សៀមរាបៈ បន្ទាប់ពីកិច្ចប្រជុំថ្នាក់រដ្ឋមន្រ្តីកសិកម្មនៃមហាអនុតំបន់ទន្លេមេគង្គត្រូវបានបញ្ជប់ប្រកបដោយជោគជ័យនៅក្រុងសៀមរាប នារសៀលថ្ងៃទី០៨ ខែកញ្ញា ឆ្នាំ២០១៧នេះ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និង នេសាទនៃប្រទេសកម្ពុជា និង លោក Ramesh Subramaniam អគ្គនាយក នៃ អគ្គនាយកដ្ឋានអាស៊ីអាគ្នេយ៍ របស់ ធនាគារអភិវឌ្ឍន៍អាស៊ី ( ADB ) បានបង្ហាញ នូវសេចក្តីថ្លែងការណ៍ និង បើកឲ្យមានវេទិកាសំណួរ ចម្លើយ ជាមួយអ្នកសារព័ត៌មាន ផងដែរ ។ 
ឯកឧត្តម វេង សាខុន លើកបង្ហាញថា ៖ កិច្ចប្រជុំរដ្ឋមន្រ្តីក្រសួងកសិកម្មនៃមហាអនុតំបន់ទន្លេមេគង្គលើកទី២ ( MMA-2 ) គឺដើម្បីពង្រីកបន្ថែមទៀត នូវ កិច្ចសហប្រតិបត្តិការណ៍ វិស័យកសិកម្មក្នុងតំបន់ និង អនុម័តផែនការយុទ្ធសាស្រ្តអភិវឌ្ឍវិស័យកសិកម្មថ្នាក់តំបន់ និង ផែនការសៀមរាប ( ២០១៨-២០២២ ) ។ ផែនការយុទ្ធសាស្រ្តនេះ ត្រូវបានផ្តល់ក្របខ័ណ្ឌថ្មីមួយ សម្រាប់អភិវឌ្ឍន៍ខ្សែសង្វាក់តម្លៃផលិតផលកសិកម្ម ប្រកបដោយសុវត្ថិភាព និង ភាតរបរិស្ថាន ។
ឯកឧត្តមបញ្ជាក់ថា ទាំងនោះគឺជាយុទ្ធសាស្រ្តមួយដែលនឹងត្រូវបានបង្កើនការសម្របសម្រួល និងកិច្ចសហប្រតិបត្តិការក្នុងតំបន់ ដើម្បីធ្វើឲ្យមានស្តង់ដាសុវត្ថិភាពស្បៀងដ៏សមស្រប និង បង្កើតជាមជ្ឈមណ្ឌលសម្រាប់អភិវឌ្ឍន៍ខ្សែសង្វាក់ផលិតកម្ម ប្រកបដោយនិរន្តភាព ។ ផែនការសៀមរាប ២០១៨-២០២២ មានទំនាក់ទំនងជាមួយកម្មវិធី កិច្ចសហប្រតិបត្តិការសេដ្ឋកិច្ចនៃមហាអនុតំបន់ទន្លេមេគង្គ តាមរយៈនៃក្របខ័ណ្ឌវិនិយោគថ្នាក់តំបន់ ។ យុទ្ធសាស្រ្ត និង ផែនការសកម្មភាពទាំងនេះ មានគោលបំណងបង្កើតប្រព័ន្ធសុវត្ថិភាពអាហារក្នុងតំបន់ ដោយមានការទទួលស្គាល់ស្តង់ដារវិទ្យាសាស្រ្តទៅវិញទៅមក ការតាមដានរួមគ្នា និងការចែករំលែកព័ត៌មាន ដែលជាពិសេសនោះគឺលើបញ្ជីមុខទំនិញអាហារអនុគ្រោះសំខាន់ៗក្នុងតំបន់ ។
សេចក្តីថ្លែងការរបស់ធនាគារអភិវឌ្ឍន៍អាស៊ី ADB ( លោក Ramesh Subramaniam ) អគ្គនាយក នៃនាយកដ្ឋានអាស៊ីអាគ្នេយ៍ បង្ហាញអំពីគោលជំហរដ៏ជាក់លាក់ថា ធនាគារអភិវឌ្ឍន៍អាស៊ី នឹងបន្តផ្តល់ជំនួយបច្ចេកទេស ដល់បណ្តាប្រទេសមហាអនុតំបន់ទន្លេមេគង្គ គាំទ្រចក្ខុវិស័យមួយ ឲ្យក្លាយជាអ្នកផ្គត់ផ្គង់ផលិតផល ដែលមានសុវត្ថិភាព និង ភាតរបរិស្ថាន ។
លោកបញ្ជាក់ថា ធនធានបច្ចុប្បន្ន សម្រាប់ជំនួយបច្ចេកទេស នៃកម្មវិធីស្នូលគាំទ្រ កសិកម្មជំហានទី២ ដែលហៅថា CASP2 គឺត្រូវបានផ្តល់ឲ្យដោយ ធនាគារអភិវឌ្ឍន៍អាស៊ី រដ្ឋាភិបាលស៊ុយអែត និងមូលនិធិអភិវឌ្ឍន៍ Nordic ហើយក្រុមការងារកសិកម្ម ( WGA ) ដែលមានសមាសភាពជាមន្រ្តីជាន់ខ្ពស់ក្រសួងកសិកម្ម នៃ មហាអនុតំបន់ទន្លេមេគង្គ បានផ្តល់ការត្រួតពិនិត្យ ដល់កម្មវិធីការងាររបស់កម្មវិធីស្នូលគាំទ្រកសិកម្ម ជំហានទី២ ( CASP2 ) ៕ដោយ ប៊ុន រដ្ឋា
