កំពង់ធំៈ នៅល្ងាចថ្ងៃទី១៥ ខែកញ្ញា ឆ្នាំ២០១៧ ឯកឧត្តម សុខ លូ អភិបាលខេត្តកំពង់ធំ និងសហការី បាននាំយកគ្រឿង ឧបភោគបរិភោគ ភេសជ្ជៈ រួមទាំងបច្ច័យចំនួន ដើម្បីចូលរួមពិធីបុណ្យកាន់បិណ្ឌវេនទី១១ នៅវត្តប្រាសាទ ស្ថិតនៅឃុំប្រាសាទ ស្រុកសន្ទុក ខេត្តកំពង់ធំ។
ក្នុងឱកាសនោះ ឯកឧត្តម សុខ លូ បានថ្លែងអំពីប្រពៃណីរបស់ខ្មែរ ដែលត្រូវបានប្រជាពលរដ្ឋខ្មែរ ថែរក្សាទុកតាំងពីបុរាណកាលមក ហើយពិធីបុណ្យកាន់បិណ្ឌ ភ្ជុំបិណ្ឌ ត្រូវបានប្រារព្ធចាប់គិតពីថ្ងៃ០១រោច ដល់ថ្ងៃ១៥រោច ខែភទ្របទ ជារៀងរាល់ឆ្នាំ ដើម្បីឧទ្ទិសកុសល ជូនដល់បុព្វរីជន ដែលបានចែកឋាននៅកាន់បរមលោកទៅហើយ ដើម្បីទទួលបាន សេចក្តីសុខ សិរីសួស្តី សម្រាប់ការរស់នៅប្រកបរបរទទួលទានផ្ទាល់ខ្លួនផងដែរ និងបាននាំយកទេយ្យវត្ថុ មានដូចជា៖ អង្ករ ២០០kg ទឹកផ្លែឈើ ៣កេស មី ១កេសធំ ស្មើនឹង ៦កេសតូច និងបច្ច័យ ចំនួន ១លានរៀល។ ជាមួយនឹងការធ្វើបុណ្យប្រពៃណីនេះ ក៏ជាការបង្ហាញអំពីការ
រីកចម្រើន របស់ប្រទេសជាតិ ទាំងលើវិស័យពុទ្ធចក្រ និងអាណាចក្រ ទាំងផ្នែកសេដ្ឋកិច្ច និងសង្គមកិច្ច ក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី នៃកម្ពុជា ដែលដៃម្ខាងកសាងប្រទេស និងការពារប្រជាជន និងដៃម្ខាងទៀត ស្វែងរកសន្តិភាពជូនប្រទេស តាមរយៈកិច្ចចចារសន្តិភាពបង្រួមបង្រួមជាតិ ដោយរួមគ្នាជាមួយប្រជាជនកសាងបានមកវិញនូវផ្លូវថ្នល់ ស្ពាន សាលារៀន មន្ទីរពេទ្យ វត្តអារាម និងហេដ្ឋារចនាសម្ព័ន្ធ សង្គមរីកចម្រើនទៅមុខលើគ្រប់វិស័យ។ ឯកឧត្តមបន្ថែមទៀតថា គណបក្ស
សង្គ្រោះជាតិធ្វើការប្រកួតប្រជែង បោះឆ្នោតដោយគ្មាន សមត្ថភាព ដោយពឹងផ្អែកទាំងស្រុងទៅលើបរទេសចាំជួយនៅពីក្រោយខ្នង អនុវត្តក្រោមការបង្គាប់បញ្ជា ផ្តល់ការគាំទ្រទាំងថវិកា សម្ភារ និងបច្ចេកទេសពីអាមេរិក ដែលជាឪរបស់ខ្លួននោះត្រូវបានបែកការណ៍ ហើយត្រូវបានចាត់វិធានការទប់ស្កាត់ទាន់ពេលវេលា និងចាប់បានមេក្លោងធំទៀត។ ស្ថានភាពបក្សសង្គ្រោះជាតិនៅពេលនេះ បានបាត់បង់ភាពម្ចាស់ការ ហើយការខ្វែងយោបល់គ្នា ក៏ចាប់ផ្តើមកក្រើកសាជាថ្មី ជុំវិញជោគវាសនា របស់គណបក្សសង្គ្រោះជាតិ និងផែនការទុច្ចរិតរបស់ខ្លួន។
