ត្បូងឃ្មុំៈ បុរសម្នាក់ត្រូវបានកម្លាំងជំនាញនៃអធិការដ្ឋាននគរបាលក្រុងសួង សហការណ៍ជាមួយប៉ុស្តិ៍រដ្ឋបាលសង្កាត់វិហារលួង ធ្វើការចាប់ឃាត់ខ្លួន បន្ទាប់ពីម្ចាស់ទ្រព្យសម្បត្តិបានយករូបភាព នៅលើកាមេរ៉ាសុវត្ថិភាព មកបង្ហាញជាវត្ថុតាំង ដោយជនសង្ស័យបានធ្វើសកម្មភាពគាស់ផ្ទុះចូលលួចយកប្រាក់អស់ជិត០៩លានរៀល កាលពីវេលាម៉ោង០២ និង០២នាទីរំលងអាធ្រាត្រ ឈានចូលថ្ងៃទី២២ ខែសីហា ឆ្នាំ២០១៧ ស្ថិតក្នុងភូមិជ្រួយ សង្កាត់វិហារលួង ក្រុងសួង ខេត្តត្បូងឃ្មុំ។
សមត្ថកិច្ចបានឲ្យដឹងថា ជនរងគ្រោះមានឈ្មោះ ហេង សុខឃន់ ភេទស្រី អាយុ៤១ឆ្នាំ មានទីលំនៅស្ថិតនៅក្នុងភូមិ-ឃុំកើតហេតុខាងលើ ដោយត្រូវជនសង្ស័យឈ្មោះ ម៉ា រ៉េន ភេទប្រុស អាយុ៥១ឆ្នាំ ជាតិខ្មែរ រស់នៅក្នុងភូមិជីកែ សង្កាត់សួង ក្រុងសួង បានធ្វើសកម្មភាពគាស់ផ្ទុះចូលលួចយកប្រាក់អស់ចំនួន០៧លាន និង០៦សែនរៀល និងប្រាក់ដុល្លារចំនួន២៧០$ ខណៈពេលដែលជនរងគ្រោះកំពុងតែសម្រាកនៅក្នុងបន្ទប់គេងរបស់ខ្លួន។
សមត្ថកិច្ចបានបន្តថា ក្រោយពីធ្វើសកម្មភាពលួចរួចជនសង្ស័យបានរត់គេចខ្លួនបាត់ ដោយយោងតាមពាក្យបណ្ដឹងរបស់ជនរងគ្រោះ ដែលបានយករូបភាពនៅក្នុងកាមេរ៉ាសុវត្ថិភាពមកបង្ហាញផង ទើបងាយស្រួលក្នុងការតាមចាប់ខ្លួនជនសង្ស័យបានយ៉ាងឆាប់រហ័សបែបនេះ ព្រមទាំងធ្វើការដកហូតបាននូវវត្ថុតាង ប្រាក់ដែលចោរលួចយកទៅ បានមកវិញគ្រប់ចំនួនផងដែរ។
បច្ចុប្បន្ន ជនសង្ស័យត្រូវបានបញ្ជូនទៅកាន់អធិការដ្ឋាននគរបាលក្រុងសួង ដើម្បីកសាងសំណុំរឿងបញ្ជូនទៅសាលាដំបូងខេត្តត្បូងឃ្មុំ ចាត់ការបន្តតាមនីតិវិធីច្បាប់ ៕
