កំពង់ធំៈ នៅព្រឹកថ្ងៃទី២៧ខែកក្កដាឆ្នាំ២០១៧ ឯកឧត្ដមអគ្គរដ្ឋទូត និងលោកវរសេនិយឯកសេនានុព័ន្ឋយោធា នៃសាធារណរដ្ឋឥណ្ឌូណេស៊ី ប្រចាំនៅព្រះរាជាណាចក្រកម្ពុជា បានអញ្ជើញមកពិនិត្យមើលទីតាំងអនុស្សាវរីយ៍ដែលកងទ័ពឥណ្ឌូណេស៊ីធ្លាប់បានឈរជើងក្នុងភារកិច្ចសម្របសម្រួលបទឈប់បាញ់ ក្រោមឆ័ត្រអង្គការសហប្រជាជាតិ ហៅកាត់ថា អ៊ុនតាក់ នៅក្នុងឆ្នាំ១៩៩១ ដល់ឆ្នាំ១៩៩៣។
កងទ័ពថែរក្សាសន្តិភាព ហៅ អ៊ុនតាក់ របស់ប្រទេសឥណ្ឌូនេស៊ី មានចំនួនមួយកងវរសេនាតូច មានទីតាំង ទីបញ្ជាការ នៅក្នុងទីបញ្ជាការដ្ឋានតំបន់ប្រតិបត្តិកាសឹករងកំពង់ធំ បច្ចុប្បន្នស្ថិតនៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ និងបានបំបែកកម្លាំងដាក់តាមគោលដៅក្នុងខេត្តមួយចំនួន ក្នុងនោះកងទ័ពឥណ្ឌូនេស៊ី បានមកបំពេញភារកិច្ចជាអន្តរជាតិ នៅក្នុងខេត្តចាប់បីឆ្នាំ ១៩៩១ដល់១៩៩៣ ក្នុងភារកិច្ចសម្របសម្រួល រៀបចំ ឲ្យមានសន្តិភាពរវាងភាគកីជម្លោះប្រដាប់អាវុធខ្មែរទាំង៣បក្ខ។
ឯកឧត្តម ឧត្តមសេនីយ៍ត្រី សោម ស៊ុន បានមានប្រសាសន៍ថា ឯកអគ្គរាជទូតនិងសេនានុពន្ឋយោធាឥណ្ឌូនេស៊ី ដើម្បីពិនិត្យសំណង់អនុស្សាវរីយ៍ នៅកណ្តាលស្ទឹងសែន និង សំណង់អាគារចំនួន២ ដែលស្ថានទូតឥណ្ឌូនេស៊ីបានឧបត្ថម្ភ មានអាគារធ្វើការមួយខ្នង ធ្វើអំពីឥដ្ឋប្រកស័ង្ខសី ទំហំ ៥មគុណ២០ម អាគាររងចាំមួយខ្នង ទំហំ៥ម គុណ៨.៥ម ធ្វើអំពីឥដ្ឋប្រកស័ង្ខសី ដែលបានផ្តល់ជូននៅឆ្នាំ២០០៦ ។
បន្ទាប់ពីធ្វើការពិនិត្យសំណងអាគារអនុស្សាវរីយ៍រួចមក ឯកអគ្គរាជទូតនិងសេនានុពន្ឋយោធាឥណ្ឌូនេស៊ី បានធ្វើការសំណេះសំណាល សម្តែងការគួរសមជាមួយឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិ ការសឹករងកំពង់ធំ ក្នុងមនោសញ្ជេតនានឹករលឹក និងបានបង្កើនភាពស្និទ្ធស្នាល ផ្លាស់ប្តូរបទពិសោធន៍ និងរឹតបន្តឹង ចំណងសាមគ្គី ឲ្យកាន់តែល្អប្រសើឡើង ក្រោយមកគណៈប្រតិភូបានអញ្ជើញទៅពិនិត្យ វិមានរំលឹកគុណយុទ្ធជនពលី ស្ថិតនៅក្នុងភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។
ដោយ ប៊ុន រដ្ឋា
