កំពង់ធំៈ គ្រួសារអតីតយុទ្ធជនចំនួន២គ្រួសារ ជួបនឹងការលំបាក ត្រូវបានសមាគមអតីតយុទ្ធជនកម្ពុជា បានចុះជួយដោយស្រាយបានទាន់ពេលវេលា ទីណាមានគ្រួសារអតីតយុទ្ធជនរងទុក្ខ ទីនោះមានសមាគមអតីតយុទ្ធជនកម្ពុជា ប្រសាសន៍នេះ ត្រូវបានឯកឧត្តម ឧត្តមសេនីយ៍ សោម ស៊ុន ថ្លែងក្នុងពិធីចុះសួរសុខទុក្ខគ្រួសារអតីតយុទ្ធជន។
ក្រៅពីការងារស្នូលរបស់អង្គភាព ឯកឧត្តម ឧត្តមសេនីយ៍ សោម ស៊ុន ប្រធានសមាគមអតីតយុទ្ធជនកម្ពុជាបានបន្តដឹកនាំសហការីចុះសួរសុខទុក្ខ គ្រួសារអតីតយុទ្ឋជនចំនួន ២ គ្រួសារក្នុងនោះមានប្រជាពលរដ្ឋជួបការលំបាកខ្វះខាតមួយគ្រួសារផងដែរ រស់នៅភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ នៅល្ងាចថ្ងៃទី០៣ខែសីហាឆ្នាំ២០១៧។
លោក នាយចំណង់ ឈឹម លី អាយុ៥១ឆ្នាំ ជាអតីតយុទ្ធជននៅអង្ភភាពវរសេនាតូចលេខ១៥ កងទ័ពជើងទឹក ចូលបម្រើក្នុងជួរកងទ័ព នៅថ្ងៃទី០៨ខែសីហាឆ្នាំ១៩៩២ ហើយត្រូវបានដាក់ឲ្យចូលនិវត្តន៍នៅឆ្នាំ២០១២ មានភរិយានិង កូនចំនួន៤នាក់ កូនមានគ្រួសារមួយនាក់ នៅសល់កូនបីនាក់នាក់ទៀតរស់នៅក្នុងបន្ទុក ភរិយាលោក ឈឹម លី មានមុខរបរលក់ដូរបន្តិចបន្តួច គ្រាន់បានប្រាក់កម្រៃខ្លះចិញ្ចឹមជីវិតនិងកូនៗ ។
ដោយឡែក លោកយាយវែន ធីរ៉ាន់ អាយុ ៦១ឆ្នាំ មានស្វាមីឈ្មោះ សោម គុច អតីតជាមន្ត្រីនៃមន្ទីរវប្បធម៍ បានទទួលមរណភាព រយះពេលបីឆ្នាំហើយ ដោយបន្សល់ទុកកូន និងចៅៗចំនួន១២នាក់ឲ្យគាត់ចិញ្ចឹម លោកយាយ វែន ធីរ៉ាន់ ដើររើសអេតចាយលក់ដើម្បីរកប្រាក់សម្រាប់ចិញ្ចឹមកូននិងចៅៗ រួមទាំង លោកយាយគ្រួសារនេះមានសមាជិកទាំងអស់១៣នាក់ បច្ចុប្បន្នរស់នៅសែនលំបាកក្រែងលែងរកព្រឹកខ្វះល្ងាច ។
ឯកឧត្តម ឧត្តមសេនីយ៍ សោម ស៊ុន មេបញ្ជាការតំបន់ប្រតិបត្តិកសរសឹករងកំពង់ធំ បានមានប្រសាសន៍ថា ដោយបានអនុវត្តតាមការណែនាំរបស់ ឯកឧត្តម នាយឧត្តមសេនិយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា បានចង្អុលបង្ហាញឲ្យយកចិត្តទុកដាក់មកលើ អតីតយុទ្ធជន និងប្រជាពលរដ្ឋ ដែលមានជីវភាពក្រីក្រ ជួបនូវភាពខ្វះខាត ដោយមិនមានការរើសរអើងនោះឡើយ តែនិងមើលថែគ្រួសារ អតីតយុទ្ធជពិសេសបំផុត នៅក្នុងថ្ងៃនេះផងដែរ បានឧបត្ថម្ភក្នុងមួយគ្រួសារ នូវអង្ករចំនួន៥០គីឡូក្រាម មីយើងមួយកេស ទឹកត្រីទឹកស៊ីអ៊ីវពីរយួរ និងថវិកាចំនួន ៥០.០០០៛ ។
ក្រុមគ្រួសារទាំងពីរ មានចិត្តរំភើបរកអ្វីប្រៀបផ្ទឹមពុំបានឡើយ និងសូមគោរពថ្លែងអំណរគុណដ៍ជ្រាលជ្រៅបំផុតចំពោះសម្តេចតេជោ ហ៊ុនសែន ដែលបានបង្កើតឲ្យមានសមាគមអតីតយុទ្ធជនកម្ពុជាខេត្ត សម្រាប់ចុះជួយដោះស្រាយដល់ការលំបាកខ្វះខាតរបស់គ្រួសារគាត់ ហើយប្តេជ្ញាចិត្តគោរពគាំទ្រសម្តេចជារៀងរហូត ។ ប៊ុន រដ្ឋា
