កំពង់ធំៈ សមាគមអតីតយុទ្ធជនខេត្តកំពង់ធំ បានបន្តចុះធ្វើសកម្មភាពមនុស្សធម៌ ចុះសួរសុខទុក្ខ លោក ស៊ិន ស៊ីណាត ជាគ្រួសារអតីតយុទ្ធជន ជាជនពិការ ដែលកំពុងតែជួបការលំបាក រស់នៅភូមិក្តី សង្កាត់ ព្រៃតាហ៊ូ ក្រុងស្ទឹងសែន ខេត្តកំពង់ធំនៅល្ងាចថ្ងៃទី២១ខែសីហាឆ្នាំ២០១៧ ។
លោក វរសនីយត្រី ស៊ិន ស៊ីណាត អាយុ៥៤ ឆ្នំា ជាអតីតយុទ្ធជន បានធ្លាក់ខ្លួនរបួសពិការពិការជើង ក្នុងសមរភូមិបវឹល នៅខេត្តបាត់ដំបង ក្នុងឆ្នាំ១៩៨៩ ដោយមានភរិយាឈ្មោះ អ៊ិន លីដា មានកូនចំនួន៤ នាក់ បច្ចុប្បន្ន កូនពីរនាក់មានគ្រួសារហើយ រីឯកូនតូចៗ០២ នាក់ទៀតរស់នៅក្នុងបន្ទុក ស្ថានភាពគ្រួសារកំពុងជួបការលំបាក រស់នៅក្នុងខ្ទមស្លឹកធ្លុះធ្លាយតូចចង្អៀត ក្បែរលូទឹកស្អុយ ខាងជើងផ្សារចាស់នៃខេត្តកំពង់ធំ លោកស៊ិន ស៊ីណាត អតីតធ្លាប់ជាមន្ត្រីនៃរតនាគារខេត្តកំពង់ធំ បានទទួលប្រាក់បៀវត្សប្រចាំខែដែលរាជរដ្ឋាភិបាលផ្តល់ជូនគាត់ក្នុងមួយខែចំនួន៨០០.០០០៛ ផងដែរ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីយុទ្ឋជនកម្ពុជាខេត្ត ព្រមទាំងក្រុមការងារបានពាំនាំនូវអំណោយរបស់សម្ដេចតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងប្រធានសមាគមអតីយុទ្ឋជនកម្ពុជា មកឧបត្ថម្ភជូននូវ អង្ករចំនួន៥០គីឡូក្រាម មីម៉ាម៉ាមួយកេស ទឹកត្រីទឹកស៊ីអ៊ីវពីរយួរ និងថវិកាចំនួន ១០០.០០០៛ តាមរយះសមាគមខេត្ត ។
លោក ស៊ិន ស៊ីណាត និងក្រុមគ្រួសារ បានគោរពថ្លែងអំណរគុណចំពោះសម្តេចតេជោហ៊ុន សែន ដែលជានិច្ចកាលសម្តេចតែងតែយកចិត្តទុកដាក់គិតគូរដល់សុខទុក្ខនិងជីវភាពរស់នៅរបស់អតីតយុទ្ធជននិងសូមប្តេជ្ញាចិត្តបន្តគាំទ្រសម្តេចតេជោសម្តេចជារៀងរហូត ។
ដោយ ប៊ុន រដ្ឋា
