កំពង់ចាម: លំនៅឋានប្រជាពលរដ្ឋ១ខ្នង រួមជាមួយទ្រព្យសម្បត្តិជាច្រើន ត្រូវបានអគ្គីភ័យលេបត្របាក់គ្មានសល់ គ្រាដែលម្ចាស់ផ្ទះបានដាំបាយ ហើយមិនបានពន្លត់ភ្លើងក្នុងចង្ក្រានឲ្យអស់ រួចបានចាកចេញទៅច្រូតស្មៅគោ។
ហេតុការណ៍នេះបានកើតមានឡើងកាលពីវេលាម៉ោង៩នឹង៣០នាទីព្រឹក ថ្ងៃទី២៥ ខែសីហា ឆ្នាំ២០១៧ នៅភូមិទី១១ ឃុំព្រែកតានង់ ស្រុកកោះសូទិន ខេត្តកំពង់ចាម។
អធិការនគរបាលស្រុកកោះសូទិន លោកប្រេង ហ៊ីម បានអោយដឹងថា ក្នុងហេតុការណ៍នេះ លោកបានញ្ជាឲ្យកងកម្លាំងនគរបាលស្រុក សហការណ៍ជាមួយកម្លាំងប៉ុស្តិ៍នគរបាលរដ្ឋបាលព្រែកតានង់ បានយករថយន្តពន្លត់អគ្គីភ័យ ទៅជួយអន្តរាគមន៍ តែដោយភូមិសាស្ត្រនៅតំបន់នោះទឹកលិច និងរថយន្តមិនអាចចូលទៅដល់ ដូច្នេះខាងកម្លាំងប៉ុស្តិ៍ព្រែកតានង់ និងបងប្អូនប្រជាពលរដ្ឋ បានយកទឹកជួយពន្លត់ដែរ ប៉ុន្តែដោយសារអំណាចភ្លើងខ្លាំងពេក បានឆាបឆេះផ្ទះនោះ អស់ទាំងស្រុងតែម្តង។
លោកអធិការបានបន្តថា ជនរងគ្រោះក្នុងករណីអគ្គីភ័យនេះមានឈ្មោះ សឹម សាន់ អាយុ៦៦ឆ្នាំ និងប្រពន្ធឈ្មោះ ស្រេន សំ អាយុ៦១ឆ្នាំ ដែលផ្ទះមានទំហំ០៦x០៩ម៉ែត្រ ធ្វើអំពីឈើខាងលើ ថ្មក្រោម ប្រក់ក្បឿង ត្រូវឆេះអស់ទាំងស្រុង តែមិនមានរាលដាលដល់ផ្ទះអ្នកជិតខាងឡើយ។ 
លោកអធិការបានបញ្ជាក់ទៀតថា ចំពោះមូលហេតុ ដែលបណ្ដាលឲ្យមានករណីអគ្គីភ័យឆាបឆេះនេះ គឺដោយម្ចាស់ផ្ទះបានដាំបាយ ហើយមិនបានពន្លត់ភ្លើងក្នុងចង្ក្រានឲ្យអស់ មុននឹងចាកចេញទៅរកស្មៅឲ្យគោស៊ី ទើបបណ្តាលឲ្យអគ្គីភ័យឆាបឆេះផ្ទះអស់ទាំងស្រុង និងបាត់បង់ទ្រព្យសម្បត្តិរួមមាន មាសចំនួន៣តំឡឹង តែរកឃើញវិញ១តំឡឹង ប្រាក់ដុល្លារចំនួន៣៥០០$ ប្រាក់រៀល០៤លានរៀល មងចំនួន៥០០ដៃផងដែរ ៕
