កំពង់ធំៈ នៅល្ងាចថ្ងៃទី០២ខែសីហាឆ្នាំ២០១៧ក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានបន្តដំណើរទៅបំពេញភារកិច្ចនៅលើទឹកដីស្រុកស្ទោង ខេត្តកំពង់ធំ ដើម្បីចុះសួរសុខទុក្ខ ពលបាលឯក ជរ ចាំ អាយុ៤៥ឆ្នាំ ដែលកន្លងមក ធ្លាប់ចូលបម្រើក្នុងជួរកងទ័ពនៅឆ្នាំ១៩៨៩ ជាអតីតយុទ្ធជននៅអង្គភាពកងពល១៩៦ ក្នុងវរសេនាតូចបញ្ជូនសាររបស់កងពល ។
លោក ពលបាលឯក ជរ ចាំ បានត្រូវរបួសដោយសារអំបែងគ្រាប់DK 75នៅសមរភូមិ ស្តៅ ខេត្តបាត់ដំបង ក្នុងអំឡុងឆ្នាំ១៩៩១ បច្ចុប្បន្នរស់នៅជាមួយភរិយា មានកូនចំនួនបីនាក់ កូនទី១មានគ្រួសារហើយ នៅសល់កូនពីរនាក់ទៀត រស់នៅក្នុងបន្ទុក ជ្រកក្រោមដំបូលខ្ទមស្លឹកតូចចង្អៀត ដែលមានគ្នា ចំនួនបួននាក់ បច្ចុប្បន្នរស់នៅភូមិ នាងណូយ ឃុំចំណាក្រោម ស្រុកស្ទោង ខេត្តកំពង់ធំ ។
ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ បានបញ្ជាក់ថា លោក ពលបាលឯក ជរ ចាំ និងភរិយាមានដីស្រែតូចមួយសម្រាប់ធ្វើស្រែ តែការហូបចុកមិនគ្រប់គ្រាន់ ត្រូវបន្ថែមមុខរបរស៊ីឈ្នួលធ្វើជាងផ្សារដែក និងជួសជុលគ្រឿងយន្តឲ្យគេ តែបច្ចុប្បន្ននេះសុខភាពមាន អាការៈកាន់តែធ្ងន់ធ្ងរ ពុំអាចប្រកបមុខរបរស៊ីឈ្នួលផ្សារដែកបានទៀតទេ ដោយសារឈឺចុកចាប់ក្នុងខ្លួនដោយអាការះរើមុខរបួសចាស់ដោយបៀមជាប់អំបែងគ្រាប់នៅក្នុងខ្លួន ជាពិសេសឈឺចាក់ដោតមកផ្នែកឆ្អឹងខ្នង បណ្តាលឲ្យរងទុក្ខនិងការឈឺចាប់។
ទើបក្នុងថ្ងៃនេះ ឯកឧត្តម សោម ស៊ុន ដឹកនាំសហការីចុះមកសិក្សាជីវភាពរស់នៅរបស់ គ្រួសារអតីតយុទ្ធជនដល់លំនៅដ្ឋាន ដើម្បីរាយការណ៍ជូនទៅថ្នាក់លើ ក្នុងឱកាសសំណេះសំណាលសាកសួរសុខទុក្ខនេះ ក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានផ្ដល់ជូនគាត់នូវអង្ករចំនួន៥០គីឡូក្រាម មីយើងមួយកេស ទឹកត្រីទឹកស៊ីអ៊ីវពីរយួរ និងថវិកាចំនួន ៥០.០០០៛ផងដែរ និងបានណែនាំឲ្យថែរក្សាសុខភាព ពិសារអាហាចំណីឲ្យមានការប្រុងប្រយ័ត្ន លេបថ្នាំតាមវេជ្ជបណ្ឌិតណែនាំ ចៀសវាងបង្ករ ឲ្យខូចសុខភាពកាន់តែធ្ងន់ធ្ងរ ។
