កំពង់ធំៈ ឆ្លើយតបតាមបទបញ្ជារបស់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ឋជនកម្ពុជា និងបទបញ្ជារបស់ឯកឧត្តមនាយឧត្តមសេនិយ៍ គន់ គីម អគ្គលេខាធិការសមាគម រួមទាំងមានការចង្អុលបង្ហាញបន្ថែម ពីសំណាក់ ឯឧជា ម៉ន មេបញ្ជាការយោធភូមិភាគទី៤ ឲ្យសមាគមអតីតយុទ្ធជន ផ្សារភ្ជាប់ជាមួយនិងគ្រួសារអតីតយុទ្ឋជននៅតាមមូលដ្ឋាន ដើម្បីបង្កើនភាពជិតស្និទ្ធរវាង អង្គភាពតំបន់ជាមួយនិងប្រជាពលរដ្ឋ។
ជាក់ស្តែង ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ឋជនកម្ពុជាខេត្ត បានបន្តដឹកនាំសហការីចុះសួរសុខទុក្ខគ្រួសារអតីតយុទ្ឋជនមួយគ្រួសារទៀតដែលរស់នៅភូមិស្លាកែត សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ នៅល្ងាចថ្ងៃទី២៦/៧/ ២០១៧ និងជានិច្ចជាកាលសមាគមអតីតយុទ្ឋជនកម្ពុជាខេត្តកំពង់ធំ តែងតែចុះសួរសុខទុក្ខ ផ្សារភ្ជាប់ ជាមួយគ្រួសារអតីតយុទ្ឋជននៅមូលដ្ឋាន និងស្រាវជ្រាវសិក្សាពីជីវភាពរស់នៅ ដើម្បីឲ្យដឹងពីទុក្ខលំបាក របស់គ្រួសារអតីតយុទ្ធជន។
គ្រួសារលោកយាយ ឈួន ណៃ អាយុ៧៤ ឆ្នាំ មានកូនចំនួន១០ នាក់ ប្រុស៧ នាក់ ស្រី ៣នាក់ តែកូនគាត់បានស្លាប់អស់ចំនួន៧ នាក់ ក្នុងនោះមានកូនមួយនាក់ ធ្វើយោធា ឈ្មោះ អាន រ៉ន ហើយបានពលីជីវិតក្នុងសមរភូមិអំឡុងទសវត្សឆ្នាំ១៩៨០ បច្ចុប្បន្នលោកយាយ ឈួន ណៃ នៅសល់តែកូនបីនាក់ ហើយកូនគាត់បានទៅរស់នៅជាមួយក្រុមគ្រួសាររៀងៗខ្លួនអស់ នៅសល់តែលោកយាយម្នាក់ឯង រស់នៅក្នុងខ្ទមស្លឹកធ្លុះធ្លាយ ហើយគ្មានមុខរបរអ្វី រស់នៅសព្វថ្ងៃដោយសារអ្នកជិតខាងឬកូន ផ្តល់អង្ករឲ្យបន្តិចបន្តួចសម្រាប់រស់នៅកំដរជីវិត ។
ក្នុងឱកាសសំណេះសំណាលសាកសួរសុខទុក្ខនិងលើកទឹកចិត្តនេះ ក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានផ្ដល់ជូនគាត់នូវអង្ករចំនួន ៥០គីឡូក្រាម មីយើងមួយកេស ទឹកត្រីទឹកស៊ីអ៊ីវពីរយួរ និងថវិកាចំនួន៥០.០០០៛ លោកយាយ ឈួន ណៃ មានចិត្តរំភើបរីករាយយ៉ាងខ្លាំង ដោយកន្លងមកមិនដែលបានទទួលអំណោយឧបត្ថម្ភម្តងណាទេ នៃឳកាសសួរសុខទុក្ខ លោកយាយបានថ្លែងអំណរគុណចំពោះសម្តេចតេជោ ហ៊ុន សែន ដែលបានបង្កើតឲ្យមានសមាគមអតីតយុទ្ធជនកម្ពុជាខេត្ត ដើម្បីជួយដល់គ្រួសារអតីតយុទ្ធជន និងប្រជាពលរដ្ឋដែលជួយនូវការខ្វះខាត និងជូនពរសម្តេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិតិព្រឹទ្ឋបណ្ឌឹត ប៊ុន រ៉ានីហ៊ុន សែន ព្រមទាំងបុត្រាបុត្រី ចៅប្រុសចៅស្រី សូមបានជួបប្រទះតែនិងពុទ្ឋពរបួនប្រការគឺ អាយុ វណ្ណៈ សុខះ និងពលៈ កុំបីឃ្លាងឃ្លាតឡើយ។
ដោយ ប៊ុន រដ្ឋា
