កំពង់ធំៈ ផ្ទះមួយខ្នងដែលជាអំណោយរបស់ម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា និងជាប្រធានសមាគមអតីតយុទ្ធជនកម្ពុជា និងជាខ្នងផ្ទះលើកទី៤៥ បានប្រគល់ជូនដល់ ក្រុមគ្រួសារអតីតយុទ្ធជន កម្ពុជា ឈ្មោះ ជរ ចាំ ដែលជាជនពិការ ក្នុងសមរភូមិ ដើម្បីបុព្វហេតុប្រទេសជាតិមាតុភូមិ ក្នុងភារកិច្ចរក្សាសន្តិភាព ជូនប្រជាជនទូទាំងប្រទេស។
ពិធីប្រគល់ផ្ទះនេះ ដោយមានការចូលរួមពីសំណាក់អាជ្ញាធរស្រុក លោក សាយ គឹមឡម អភិបាលរងស្រុកស្ទោង លោកវរសេនិយ៍ទោ យ៉ង សំ ប្រធានសមាគមស្រុកស្ទោង លោកអ៊ុំ ឈាងលី មេបញ្ជាការផ្នែកសឹករងស្រុកស្ទោង លោកអនុសេនីយ៍ឯក ថាន់ ប៊ុនថេន មេបញ្ជាការរងកងរាជអាវុធហត្ថស្រុកស្ទោង លោក ជំទប់ទី១ឃុំ ចំណាក្រោម និងប្រជាពលរដ្ឋ ស្ថិតក្រោមអធិបតីភាព ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជា នៅរសៀលថ្ងៃទី ១៥ ខែកញ្ញា ឆ្នាំ ២០១៧។
លោក ព្រឹន្ទបាលឯក ជរ ចាំ បានទទួលផ្ទះថ្មី មួយខ្នង ទំហ៊ុ ៤ម៉ែត្រx៦ម៉ែត្រ ដែលត្រូវចំណាយថវិកាក្នុងការសាងសង់អស់ទឹកប្រាក់ចំនួន ៥.៩៧៩.០០០ ៛ ដែលជាអំណោយដ៏ថ្លៃថ្លារបស់សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈឯកឧត្តមនាយឧត្តសេនីយគន់គីម អគ្គលេខាធិការសមាគមអតីតយុទ្ធជនកម្ពុជា ជូនដល់ ក្រុមគ្រួសារអតីតយុទ្ធជន នៅអង្គភាពកងពលលេខ១៩៦ ត្រូវរបួស ពិការ នៅសមរភូមិ ស្តៅ ខេត្តបាត់ដំបង បច្ចុប្បន្នរស់នៅភូមិនាងនយ ឃុំចំណាក្រោម ស្រុកស្ទោង ខេត្តកំពង់ធំ ។
ក្នុងឳកាសនៃពិធីប្រគល់ផ្ទះនេះ ក្រុមការងារឧត្ថម្ភជូននូវ អង្ករចំនួន១០០គីឡូក្រាម មីម៉ាៗបួនកេស ទឹកត្រីទឹកស៊ីអ៊ីវចំនួន ៤ យួរ និងថវិកាចំនួន ២៥០.០០០៛ សម្រាប់ការអបអរឡើងផ្ទះថ្មី ក្នុងនោះដែរក្រុមគ្រួសារ លោក ជរ ចាំ និងប្រជាពលរដ្ឋ បានចូលរួមអបអរ និងថ្លែងអំណរគុណដល់ សម្តេចតេជោ ហ៊ុន សែន ប្រធានអតីតយុទ្ធជនកម្ពុជា ដែលតែងតែចុះជួយដល់អតីតយុទ្ធជនគ្រប់ទីកន្លែង ធ្វើឲ្យក្រុមគ្រួសារគាត់មានចិត្តរំភើបត្រេតអររកអ្វីប្រៀបផ្ទឹមពុំបានទេ និងសូមប្តេជ្ញាចិត្តស្មោះត្រង់គាំទ្រសម្តេចគ្រប់អណត្តិ ឲ្យដឹកនាំប្រទេសដើម្បីសន្តិភាព និងការអភិវឌ្ឍន៍ ។
ដោយ ប៊ុន រដ្ឋា 
