កំពង់ធំៈ ក្រុមគ្រួសារអតីតយុទ្ធជនពលី ដែលបានមរណៈភាពដោយសារបុព្វហេតុ ការពារជាតិមាតុភូមិ ត្រូវបានយកចិត្តទុកដាក់ ពីសមាគមអតីតយុទ្ធជនខេត្ត នាំអំណោយមកចែកជូន ក្នុងឳកាសចុះសួរសុខទុក្ខ នៅល្ងាចថ្ងៃទី២៤ ខែសីហា ឆ្នាំ២០១៧។
ពីមួយថ្ងៃទីមួយថ្ងៃគេសង្កេតឃើញ ពីសកម្មភាពមនុស្សធម៌ ដែលបានកើតចេញពីសមាគមអតីតយុទ្ធជនកម្ពុជា ខេត្តកំពង់ធំ ដោយពុំមានថ្ងៃឈប់សម្រាក ដោយបានឆ្លៀតឳកាសចុះសិក្សាពីវិធីជីវិតរស់នៅរបស់ អតីតយុទ្ធជន ឲ្យដឹងពីសុខទុក្ខរបស់ក្រុមគ្រួសារអតីតយុទ្ធជន ក៏ដូចជាប្រជាពលរដ្ឋទីទាល់ក្រ ដើម្បីផ្តល់ នឹងលើកទឹកចិត្ត និងផ្សះផ្សារភាពជិតស្និទ្ធរវាងកងកម្លាំងនិងប្រជាពលរដ្ឋ។
នៅក្នុងឳកាសនៃការចុះសួរសុខទុក្ខ គ្រួសារអតីតយុទ្ធជនពលី ឈ្មោះ សាំង យឿន អាយុ៥០ឆ្នំា មានកូនចំនួន៦ នាក់ កូនពីរនាក់មានគ្រួសារហើយ នៅសល់កូន៤នាក់ រស់នៅក្នុងបន្ទុក បច្ចុប្បន្នរស់នៅភូមិ ឥន្ទកុមា ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ត្រូវបានដឹកនាំសហការីដោយ ឯកឧត្តម ឧត្តមសេនិយ៍ត្រី សោម ស៊ុន ប្រធានសមាគមន៍អតីតយុទ្ធជនកម្ពុជាខេត្តកំពង់ធំ បានផ្ដល់ជូនគាត់នូវអង្ករចំនួន៥០ គីឡូក្រាម មីម៉ាម៉ា មួយកេស ទឹកត្រីទឹកស៊ីអ៊ីវពីរយួរ និងថវិកាចំនួន៦០.០០០៛។
ឯកឧត្តម ឧត្តមសេនិយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា ក្នុងនាមយើងខ្ញុំជា ប្រធានសមាគមន៍អតីតយុទ្ធជនកម្ពុជាខេត្តកំពង់ធំ មិនអាចមិនឈឺឆ្អាលចំពោះក្រុមគ្រួសារអតីតយុទ្ធជនបានទេ ទុក្ខព្រួយរបស់អតីតយុទ្ធជន គឺទុក្ខរបស់សមាគមអតីតយុទ្ធជន ប្រជាពលរដ្ឋជួបនិងការលំបាក គឺជាទុក្ខព្រួយរបស់អាជ្ញាធរ មានភារកិច្ចមើលថែរ ដោយមិនអោយប្រជាពលរដ្ឋណាម្នាក់ស្លាប់ដោយសារមិនបានដឹងពីអាជ្ញាធរនោះឡើយ ក្នុងនោះដែរឯកឧត្តម សោម ស៊ុន បាន បញ្ជាក់ថា ដោយយោងតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងជាប្រមុខដឹកនាំប្រទេស បានតម្រូវឲ្យអាជ្ញាធរចុះ និងសមាគមអតីតយុទ្ធជន ចុះសួរសុខទុក្ខនិងផ្តលសម្ភារៈអំណោយជូនដល់ពលរដ្ឋក្រីក្រ ជួបការលំបាក ជួបមួយគ្រួសារជូនមួយគ្រួសារ ជួប២គ្រួសារគឺជួយ២គ្រួសារ ដោយមិនចាំបាច់រងចាំប្រមូលគ្នានោះឡើយ ដោយសារតែសេចក្តីស្រេចឃ្លានមិនបានរងចាំនោះឡើយ។
ដោយ ប៊ុន រដ្ឋា 
