កំពង់ធំៈ ដោយសារតែមានសភាពអាកាសធាតុប្រែប្រួល ពីមួយឆ្នាំទៅមួយឆ្នាំ កំណើនកំដៅបានធ្វើ ឲ្យអាកាសធាតុបំរែប្រួល បានបង្ករឲ្យមានភ្លៀងធ្លាក់ជោគជាំចាប់តាំងពីដើមខែមេសា ឆ្នាំ ២០១៧ ដែលវា ខុសគ្នាស្រឡះនឹងអាកាសធាតុឆ្នាំ ២០១៦ កន្លងមកបង្ករឲ្យដីប្រេះក្រហែងគ្មានទឹកគ្រប់គ្រាន់សម្រាប់ប្រជាពលរដ្ឋប្រើប្រាស់ មិនតែប៉ុណ្ណោះធ្វើឲ្យរាជរដ្ឋាភិបាលមានវិធានការ ឲ្យតាមបណ្តាឃុំសង្កាត់ ចុះជួយ អន្តរាគមន៍ចែករំលែកទឹកដល់ប្រជាពលរដ្ឋ ។
ជាក់ស្តែងក្នុងរយះពេលខែមេសា ខែឧសភា និងខែមិថុនា ដំណក់ទឹកភ្លៀងបានធ្លាក់ចុះមកឥតឈប់ឈរ បង្ករឲ្យទឹកស្ទឹងសែន និងស្ទឹងដ៏ទៃទៀតមានទឹកហូរហៀរគ្រប់ទិសទី ជាក់ស្តែងស្ទឹងសែនគិតមកដល់ថ្ងៃទី៧ ខែមិថុនា ឆ្នាំ ២០១៧ កម្ពស់ទឹកភ្លៀងបានឡើងដល់ចំនុច១៣.៣៥ស.ម ទិដ្ឋភាពទឹកស្ទឹងឡើងល្ហល្ហាចស្មើរនិងខែវស្សា បង្ករឲ្យមានការព្រួយបារម្ភណ៍ ពីសំណាក់បងប្អូនប្រជាពលរដ្ឋ ដែលកំពុងតែប្រកបមុខរបរធ្វើស្រែប្រាំង និងប្រជាពលរដ្ឋរស់នៅតាមបណ្តោយស្ទឹងសែន ដោយខ្លាចទឹកជំនន់។
លោក យោ ឡា ប្រធានមន្ទីរធនធានទឹកនិងឧត្តុនិយមខេត្តកំពង់ធំ បានមានប្រសាសន៍ថា ភ្លៀងនិងកាត់ បន្ថយការធ្លាក់ភ្លៀងចាប់ពីពេលនេះតទៅ ហើយក៏ពុំមានហេតុការណ៍ ទឹកជំនន់ដែលធ្វើឲ្យមានការព្រួយបារម្ភណ៍នោះទេ ការធ្លាក់ភ្លៀងនេះគឺដោយសារប្រទេសយើង រងសម្ពាធខ្យល់ព្យុះមកពីប្រទេសជិតខាង ដោយចុងៗទេ ពុំបានទទួលរងឥទ្ធិពលខ្យលព្យុះចំៗឡើយ នៅពេលនេះវានិងបាត់ទៅវិញហើយ និងសូមផ្តាំផ្ញើរដល់ប្រជាពលរដ្ឋ កុំមានការព្រួយបារម្ភណ៍ឡើយ។
សូមបញ្ជាក់ថា មូលហេតុដែលទឹកស្ទឹងសែនមានកំណើនឡើងបែបនេះ គឺបណ្តាលមកពីស្ទឹងសែនជា ស្ទឹងដែលមានប្រវែងវែង ចាប់តាំងពីទន្លេសាប ឆ្លងកាត់កំពង់ធំ ព្រះវិហារ និងខេត្តជាប់ព្រំប្រទល់មួយចំនួនទៀត ដោយការប្រមូលផ្តុំនៃទឹកភ្លៀង បានហូរចូលស្ទឹងសែនតែមួយ ហើយទម្លាក់មកទន្លេសា ទើបបង្ករឲ្យទឹកស្ទឹងឡើងជាបន្តបន្ទាប់ឥតឈប់ឈរ ។
ដោយ ប៊ុន រដ្ឋា
