ខេត្តសៀមរាប៖គំនរសម្រាម គរដូចភ្នំ ក្នុងក្រុងសៀមរាប កំពុងដង្ហោយ រករថយន្តដឹក ខណៈប្រជាពលរដ្ឋប្រមាណជាង៣០០នាក់ មកពី៣ភូមិ ក្នុងឃុំ ត្រពាំងធំ ស្រុកប្រាសាទបាគង ខេត្តសៀមរាប បានរារាំងបិតផ្លូវ មិនឱ្យរថយន្តដឹកសម្រាម របស់ក្រុមហ៊ុន ហ្គា អ៊ីយ៉ា ភីអិលស៊ី ចូលទៅកាន់ទីលាន ដើម្បីចាក់សម្រាមនោះ ប៉ុន្តែត្រូវបានអាជ្ញាធរខេត្តសៀមរាប អន្តរាគមន៍ បញ្ជាទៅឱ្យអភិបាលស្រុក និង សមត្ថកិច្ច ស្រុកប្រាសាទបាគង ដោះ
ស្រាយបើកផ្លូវ វាយសោរ ហើយឱ្យរថយន្តដឹកសម្រាមចូលទៅកាន់ទីលានចាក់សម្រាម រួចរាល់ ហើយ នាល្ងាចថ្ងៃសៅរ៍ ទី២ខែ កញ្ញាឆ្នាំ២០១៧នេះ។
សូមបញ្ជាក់ថា នៅក្នុងក្រុងសៀមរាប រយៈពេលប៉ុន្មានថ្ងៃចុងសប្តាហ៍កន្លងមកនេះ គំនរសម្រាមរង់ចាំការដឹកជញ្ជូនចេញទៅកាន់ទីលានចាត់សម្រាម ខណៈដែលត្រូវបានកកស្ទះ ដោយសារតែមានប្រជាពលរដ្ឋនៅទីលានចាក់សម្រាម ប្រមាណជាង៣០០នាក់ បាននាំគ្នាបិទផ្លូវច្រកចូល ជាប់របង ប៉ុស្តិ៍នគរបាលរដ្ឋបាលត្រពាំងធំ ដើម្បីរារាំងមិនឱ្យរថយន្តដឹកសម្រាម របស់ក្រុមហ៊ុន ហ្គា.អ៊ី.យ៉ា ភីអិលស៊ី (GAEA Plc ) ចូលទៅកាន់ទីលានចាក់សម្រាមនោះទេ។ 
ប្រជាពលរដ្ឋទាំងនោះ ដែលមកពី ៣ភូមិ ក្នុងនោះមាន៖ ភូមិអន្លង់ពីរ ភូមិភ្នំដី និង ភូមិ រការកំបុត ក្នុង ឃុំត្រពាំងធំ ស្រុកប្រាសាទបាគង ខេត្តសៀមរាប ហើយទីលានចាក់សម្រាមនោះ ស្ថិតនៅចន្លោះភូមិទាំង៣នេះ ក្នុងទំហំប្រហែលជិត ៣ ហិចតា ។
លោកស្រី ក្លែរ ប្រូម៉េ នាយិកាក្រុមហ៊ុនប្រមូលសម្រាម ហ្គា.អ៊ី.យ៉ា បានបកស្រាយអំពីការតវ៉ាបិទផ្លូវរថយន្តដឹកជញ្ជូនសំរាមរបស់ ក្រុមហ៊ុន ហ្កា.អ៊ី.យ៉ា ដោយបញ្ជាក់ថា ប្រជាពលរដ្ឋទាំងនោះ គឺជាអ្នករើសសម្រាមនៅទីនោះយូរឆ្នាំមកហើយ ប៉ុន្តែ ពួកគាត់បានបិទផ្លូវចូលទៅកាន់ទីលានចាក់សម្រាមនោះ តាំងពីថ្ងៃទី២៩ ខែសីហា កន្លងទៅនេះ ដែលធ្វើឱ្យប៉ះពាល់ដល់ការប្រមូល និងដឹកជញ្ជូនសំរាមនៅក្នុងក្រុងសៀមរាប ។ លោកស្រីបញ្ជាក់ថា មូលហេតុដែលនាំឱ្យមានបញ្ហាបិទផ្លូវនេះ គឺដោយសារតែក្រុមហ៊ុន ហាមឃាត់ និងបញ្ឈប់ពួកគាត់មិនឱ្យរើសសម្រាមនៅទីនោះបន្តទៀត ។
លោកស្រី បញ្ជាក់បន្ថែមថា ក្រុមហ៊ុន ហ្កា.អ៊ី.យ៉ា បានធ្វើការវិនិយោគនៅក្នុងគំរោង ដើម្បីអភិវឌ្ឍទីលានចាក់សំរាមសុវត្ថិភាព ដែលគោរពដល់បរិស្ថាន បទដ្ឋានសុខភាព និង សុវត្ថិភាព ដើម្បីជាគុណប្រយោជន៍ដល់សហគមន៍ ។ គំរោងរបស់ក្រុមហ៊ុន ត្រូវបានឆ្លងកាត់ការសិក្សាវាយតម្លៃហេតុប៉ះពាល់បរិស្ថាន និង សង្គម (EIA) ហើយអនុលោមតាមអនុសាសន៍ណែនាំរបស់អាជ្ញាធរគ្រប់លំដាប់ថ្នាក់ ។ នៅក្នុងគំរោងនេះ ការហាមឃាត់មិនឱ្យអ្នកដទៃចូលទីលានចាក់សំរាម គឺជាគោលការណ៍នៃបទដ្ឋានសុខភាព និងសុវត្ថិភាពនៅក្នុងទីលាន ។
លោកស្រី បង្ហាញគោលការណ៍ដំណោះស្រាយរបស់ក្រុមហ៊ុន យ៉ាងដូច្នេះថា កាលពីអំឡុងខែកក្កដា ឆ្នាំ២០១៦ ( ឆ្នាំមុន ) ក្រុមហ៊ុនបានជូនដំណឹងជាផ្លូវការដល់អ្នករើសសំរាមដែលកាលណោះ មានចំនួនប្រមាណតែ ១០០នាក់ អំពីការហាមឃាត់ចូលទីលានដែលជាកម្មសិទ្ធិឯកជនរបស់ក្រុមហ៊ុន ហើយក្រុមហ៊ុនបានផ្ដល់ឱកាសឱ្យពួកគាត់ចូលធ្វើការនៅក្នុងក្រុមហ៊ុនផងដែរ ដោយផ្តល់ប្រាក់ខែ ចាប់ពី១២០ទៅ ១៦០ ដុល្លារអាមេរិក នឹងក្រុមហ៊ុនទទួលបន្ទុកផ្ដល់អាហារហូបចុក ការស្នាក់នៅ និងការធ្វើដំណើរ ទៀតផង ប៉ុន្តែគោលការណ៍នេះ ត្រូវបរាជ័យ រហូតដល់ពេលនេះ។លោកស្រីបានបញ្ជាក់បន្ថែមទៀតថា សម្រាមដែលត្រូវដឹកជញ្ជូនចេញពីក្នុងក្រុងសៀមរាប ក្នុង១ថ្ងៃៗ បរិមាណប្រហែលជា ២៧០ តោន ។
ចំណែក លោក ភូ សំអាត អភិបាលស្រុកប្រាសាទបាគង បានប្រាប់នៅល្ងាចថ្ងៃទី២ខែកញ្ញាឆ្នាំ២០១៧ យ៉ាងដូច្នេះថា ៖ក្រុមហ៊ុន ចាក់សម្រាម បានហាមឃាត់មិនឱ្យប្រជាពលរដ្ឋរើសសម្រាម ក្នុងទីលានចាក់សម្រាមនោះ ប៉ុន្តែពួកគាត់ចង់ រើសសម្រាម ដូចកាលពីមុន មិនមានផលប៉ះពាល់ដល់ពួកគាត់ឡើយ។លោកបានបន្តថា ក្រុមហ៊ុនបានផ្សព្វផ្សាយ ពីបញ្ហាមិនឱ្យមានការរើសសម្រាម នៅទីនេះ ហើយក្រុមហ៊ុនបានបង្វែរ ឱ្យបងប្អូន មានការងារធ្វើ ដោយយកទៅធ្វើការនៅក្រុមហ៊ុន ឱ្យបោស សម្រាម ឬ ប្រមូលសម្រាម ដដែល ប៉ុន្តែបងប្អូនប្រជាពលរដ្ឋយើង បានលើកហេតុផលថា កាលណាទៅធ្វើការត្រូវស៊ីប្រាក់ខែគេ ហើយធ្វើការឱ្យគេពេញម៉ោងទៀត ដែលគាត់រើសសម្រាម គឺជាគោលការបន្ទាប់បន្សំ ទេ បើគាត់មានពេលទំនេរ គាត់និងមករើស មកគាត់គ្មានពេលទំនេរទេ គឺគាត់ធ្វើស្រែចំការរបស់គាត់។ លោកបានបន្ថែមថា អន្លង់សម្រាមនេះ គឺវាអត់ត្រូវស្តង់ដា បច្ចេកទេសដែលទប់ស្កាត់ផលប៉ះពាល់ របស់គាត់ទេ ហើយនៅចម្ងាយពីភូមិប្រជាពលរដ្ឋប្រហែលជា១០០ម៉ែត្រ ពីភូមិ អន្លង់២ និង ភូមិភ្នំដី ហើយបងប្អូនប្រជាពលរដ្ឋនៅទីហ្នឹង ពីមុនគាត់រងផលប៉ះពាល់ ប៉ុន្តែគាត់មិនដឹងរកស៊ីប្រកបមុខរបររើស សម្រាមអីទេ ប៉ុន្តែកន្លង ឃើញបានផល ពួកគាត់ក៏ផ្តេកផ្តួល ពីផលប៉ះពាល់ ហ្នឹង ក៏នាំគ្នាមករើសសម្រាម ដើម្បីបានទទួលផលសម្រាមខ្លះទៅ ហើយប្រជាពលរដ្ឋ កាលពីឆ្នាំដំបូង មុនមានអ្នករើស សម្រាមហ្នឹងតិច ទេ ប៉ុន្តែដល់ក្រោយមក បរិមាណសម្រាមមកពីក្នុងក្រុងមានការកើនឡើង ហើយប្រជាពលរដ្ឋក៏នាំគ្នាចូលទៅកាន់តែច្រើន មកដល់សព្វថ្ងៃខ្ញុំមិនដឹងទួរលេខច្បាស់ទេ ប្រហែល៣០០នាក់ មកពីភូមិអន្លង់២ ភូមិភ្នំដី និងភូមិរការកំបុត ខ្លះ ប៉ុន្តែមកពីចម្ងាយត
