កំពង់ធំៈ ជាការពិតណាស់ពាក្យចាស់លោក ពោលថា ម្តាយមួយចិញ្ចឹមកូន១០ តែបើកូន១០ចិញ្ចឹមម្តាយមួយមិនរស់ តើជាកម្មអកុសល់អ្វី? កូនចំនួន៥នាក់ដាច់ចិត្តចាក់ចោលទ្រនំ ចោលមេបាអស់រយះពេល២០ឆ្នាំ មិន ដែលឃើញមកអើតឲ្យម្តាយស្គាល់មុខនោះទេ ទុកម្តាយចាស់ជរា ដើរសុំទានគេគ្រាន់ចិញ្ចឹមជីវិត និងរស់ដោយការអាណិតអាសូរបស់អ្នកជិតខាងផ្តល់អាហារចំណី លោកយាយចាស់ជរាគ្មានទីពឹង ថ្ងៃនេះបានជួបនឹងអ្នកចិត្តបុណ្យ ចិត្តធម៌សម្បុរស នាំយកអំណោយមកចែកជូនដោយក្តីអាណិតអាសូ ដែលលោកយាយតែងតែ ដង្ហោយហៅរកជំនួយសប្បុរសធម៌ ដើម្បីជួយសង្រ្គោះអាយុជីវិតមុនពេលលោកយាយអស់បុណ្យ ដែលបានរស់នៅ រស់នៅភូមិ ព្រៃតាហ៊ូ សង្កាត់ព្រៃតាហូ៊ ក្រុងស្ទឹងសែន ខេត្តកំពង់ធំ ។
ឯកឧត្តម ឧត្តមសេនីយិ៍ត្រី សោម ស៊ុន មេបញ្ជាការតំបន់ប្រតិបត្តិកសរសឹករងកំពង់ធំ បានឲ្យដឹងថា ក្រោយពីបានទទួលដំណឹងដ៏ក្រៀមក្រំនេះ ក៏បានដឹកនាំសហការីបានទៅសាកសួរសុខទុក្ខ លោកយាយ ហ៊ឹម ភី អាយុ៨១ឆ្នំា លោកយាយមានកូនបង្កើតចំនួន៥នាក់ តែកូន៥នាក់នេះបានទៅចោលលោកយាយ២០ឆ្នាំហើយ បណ្តោយអោយលោកយាយរស់នៅម្នាក់ឯង មិនដែលឃើញមុខកូនណាម្នាក់មកជួបមុខគាត់ឡើយ ធ្វើឲ្យលោកយាយ រស់នៅក្នុងជីវភាពជាអ្នកសុំទានគេ មានពេលខ្លះអត់អាហារ ត្រូវដេកស្រេកឃ្លានម្នាក់ឯង ក្នុងដំបូលខ្ទមធ្លុះធ្លាយមើលឃើញមេឃ នៅល្ងាចថ្ងៃទី១៣ខែកញ្ញាឆ្នាំ២០១៧ ។
ឯកឧត្តម ឧត្តមសេនីយិ៍ត្រី សោម ស៊ុន បានបញ្ជាក់ថា ដោយមានក្តីអាណិតអាសូរ ក្រោយពីលោកយាយសំណូមពរ ឲ្យជួយប្រកដំបូលខ្ទមឲ្យគាត់បានជ្រកភ្លៀង មុនពេលគាត់ស្លាប់គាត់មិនភ្លេចគុណទេ ធ្វើអោយ មានចិត្តអាណិតហាក់បីដូចជា យកកាំបិទមកចាក់បេះដូងស្ទើរស្រក់ទឹកភ្នែក ខណៈពេលដែលបានឃើញ លោកយាយកាន់ឈើច្រត់ ដើរកោងៗសុំទានគេដើម្បីរស់ ទាំងរាងកាយកំពុងមានជំងឺប្រចាំកាយ។
ដោយការអាណិតអាសូជាពន់ពេក ដែលបានដឹងពីប្រវត្តិរបស់លោកយាយ រស់នៅក្នុងពិភពលោកដ៏ធំល្វឹង ល្វើយ តែបែជាលោកយាយទទួលនូវភាពឯកការ រងារទាំងកាយ រងារទាំងចិត្ត បានធ្វើឲ្យទឹកភ្នែកស្រក់ចុះដោយមិនដឹងខ្លួន ក្នុងនោះក៏បានរៃលុយគ្នា សង់រោងប្រក់ស័ង្កសីតូចមួយជូនគាត់ និងបានឧបត្ថម្ភជូន អង្ករចំនួន២៥ គីឡូក្រាម មីយើងមីម៉ាម៉ាមួយកេស ទឹកផ្លែឈើមួយកេស ត្រីងៀតចំនួន២គីឡូក្រាម និងថវិកាចំនួន១០០.០០០៛ លោកយាយ ហ៊ឹម ភី រំភើបចិត្តរកអ្វីប្រៀបផ្ទឹមពុំបាន ដោយលោកយាយមិនដែលបានទទួលនូវទានដ៍ច្រើនបែបនេះទេ ចំនែក លោកតា លោកយាយចំនួន១២នាក់ ដែលបានចូលរួមក្នុងពិធីនេះ ទទួលបាននូវថវិកាក្នុងម្នាក់ៗចំនួន១០០០០៛ ផងដែរ ។
ដោយ ប៊ុន រដ្ឋា
