កំពង់ធំៈ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានថ្លែងនៅក្នុងអង្គប្រជុំថា លទ្ធផលសកម្មភាពរបស់បញ្ជាការដ្ឋាន តំបន់ប្រតិបត្តិការសឹករងកំពង់ធំ សម្រេចបានក្នុងចលនាប្រឡងប្រណាំង ដែលបានផ្អែកលើខ្លឹមសារទាំង៥ របស់យោធភូមិភាគទី៤បានដាក់ចេញ ដោយការពិនិត្យលើលទ្ធផលជាក់ស្តែង នូវសមិទ្ធផលរបស់បញ្ជាការ
ដ្ឋានតំបន់ប្រតិបត្តិការសឹករងកំពង់ធំ ដែលលទ្ធផលទាំងនោះមាន សំណង់អាគារ ធ្វើការ ការរៀបចំសោភ័ណភាពទីតាំង ការគ្រប់គ្រងកម្លាំង ពង្រឹងផ្នែកវិន័យ សណ្តាប់ធ្នាប់ គ្រប់គ្រងអាវុធជាតិផ្ទុះ របៀបធ្វើការ ការដាំដុះបន្លែបង្ការ ចិញ្ចឹមសត្វ ថែទាំសុខភាពកងទ័ព ។
ឧត្តមសេនីយ៍ត្រី សោម ស៊ុន បានបញ្ជាក់ថា ចំពោះការងារអតីតយុទ្ធជន សមាគមស្រុក ក្រុង បានយកចិត្តទុកដាក់បំផុតលើជីវភាព និងសុខទុក្ខរបស់គ្រួសារអតីតយុទ្ធជន ព្រមទាំងបានសហប្រតិបត្តិការជាមួយអន្តរជាតិ សហការបង្រ្កាបបទល្មើសនានា ក្នុងភូមិសាស្រ្តខេត្តកំពង់ធំ ចូលរួមរក្សាសន្តិសុខ ស្ថេរភាពសង្គម ប្រសាសន៍នេះត្រូវបានលើក ឡើងនៅក្នុងកិច្ចប្រជុំបូកសរុបលទ្ធផលការងារប្រឡងប្រណាំងឆមាសទី១ លើកទិសដៅអនុវត្តឆមាសទី២ ឆ្នាំ២០១៧ ដោយមាន ឧត្តមសេនីយ៍ទោ ស៊ុន គឹមថៃ មេបញ្ជាការង និងជាប្រធានគណៈកម្មការប្រឡងប្រណាំង បញ្ជាការដ្ឋាន យោធភូមិភាគទី៤ ជាគណៈអធបិតី នៅព្រឹកថ្ងៃទី៥ ខែឧសភា ឆ្នាំ ២០១៧។
បន្ទាប់ពីលោក វរៈសេនីយ៍ឯក សោម សុភាវុធ មេបញ្ជាការង និងជាប្រធានអនុគណៈកម្មការប្រឡងប្រណាំងរបស់ តំបន់ប្រតិបត្តិការសឹករងកំពង់ធំ បានអានរបាយការ និងបទពិសោធន៍ការងារប្រឡងប្រណាំងជូនអធិបតីនិងគណៈប្រតិភូយោធភូមិភាគទី៤ រួមទាំងសមាសភាពចូលរួមក្នុងកម្មវិធីចំនួន៩៥ នាក់ ដែលជាមេបញ្ជាការ មេបញ្ជាការរងគ្រប់បណ្ដាអង្គភាពនិងស្ថាប័នចំណុះបញ្ជាការរដ្ឋានតំបន់ប្រតិបត្តិការសឹករងកំពង់ធំរួចមក ។
ឯកឧត្តម ឧត្តមសេនីយ៍ទោ ស៊ុន គឹមថៃមេបញ្ជាការងយោធភូមិភាគទី៤ បានមានប្រសាសន៍កោតសរសើរ វាយតំលៃខ្ពស់ចំពោះស្នាដៃ លទ្ធផលការងារប្រឡងប្រណាំង ដែលសម្រេចបានជោគជ័យរបស់តំបន់ប្រតិបត្តិការសឹករងកំពង់ធំ ថែមទាំងមាន កិច្ចសហការល្អជាមួយនឹងរដ្ឋបាលដែនដី មានភាពរ៉ឹងមាំ ធ្វើឲ្យប្រជាពលរដ្ឋមានសន្តិសុខ សុវត្តិភាពល្អ ដោយបានគោរពតាមខ្លឹមសារ សកម្មភាពការងារប្រឡងប្រណាំងទាំង៥១/ ប្រយុទ្ធ ត្រៀមប្រយុទ្ធការងារល្អ២/ហ្វឹកហ្វឺនរៀនសូត្រល្អ៣/ ទស្សនៈត្រឹមត្រូវ ឆន្ទៈមោះមុត សាមគ្គីវន័យល្អ ៤/គ្រប់គ្រងកម្លាំង មធ្យោបាយ អាវុធយុទ្ធភ័ណ្ឌ គ្រឿងចក្រឲ្យបានម៉ឺងម៉ាត់ម៉ត់ចត់ និងមិនឲ្យបាត់បង់៥/ ម្ចាស់ការបង្កបង្កើនផល សន្សំសំចៃ ធានាសុខភាព និងជីវភាពរស់នៅល្អ។
ដោយ ប៊ុន រដ្ឋា
