កំពង់ធំៈ មេបញ្ជាការតំបន់ប្រតិបត្តិកសរសឹករងកំពង់ធំ និងជាប្រធានសមាគមអតីយុទ្ឋជនកម្ពុជាខេត្តបានបន្តដឹកនាំសហការី ទៅប្រគល់ផ្ទះមួយខ្នងថ្មីទៀត ដែលជាអំណោយដ៏ថ្លៃថ្លារបស់សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រធានសមាគមអតីតយុទ្ធជនកម្ពុជា ផ្តល់ជូនអតីតយុទ្ធជន(ពិការ) នៅភូមិបារាយណ៍ធំ ឃុំបារាយណ៍ ស្រុកបារាយណ៍ ខេត្តកំពង់ធំ តាមរយះឯកឧត្តម នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា នៅព្រឹកថ្ងៃច័ន្ទទី២៥ខែកញ្ញា ឆ្នាំ២០១៧ ។
លោកនាយឯក សេង រន អាយុ៤៧ឆ្នំា ចូលបម្រើក្នុងជួរកងទ័ពនៅឆ្នាំ១៩៩២ នៅអង្គភាពវរសេនាតូចលេខ១ នៃយោធាខេត្តកំពង់ធំ លោកនាយឯក សេង រន បានត្រូវរបួសដោយសារក្រុមខ្មែរក្រហមចុចបំផ្ទះមីន នៅសមរភូមិ ត្រពាំងព្រះ ឃុំរម្មណី ស្រុករវៀង ខេត្តព្រះវិហារ នៅថ្ងៃទី១៧ខែកក្កដា ឆ្នាំ១៩៩៤ ក្នុងពេលបើកផ្លូវជាតិលេខ១២ (៦២) ពីកំពង់ធំទៅខេត្តព្រះវិហារ មានភរិយាឈ្មោះ សេង សាវឿន អាយុ៤៣ឆ្នំា មានកូនចំនួន៨នាក់ រស់នៅក្នុងបន្ទុក បានទទួលផ្ទះថ្មី ដែលទើបសាងសង់ថ្មីនេះមានទំហំ៤ម៉ែត្រ x៦ម៉ែត្រ ដែលត្រូវចំណាយថវិកាក្នុងការសាងសង់អស់ទឹកប្រាក់ ៦.៣៥០.០០០៛ (គិតទាំងឈ្នួលជាង) ។
ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនកម្ពុជាខេត្ត បានមានប្រសាសន៍ នៅក្នុងពិធីប្រគល់ផ្ទះថ្មីនេះ ក្រុមការងារសមាគមអតីតយុទ្ឋកម្ពុជាខេត្តកំពង់ធំ បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន ព្រមទាំងបានផ្ដល់ជូនបន្ថែមទៀតនូវអំណោយរបស់សម្ដេចមានអង្ករចំនួន៥០គីឡូក្រាម មីម៉ាម៉ាមួយកេស ទឹកត្រីទឹកស៊ីអ៊ីវពីរយួរ ត្រីខកំប៉ុង០២យួរ និងថវិកាចំនួន ៤០០.០០០៛ ផងដែរ និងបានផ្តាំផ្ញើរ ឲ្យមានការប្រុងប្រយ័ត្ន ថែរក្សាទ្រព្យសម្បត្តិ ឲ្យប្រើប្រាស់បានយូរអង្វែង ។
នៅក្នុងឳកាសប្រគល់ផ្ទះជូន ក្រុមគ្រូសារ លោក សេង រន មានការចូលរួមពី សំណាក់អាជ្ញាធរដែនដី និងប្រជាពលរដ្ឋ រស់នៅភូមិបារាយណ៍ធំ បានគោរពថ្លែងអំណរគុណដ៍ជ្រាលជ្រៅបំផុតចំពោះសម្តេចតេជោហ៊ុន សែន ដែលជានិច្ចកាលសម្តេចតែងតែយកចិត្តទុកដាក់គិតគូរដល់សុខទុក្ខនិងជីវភាពរស់នៅរបស់អតីតយុទ្ធជន នៅគ្រប់ទីកន្លែង និងសូមគាំទ្រសម្តេចជារៀងរហូត ដើម្បីដឹកនាំនាវាសន្តិភាព និងការអភិវឌ្ឍន៍ ឆ្ពោះទៅ រកភាពរីកចម្រើន ។
ដោយ ប៊ុន រដ្ឋា
