កំពង់ធំៈ កងកម្លាំងត្រៀមបម្រុងអន្តរាគមន៍ ប្រចាំគោលដៅទី១ នៃអង្គភាពវេរៈសេនាតូចថ្មើរជើងលេខ១នៃតំបន់ប្រតិបត្តិការសឹករងកំពង់ធំ បានរៀបចំប្រមូលផ្តុំដើម្បីបែងចែកតួនាទីភារៈកិច្ចប្រចាំតាមគោលដៅ ដើម្បីចល័តអន្តរាគមន៍ឲ្យបានទាន់ពេលវេលាតាមបទបញ្ជរបស់ថ្នាក់លើ ក្រោមការយកចិត្តទុកដាក់ របស់ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅព្រឹកថ្ងៃទី១ ខែមិថុនា ឆ្នាំ ២០១៧ ស្ថិតនៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា ដោយបានគោរពនូវបទបញ្ជារបស់ថ្នាក់ដឹកនាំ ឲ្យទទួលខុសត្រូវផ្នែកការពារសន្តិសុខ សណ្តាប់ធ្នាប់ ឲ្យគ្រប់គណបក្សទាំងអស់ ទទួលបាននូវសុវត្តិភាពល្អ និងការបោះឆ្នោតប្រកបដោយរលូន គឺបានត្រួតពិនិត្យកម្លាំង និងត្រៀមកម្លាំងអន្តរាគមន៍តាមគោលដៅ របស់វរសេនាតូចថ្មើជើងលេខ១ ដើម្បីថែរក្សាសន្តិភាព និងភាពសុខសាន្តជូនប្រជាជនយើង ក្នុងអំឡុងពេលបោះឆ្នោត ជាពិសេសមុនថ្ងៃបោះឆ្នោត រហូតដល់ក្រោយពេលបោះឆ្នោត ដើម្បីឲ្យប្រជាពលរដ្ឋបានបញ្ចេញមតិ និងសំលេងឆ្នោត ដោយសុវត្តិភាព។
នៅក្នុងឪកាស ចុះសំណេះសំណាលជាមួយនិងកម្លាំងអន្តរាគមន៍ ត្រៀមបម្រុងទប់ស្កាត់រាល់បទល្មើស ដែលប្រ ព្រឹត្តឡើងដោយខុសច្បាប់ ឯកឧត្តម សោម ស៊ុនបាននាំយកសាច់ជ្រូក១០គីឡូក្រាម បន្លែគ្រប់មុខចំនួន១៥គីឡូ ទឹកបរិសុទ្ធ២០យួរ មីយើង៥ កេស និងនុំធុងចំនួន២ ធុង សម្រាប់ផ្តល់ជូនដល់កងកម្លាំងដែលប្រចាំការ ការពារក្នុងពេលបោះឆ្នោត ជ្រើសរើសក្រុមប្រឹក្សាឃុំ សង្កាត់អណត្តិទី៤ នៅថ្ងៃទី ៤ ខែមិថុនា ឆ្នាំ ២០១៧។
កងកម្លាំងយោធពលខេមរភូមិន្ទ នៃតំបន់ប្រតិបត្តិការសឹករងកំពង់ធំ បានប្តេជ្ញាចិត្តដាច់ខាតការពារជាតិ សាសនាព្រះមហាក្សត្រ និងការពាររាជរដ្ឋាភិបាលស្របច្បាប់ ដែលដឹកនាំដោយសម្តេចតេជោ ហ៊ុន សែន ជានាយករដ្ឋមន្រ្តី នៃព្រះរាជាណាចក្រកម្ពុជា ហើយនិង ប្រឆាំងដាច់ខាតនូវសកម្មភាពញុះញង់លាបព៍ណធ្វើឲ្យសង្គមខ្មែរបែកបាក់ និងបដិវត្តន៍ពណ៌នៅកម្ពុជា ។
ដោយ ប៊ុន រដ្ឋា
