប្រជាជន បានថ្លែងអំណរគុណ សម្តេចតេជោ ហ៊ុន សែន ប្រធានគណបក្ស ប្រជាជនកម្ពុជា ដែលបានរំដោះគាត់ និងក្រុមគ្រួសារ ពិសេសគឺប្រជាពលរដ្ឋទូទាំងប្រទេស ឲ្យរួចផុតពីរបបប្រល័យពូជសាសន៍ បនក្បត់ប៉ុលពត ហើយធ្វើឲ្យប្រទេសជាតិមានសន្តិភាព និងការអភិវឌ្ឍន៍គ្រប់ទីកន្លែង លោកយាយលោកតាសមាជិកគណបក្សប្រជាជន ទាំងអស់ប្តេជ្ញាចិត្តគាំទ្រសម្តេចតេជោ ហ៊ុន សែន រហូតអស់មួយជីវិត ។
ដោយ ប៊ុន រដ្ឋា
