កំពង់ធំៈ ស្របពេលដែលជាថ្ងៃ ឧបោសុទ្ឋសីល ឧត្តមសេនិយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានជួបនឹងគ្រួសារ ជនពិការទាំងម្តាយ ទាំងកូនមួយគ្រួសារ មានជីវភាពក្រីក្រ តោកយ៉ាករស់យ៉ាងសែនវេទនា ដោយមានការអាណិតអាសូរ ក៏បាននាំអំណោយមកចែកជូន ដើម្បីជួយ កាត់បន្ថយនិងពន្យាពេលនៃការស្រេចឃ្លានមួយរយះផងដែរ កាលពីព្រឹកថ្ងៃទី ២៩ខែសីហាឆ្នាំ ២០១៧ ។
លោកយាយ ព្រំ ហុក អាយុ ៨៧ ឆ្នំា ជាជនពិការស្វិតដៃជើងជាង៥០ ឆ្នាំហើយ មានកូនប្រុសម្នាក់ឈ្មោះ ស៊ុន តាល់ អាយុ ៥២ ឆ្នំា បានធ្លាក់ខ្លួនពិការ មិនតែប៉ុណ្ណោះមានចៅស្រីម្នាក់ជាជនពិការខាងខួរក្បាលបន្ថែមទៀត រស់នៅសព្វថ្ងៃគឺដោយសារកូនប្រសារ និងចៅ ដើរស៊ីឈ្នួលធ្វើកម្មករ លាងចាន បោកខោអាវ ឬសំអាតតាមផ្ទះ ដើម្បីដូរប្រាក់បន្តិចបន្តួច ដើម្បីចិញ្ចឹមជីវិត និងផ្គត់ផ្គង់ឲ្យកូនបានរៀនសូត្រទៀតផងក្រុមគ្រួសារជនពិការនេះដែលមានចំសមាជិកនួន ៧ នាក់រស់នៅក្នុងបន្ទុក។
លោក ឧត្តមសេនិយ៍ត្រី សោម ស៊ុន បានឲ្យដឹងថា ក្នុងនាមខ្ញុំជាមេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជាខេត្ត គឺមានភាពចាំបាច់ខ្លាំងណាស់ ក្នុងភាពទទួលខុសត្រូវចំនួន ក្រុមគ្រួសារអតីតយុទ្ធជន និងគ្រួសារប្រជាពលរដ្ឋដែលជួបការលំបាក គឺដោយមិនទុកឲ្យគ្រួសារណាអត់បាយដាច់់ពោះស្លាប់នោះទេ បើតែកាលណាដឹងហើយគឺត្រូវតែនាំអំណោយទៅចែក ជូនគ្រួសារនោះ ជាក់ស្តែងក្នុងថ្ងៃនេះផងដែរ ខ្ញុំនឹងសហការី បាននាំអណោយទៅចែកជូនដល់គ្រួសារដែលកំពុងតែជួបការលំបាក គឺជាការធ្វើបុណ្យផង និងជាការជួយសង្រ្គោះប្រជាពលរដ្ឋផង ទោះជាអំណោយតិចតួចក្តី គឺអោយតែបានអោយកុំអោយអត់សោះ សម្រាប់គ្រួសារដែលខ្វះខាតគាត់សប្បាយចិត្តណាស់ ដូចជាគ្រូសារលោកយាយ ព្រំ ហុក នេះជាដើម មួយគ្រួសារពិការបីការស្ទើរតែទាំងអស់ រស់នៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ បានផ្ដល់ជូនគាត់នូវអង្ករចំនួន ៥០ គីឡូក្រាម មីម៉ាម៉ាមួយកេស ទឹកត្រីទឹកស៊ីអ៊ីវពីរយួរ និងថវិកាចំនួន១០០.០០០ ៛ ។
អ្នកមីង សំ ហោ អាយុ៤៥ឆ្នំា ដែលជាភរិយា ស៊ុន តាល់ បានពោលពាក្យបង្កប់នូវភាពអួលដើមករ ក្នុងក្តីរំភើបចិត្តណាស់ ដែលមិននឹកស្មានដល់ថាព្រឹកព្រលឹមឡើងភ្លាម មានថ្នាក់ដឹកនាំតំបន់ប្រតិបត្តិការសឹករងកំពង់ធំ បាននាំអំណោយមកផ្តល់ជូនគាត់ដែលកំពុងតែជួបភាពទីទ័លក្របែបនេះ ហើយក្នុងមួយជីវិតនេះយើងខ្ញុំមិនអាចបំភ្លេចគុណ អ្នកដែលបានជួយដោះស្រាយការលំបាកខ្វះខាតរបស់គាត់បានឡើយ និងសូមជូនពរក្នុងឧកាសថ្ងៃឧបោសុទ្ឋសិលនេះ សូមអស់លោកនិងសហការីព្រមទាំងក្រុមគ្រួសារបានជួបប្រទះតែពុទ្ឋពរទាំងបួនប្រការកុំបីឃ្លៀងឃ្លាតឡើយ ។
ដោយ ប៊ុន រដ្ឋា
