កំពង់ធំៈ ក្រុមគ្រួសារអតីតយុទ្ធជន ដែលជាជនទីទាល់ក្រ ជួបការលំបាក ត្រូវបានឯកឧត្តម ឧត្តមសេនីយ៍ត្រី សោម ស៊ុ ន មេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជន ខេត្តកំពង់ធំ ដឹកនាំសហការីចុះ សួរសុខទុក្ខ សំណេះសំណាល ដើម្បីលើកទឹកចិត្ត ផ្សាភ្ជាប់នូវចំណងមិត្តភាព ក្នុងនាមមិត្តធ្លាប់រួមអាវុធ ដែលបាន ចូលនិវន្ត៍ជន ឬពិការ ។
អតីតយុទ្ឋជនចំនួន៥គ្រួសារទៀតដែលមានជីវភាពលំបាកខ្វះខាត ត្រូវ ឯកឧត្តម ឧត្តមសេនីត្រី សោម ស៊ុន យកចិត្ត ទុកដាក់ពិសេសបំផុត ហើយនិងបានធ្វើការដោះស្រាយជូន នូវបញ្ហាកង្វះខាតមួយចំនួន រួមទាំងសំណូមពរ ផ្សេងៗរបស់គ្រួសារអតីតយុទ្ធជន កាលថ្ងៃទី០៨ខែឧសភាឆ្នាំ២០១៧ នៅក្នុងបរិវេណបញ្ជាការដ្ឋានផ្នែកសឹករងសណ្តាន់នៃតំបន់ប្រតិបត្តិការសឹករងកំពង់ធំ ក្នុងឱកាសនេះដែរក្រុមការងារបានផ្ដល់ជូនគ្រួសារអតីតយុទ្ធជន ក្នុងម្នាក់ៗទទួលបាននូវអង្ករចំនួន២៥គីឡូក្រាម មីយើងមួយកេស ទឹកត្រីទឹកស៊ីអ៊ីវពីរយួរ ទឹកបរិសុទ្ធ២យួរ និងថវិកាចំនួន៥០.០០០៛ ។
ឯកឧត្តម ឧត្តមសេនីត្រី សោម ស៊ុន បានមានប្រសាសន៍ ពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រធានសមាគមអតីតយុទ្ធជនកម្ពុជា ពិសេសបានបញ្ជាក់ថា ជានិច្ចកាល សម្តេចតេជោ ដឹងគុណជានិច្ចចំពោះអតីតយុទ្ធជនយើង ដោយមិនទុកឲ្យអតីតយុទ្ធជនយើងមានភាពឯកោទៀតទេ គឺនៅគ្រប់ទីកន្លែងមានសមាគមអតីតយុទ្ធជនយើងគ្រប់គ្រងថែរក្សា ដើម្បីដឹងសុខដឹងទុក្ខរបស់បងប្អូន ។
ក្រុមគ្រួសារអតីតយុទ្ធជន ទាំង៥គ្រួសារ បានថ្លែងអំណរគុណ យ៉ាងក្រែងលែង ដោយរកអ្វីប្រៀបផ្ទឹមពុំបានឡើយ ដោយសារ ការយកចិត្តទុកដាក់របស់សម្តេច តេជោ ហ៊ុន សែន ដែលជាប្រមុខដឹកនាំប្រទេសដ៏ឆ្នើម នាំនាវាសន្តិភាពឆ្ពោះទៅរកភាពរីកចំរើន និងការអភិវឌ្ឍន៍ និងអគុណចំពោះឯកឧត្តម សោម ស៊ុន ព្រមទាំងក្រុមការងារស្រុក ដែលបានគិតគូរ ដោយមិនរើសរអើង និងទុកឲ្យនៅឯកកោនោះទេ និងសូមជូនពរឲ្យសុខភាពល្អ សម្រេចភារកិច្ចជោកជ័យគ្រប់ពេលវេលា។
ដោយ ប៊ុន រដ្ឋា
