ថោយ ប៉ៃលិន: ត្បូងឃ្មុំ: ដើម្បីការបើកបរដោយសុវត្ថិភាព ចៀសវាងការខូចខាតយានយន្ត ឬបាត់បង់ទ្រព្យសម្បត្តិ ជាពិសេសត្រូវការពារអាយុជីវិតផងនោះ នគរបាលចរាចរណ៍ផ្លូវគោក ខេត្តត្បូងឃ្មុំ បានរឹតបន្តឹងពង្រឹងច្បាប់ចរាចរណ៍ នាឱកាសបុណ្យភ្ជុំបិណ្ឌខាងមុខនេះ ដោយបានដាក់កម្លាំងប្រចាំការតាមគោលដៅសំខាន់ៗ នៅតាមដងផ្លូវមួយចំនួន ដើម្បីត្រួតពិនិត្យលើល្បឿនបើកបរ និងអ្នកបើកបរដោយមិនពាក់មួកសុវត្ថិភាពផងដែរ។
លោកវរសេនីយ៍ឯក ឈឹម គឹម ហុង ស្នងការរងនគរបាលខេត្តត្បូងឃ្មុំ ទទួលផែនសណ្តាប់ធ្នាប់ បានប្រាប់ឲ្យដឹងថា ក្រោមការដឹកនាំដោយយកចិត្តទុកដាក់ពីសំណាក់ លោកឧត្តមសេនីយ៍ទោ បែន រ័ត្ន ស្នងការនគរបាល ខេត្តត្បូងឃ្មុំ ដោយបានចាត់តាំងឲ្យកម្លាំងនគរបាលការិយាល័យចរាចរណ៍ផ្លូវគោក បានដាក់ប៉ុស្តិ៍ ត្រួតពិនិត្យជាប្រចាំ លើកំណាត់ផ្លូវជាតិលេខ៧ ត្រង់ចំណុច ភូមិកោងកាង ឃុំកោងកាង ស្រុកពញាក្រែក ខេត្តត្បូងឃ្មុំ ដើម្បីត្រួតពិនិត្យច្បាប់ចរាចរណ៍ផ្លូវគោកថ្មី ដោយត្រូវត្រួតពិនិត្យលើល្បឿនយានយន្ត ដែលបើកបរលើសល្បឿនកំណត់ ឬការបើកបរក្រោមឥទ្ធិពលនៃគ្រឿងស្រវឹង និងធ្វើការអប់រំដល់អ្នកបើកបររថយន្តមិនពាក់ខ្សែក្រវាត់ និងអ្នកបើកបរម៉ូតូ
ដោយមិនមានពាក់មួកសុវត្ថិភាព លើសពីនេះក៏មានការចុះរៀបចំសណ្តាប់ធ្នាប់នៅតាមទីសាធារណៈ វត្តអារាម ក៏ដូចជាការ ចុះសម្រួលចរាចរណ៍នៅតាមស្ពាន ថ្នល់ ដែលមានល្ខណះតូចចង្អៀតផងដែរ។ លោកស្នងការរងបានបញ្ជាក់ថា គ្រាន់តែចាប់តាំងពីដើមខែមករា មកទល់នឹង ខែកញ្ញានេះ គ្រោះថ្នាក់ចរាចរណ៍ បានកើតឡើង
ចំនួន៥០ករណី បណ្តាលឲ្យមនុស្សស្លាប់៣៥នាក់ និងរងរបួសធ្ងន់៥០នាក់ របួសស្រាល២៨នាក់។ ទាំងនេះដែលធ្វើឲ្យថ្នាក់ដឹកនាំមានការព្រួយបារម្ភជាខ្លាំង ហើយបានចាត់តាំងឲ្យកម្លាំងជំនាញនគរបាលចរាចរណ៍ ត្រូវបង្កើនការយកចិត្តទុកដាក់ ក្នុងការអនុវត្តន៍ច្បាប់ចរាចរណ៍ថ្មី ឲ្យកាន់តែមានប្រសិទ្ធភាពខ្ពស់ ៕
