កំពង់ធំៈ ប្រធានក្រុមបក្ស និងសកម្មជនយុវជនបក្សភូមិចំនួន៤ភូមិ បានប្តេជ្ញាចិត្តដឹកនាំសមាជិកនិងក្រុមគ្រួសារ ទៅបោះឆ្នោតជូនគណបក្សប្រជាជនកម្ពុជា នៅថ្ងៃទី៤ ខែមិថុនា ឆ្នាំ ២០១៧ និងគាំទ្រសម្តេចតេជោ ហ៊ុន សែន ជានាយករដ្ឋមន្រ្តី និងបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤ នេះ ។ បោះឆ្នោតជូនគណបក្សប្រជាជនកម្ពុជា គឺបោះឆ្នោតឲ្យខ្លួនឯង ដើម្បីសន្តិភាព និងការអភិវឌ្ឍន៍ប្រទេស ឈានទៅរកភាពរីកចម្រើន។
ប្រធានក្រុមបក្ស និងសកម្មជន យុវ្ធជនបក្ស ចំនួន១៥០នាក់ ដែលបានអញ្ជើញមកពី៤ភូមិ ឃុំបន្ទាយស្ទោង ស្រុកស្ទោង ខេត្តកំពង់ធំ ក្នុងនោះមានភូមិរលួសចំនួន ៥០ នាក់ ភូមិ បវែងចំនួន ៥០ នាក់ ភូមិតាម៉ើចំនួន២០នាក់ និងភូមិដូនប៉ុក ចំនួន ៣០ នាក់ បានមកជួបជុំក្នុងពិធីផ្សព្វផ្សាយ សមិទ្ធផល របស់គណបក្សប្រជាជន ដែលធ្វើបាន និងពន្យល់បង្រៀនការគូសសន្លឹកឆ្នោតដ៏ត្រឹមត្រូវ ចៀសវាងមានការខូចខាតនៅពេលបោះឆ្នោត បានធ្វើឡើងនៅភូមិ បវែង ឃុំបន្ទាយស្ទោង ស្រុកស្ទោង ខេត្តកំពង់ធំ ព្រឹកថ្ងៃ២៩ខែឧសភា ឆ្នាំ២០១៧។
ឯកឧត្តម សោម ស៊ុន សមាជិកអចិន្រ្តៃគណបក្សខេត្ត និងជាប្រធានក្រុមការងារចុះជួយឃុំបន្ទាយស្ទោង បានមានប្រសាន៍ផ្សព្វផ្សាយណែនាំ ពីសមិទ្ធផលធំៗរបស់គណបក្សប្រជាជនកម្ពុជា និងជាមរតកធំៗចំនួនបួនយ៉ាងដែលគណបក្សប្រជាជនកម្ពុជា ធ្វើបាន ទី១/គឺបានរដោះប្រជាជនឲ្យរួចផុតពីរបបប្រល័យពូជសាសន៍ប៉ុលពត ទី២/ទប់ស្កាត់ការពារមិនឲ្យរបបប្រល័យពូជសាសន៍ប៉ុល ពតវិលត្រឡប់មកវិញ ទី៣/អនុវត្តន៍គោលនយោបាយឈ្នះៗរបស់សម្តេចតេជោ បញ្ចប់សង្គ្រាមនៅកម្ពុជាធ្វើឲ្យប្រទេសជាតិយើងមានសន្តិភាព និងទី៤/ ការអភិវឌ្ឍន៍ប្រទេសជាតិឲ្យមានការរីកចំរើន និងបន្តអភិវឌ្ឍន៍ ។
ឯកឧត្តម សោម ស៊ុន សមាជិកអចិន្រ្តៃបក្សខេត្ត បានបង្រៀនគូសសន្លឹកឆ្នោតដល់ប្រធានក្រុមបក្សនិងសកម្មជនយុវជនបក្ស ភូមិរបស់គណបក្សប្រជាជន ដើម្បីផ្ទៀងផ្ទាត់ការយល់ដឹងរបស់សមាជិកបក្ស ក្នុងពេលបោះឆ្នោតឲ្យមានប្រសិទ្ធិភាព និងបានផ្តាំផ្ញើរដល់បងប្អូនប្រធានក្រុមបក្ស ណែនាំបន្តដល់សមាជិកក្រុមគ្រួសារ ដែលមានឈ្មោះបោះឆ្នោត ខណៈពេលដែលទៅប្រើប្រាស់សិទ្ធបោះឆ្នោត ដោយហាមមិនឲ្យផឹកជាតិស្រវឹង ពាក់អាវបក្ស និងខោអាវប្រដាប់អាវុធ និងសូមភ្ជាប់នូវអត្តសញ្ញាណប័ណ្ណ និងលិខិតបញ្ជាក់ពីភូមិឃុំ ដើម្បីមានសិទ្ធបោះឆ្នោត ដើម្បីចៀសវាងខូចសំលេងឆ្នោត ។
ដោយ ប៊ុន រដ្ឋា
