កំពង់ធំៈ ដោយការខិតខំប្រឹងប្រែង របស់មេបញ្ជាការដ្ឋានតំបន់ប្រតិបត្តិការសឹករងកំពង់ធំ ក្រៅពីការងារយកចិត្តទុកដាក់ របស់សមាគមអតីតយុទ្ធជនខេត្ត ក៏បានគិតគូរសំខាន់បំផុតពីការងារសាងសង់បន្ទាយ ពីមួយថ្ងៃទៅមួយថ្ងៃ បាន ធ្វើឲ្យបញ្ជាការដ្ឋានតំបន់ប្រតិបត្តិការសឹករងកំពង់ធំ ទទួលបានការរីកចំរើន យ៉ាងឆាប់រហ័ស បានធ្វើឲ្យមានការកោត សរសើរពីសំណាក់មន្រ្តីរាជការ ប្រជាពលរដ្ឋទូទាំងខេត្តកំពង់ធំ ។
ជាក់ស្តែងថ្ងៃនេះផងដែរ នៅទីបញ្ជាការដ្ឋានតំបន់ប្រតិបត្តិការសឹករងកំពង់ធំ បានប្រារព្វពិធីពិធីបញ្ចុះបឋមសីលាសាងសង់អគារសម្រាប់ទទួលភ្ញៀវមួយខ្នង ៧បន្ទប់ ក្រោមការជំនួយឧបត្ថម្ភ របស់គណបញ្ជាការយោធាទីក្រុងហូជីមិញ នៃសាធារណរដ្ឋសង្គមនិយមវៀតណាម ដែលកំពុងតែត្រូវបានសាងសង់នៅក្នុងបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលមានទំហំ ៥,៥០ ម៉ែត្រx ២៨,២០ ម៉ែត្រ ធ្វើពីបេតុងប្រក់ក្បឿងថៃ ដែលគ្រោងចំណាយថវិកាក្នុងការសាងសង់អស់ទឹកប្រាក់ ៤២.៥០០$ និងចាប់ផ្តើមសាងសង់នៅព្រឹកថ្ងៃទី០៣ខែឧសភា ឆ្នាំ ២០១៧ ស្ថិតនៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹកកំពង់ធំ បានមានប្រសាសន៍ថា ការសាងសង់ អាគារទទួលភ្ញៀវ៧បន្ទប់នេះ គឺជាជំនួយរបស់គណបញ្ជាការយោធាទីក្រុងហូជីមិញ ប្រទេសវៀតណាម ដែលបានចង់សម្ព័ន្ឋមេត្រីភាព ជាមួយនឹងតំបន់ប្រតិបត្តិការ សឹករងកំពង់ធំ គឺសម្រាប់ទទួលគណៈប្រតិភូភ្ញៀវជាតិ និងអន្តរជាតិ និងដែលបានអញ្ជើញមកបំពេញប៉េសកម្មនៅក្នុងទឹកដីខេត្តកំពង់ធំ គឺអាចស្នាក់នៅដើម្បីបំពេញភារកិច្ច ដែលជាការកាត់បន្ថយការចំណាយថវិកា ក្នុងការជួលផ្ទះសំណាក់ ម្យ៉ាងទៀតដើម្បីសុវត្តិភាពប្រតិភូជាតិ និងអន្តរជាតិផងដែរ ។
ក្នុងឳកាសនោះដែរ ឯកឧត្តម សោម ស៊ុន បានបញ្ជាក់ថា ក្នុងនាមជាមេបញ្ជាការតំបន់ប្រតិបត្តិការសឹករងកំពង់ធំ គឺត្រូវ គិតគូរពីជីវភាពកងទ័ព ការហ្វឹកហាត់ រៀនសូត្រដើម្បីឲ្យសុខភាពរ៉ឹងមាំ ពោពេញទៅដោយគុណភាព ត្រៀមខ្លួនជា ស្រេចដើម្បីទទួលបទបញ្ជាពីថ្នាក់លើ ទទឹមគ្នានិងការហ្វឹកហាត់ ក៏ត្រូវគិតគូរពីការសាងសង់បន្ទាយឲ្យក្លាយជាកន្លែង ធ្វើការដ៏សមរម្យ ដើម្បីជាគំរូនាយទាហាន ពលទាហាន នៃកងយោធពលខេមរភូមិន្ទ ចំណុះឲ្យតំបន់ប្រតិបត្តិការសឹករងកំពង់ធំ ក្នុងការដឹកនាំពេលអនាគត់។
ដោយ ប៊ុន រដ្ឋា
