កំពង់ធំៈ ក្រោមការយកចិត្តទុកដាក់ របស់មេបញ្ជាការតំបន់ប្រតិបត្តិការសឹករងកំពង់ធំ មានការព្រួយបារម្ភណ៍ពីសុវត្តិភាព ប្រជាពលរដ្ឋ ក្នុងអំឡុងពេលបុណ្យកាន់បិណ្ឌ និងបុណ្យភ្ជុំបិណ្ឌ ទើបមានការ កោះប្រជុំជាបន្ទាន់ ដើម្បីប្រគល់តួនាទីភារកិច្ច ទទួលខុសត្រូវតាមគោលដៅនីមួយៗ ដល់ថ្នាក់ដឹកនាំ គ្រប់បណ្តាកងឯកភាព ចំណុះឲ្យតំបន់ប្រតិបត្តិការសឹករងកំពង់ធំ។
កិច្ចប្រជុំនេះ ត្រូវបានឯកឧត្ត្ម ឧត្តមសេនីយ៍ត្រី សោម ស៊ុន មេបញ្ជាការដ្ឋានតំបន់ប្រតិបត្តិការសឹករងកំពង់ធំ សង្កត់ធ្ងន់ទៅលើបញ្ហាសន្តិសុខ សុវត្តិភាព ជូនប្រជាពលរដ្ឋ នៅក្នុងរដូវបុណ្យភ្ជុំបិណ្ឌនេះ ឲ្យគ្រប់ បណ្តាកងឯកភាព វរសេនាតូច និងផ្នែកសឹករងស្រុក ក្រុង មានភាពទទួលខុសត្រូវ និងសហការជាមួយ នឹងកងកម្លាំងប្រដាប់អាវុធ ប៉ូលិស ប៉េអ៊ឹម និងអាជ្ញាធរ ការពារឲ្យបាន នូវសន្តិសុខ និងសុវត្តិភាពចរាចរណ៍ ចោរលួច ចោរប្លន់ និងបទល្មើសផ្សេងៗ ពិធីនេះ បានធ្វើនៅព្រឹកថ្ងៃទី០៧ ខែកញ្ញា ឆ្នាំ២០១៧។
ឧត្តមសេនីយ៍ត្រី សោម ស៊ុន បានប្រសាសន៍ថា នេះគឺជាការងារចាំបាច់បំផុត ការពារឲ្យបាននិងត្រូវយកចិត្តទុកដាក់ ចំពោះសុវត្តិភាព សន្តិសុខសណ្តាប់ធ្នាប់ក្នុងភូមិសាស្ត្រខេត្តកំពង់ធំ ដោយទុក្ខព្រួយរបស់ប្រជាពលរដ្ឋ គឺជាទុក្ខព្រួយរបស់អាជ្ញាធរ ប្រជាពលរដ្ឋមានសេចក្តីសុខ អាជ្ញាធរសប្បាយចិត្ត ប្រជាពលរដ្ឋមានទុក្ខ អាជ្ញាធរក៏ដេកមិនលក់នោះទេ ដូច្នេះសុំសំណូមពរ គ្រប់កងឯកភាពទាំងអស់ ជួយផ្សព្វផ្សាយឲ្យមានការប្រុងប្រយ័ត្ន ក្នុងអំឡុងរដូវបុណ្យភ្ជុំបិណ្ឌ ឲ្យចូលរួមការពារ ទ្រព្យសម្បត្តិខ្លួនឯង ដោយ ពន្លត់ភ្លើងធូបទាន និងភ្លើង ចង្រ្កាន មុននឹងចាកចេញពីផ្ទះ ខ្លាចក្រែងបង្ករឲ្យមានអគ្គីភ័យកើតឡើង ។
ក្នុងឳកាសជាមួយគ្នានេះ ឧត្តមសេនីយ៍ត្រី សោម ស៊ុន បានឲ្យកងកម្លាំងទាំងអស់ ត្រៀមខ្លួនជាស្រេចគោរពតាមបទបញ្ជារបស់ថ្នាក់លើ ដើម្បីបង្ក្រាបជនទាំងឡាយណាដែលបង្ករចលាចលនាំឲ្យប៉ះពាល់ដល់សន្តិសុខជាតិ និងបំផ្លាញនូវសន្តិភាពដែលកំពុងមានដូចបច្ចុប្បន្ននេះ ដើម្បីការពារឲ្យបាននូវភាពសុខសាន្ត ជូនប្រជាជនយើង ។
ដោយ ប៊ុន រដ្ឋា
