កំពង់ធំៈ សន្និបាតបូកសរុបលទ្ធផលការងារជីករុករកអាដ្ឋិធាតុ កងទ័ពស្ម័គ្រចិត្តវៀតណាម ដែលបានពលីជីវិតក្នុងសម័យសង្គ្រាម នៅកម្ពុជា ក្នុងខេត្តកំពង់ធំ និងខេត្តក្រចេះ ជំហ៊ានទី១៦ ក្នុងរយៈពេល២ថ្ងៃ ៣០,៣១ខែសីហា ឆ្នាំ ២០១៧ ដឹកនាំដោយប្រតិភូយោធា ដោយ ឯកឧត្តម គង់ វិមាន អភិបាលរងខេត្តកំពង់ធំ ប្រធានគណៈកម្មការជំនាញជីកគាស់រុករកអដ្ឋិធាតុកងទ័ពស្ម័គ្រចិត្តវៀតណាម និងឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៃយោធភូមិភាគទី៤ .។
ពិធីប្រជុំជាមួយថ្នាក់ដឹកនាំនៃបញ្ជាការដ្ឋានយោធាខេត្តបិញភឿក មានការចូលរួមពី លោក ឧត្តមសេនីយ៍ត្រី គ្វៀនចៀន អនុប្រធានស្នងការនយោបាយយោធភូមិភាគទី៧ និង លោកង្វៀន ទៀងយ៉ុង អនុប្រធានគណៈកម្មាធិការប្រជាជនខេត្តបិញភឿក នៃសាធារណៈរដ្ឋសង្គមនិយមប្រជាជនវៀតណាម ត្រូវបានបញ្ចប់ដោយជោគជ័យ នៅព្រឹកថ្ងៃទី៣១ខែសីហា ឆ្នាំ២០១៧ នៅសាលប្រជុំគណបញ្ជាការយោធាខេត្តប៊ិញភឿក។
ឯកឧត្តម ឧត្តមសេនីយ៍ត្រី សោម ស៊ុន បានលើកឡើងពីចំនុចខ្លាំង និងចំនុចខ្សោយ ដែលបានជួបបញ្ហានាពេលនេះ ក្នុងការងារជីករុករកអដិ្ឋធាតុរបស់កម្លាំងK70 – K 72 យោធាខេត្តបិញភឿក ដើម្បីជីករុករកអដិ្ឋធាតុ របស់កងទ័ពស្ម័គ្រចិត្តវៀតណាម ដែលបានពលីជីវិត ក្នុងសម័យសង្រ្គាម នៅភូមិសាស្រ្តទឹកដីខេត្តកំពង់ធំ ក្នុងបុព្វហេតុវាយរំដោះប្រជាជនកម្ពុជាឲ្យរួចផុតពី របបប្រល័យពូជសាសន៍ បនក្បត់ប៉ុលពត អៀង សារី ខៀវសំផន នៅលើទឹកដីកម្ពុជា ក្នុងដំណាក់កាលទី១៦ រដូវប្រាំង ឆ្នាំ ២០១៦ និងឆ្នាំ ២០១៧ សរុបអដិ្ឋធាតុដែលជីកបាន នៅលើទឹកដីខេត្តកំពង់ធំ មកដល់ពេលនេះមានចំនួន ១,០៣៦ អដ្ឋិធាតុរួចហើយ និងបានដាក់ការសណ្ឋានថា ចំនួនអដិ្ឋធាតុនៅក្នុងខេត្តកំពង់ធំ មិនទាន់ជីករុករកអស់នៅឡើយទេ ដោយសារតែ ជួបនូវបញ្ហា ប្រជាពលរដ្ឋដែលស្គាល់កន្លែងជីកអដិ្ឋធាតុ មានភាពចាស់ជរា ភ្លេចភ្លាំងស្មារតី ឬស្លាប់ ទីតាំងមួយចំនួនត្រូវបានអភិវឌ្ឍន៍ ទើបជាផលលំបាកដល់ការុករកអដ្ឋិធាតុ ។
នៅក្នុងឳកាសនៃពិធីសន្និបាទ ឯកឧត្តម សោម ស៊ុន បានមានប្រសាសន៍ គ្រោងនឹងបើកសន្និបាទនៅ ក្នុងខេត្តកំពង់ធំ ដោយមានការអញ្ជើញ មេឃុំ មេភូមិ ចៅសង្កាត់ ប៉ុស្តិ៍រដ្ឋបាល កងកម្លាំង និងប្រជាពលរដ្ឋ ដើម្បីសុំកិច្ចសហការជីករុករកអដិធាតុបន្ត ដែលសណ្ឋានថានៅមានសេសសល់ក្នុងភូមិសាស្រ្តខេត្តកំពង់ធំ រួមទាំងបានធ្វើប័ណ្ណសរសើរដល់ពួកគាត់ ដើម្បីលើកទឹកចិត្ត ដែលបានផ្តល់កិច្ចសហការជីករុករកអដ្ឋិធាតុ នៅក្នុងឳកាសចុងក្រោយនៃពិធី ឯកឧត្តម គង់ វិមាន និងឯកឧត្តម សោម ស៊ុន បានផ្តល់នូវភាពជឿជាក់ រួមទាំងបានផ្តល់ការដូរគ្នាទៅវិញទីមកផងដែរ។
ដោយ ប៊ុន រដ្ឋា
