កំពង់ធំៈ ឯកឧត្តម មេបញ្ជាការតំបន់ប្រតិបត្តិការសឹករងកំពង់ធំ បានបន្តចុះសួរសុខទុក្ខ ស្រ្តីមេម៉ាយ ត្រូវបាន ស្វាមីបោះបង់ រស់នៅក្នុងជីវភាពទីទាល់ក្ររ មានជីវភាពខ្វះខាត បាននាំយកអំណោយរបស់សម្តេចតេជោហ៊ុន សែន ផ្តល់ជូន នៅល្ងាចថ្ងៃទី២៦ខែកញ្ញាឆ្នាំ២០១៧ ស្ថិតនៅ ភូមិក្តីដូង ឃុំក្តីដូង ស្រុកកំពង់ស្វាយ ខេត្តកំពង់ធំ។
ប្អូនស្រី អ៊ុន សុត អាយុ ៤២ ឆ្នំាជាស្រ្តីមេម៉ាយ ក្រោយពីបែកបាក់គ្រួសារ ស្វាមីបានបន្សល់កូន៤នាក់ ឲ្យរស់នៅក្នុងបន្ទុក គ្មានមុខរបរពិតប្រាកដ ជីវិតរស់នៅក្នុងតែលតោលគ្មានកោះត្រើយ តែទោះជាមានជីវភាពក្រលំបាក យ៉ាងណាក្តី ក៏ខំតស៊ូចិញ្ចឹមកូនទាំង៤នាក់ ទាំងត្រដាប់ត្រដួស ដោយរកមុខរបរទទួលទាន នាំកូនដើរឆ្លុះសត្វតូចៗ(កូនកង្កែប កូនក្អាត់)លក់គ្រាន់បានប្រាក់ទិញអង្ករហូបប្រចាំថ្ងៃ
។ដោយមានការអាណិតអាស៊ូ ពីសំណាក់មេបញ្ជាការតំបន់ប្រតិបត្តិការសឹករងកំពង់ធំ បានជួយរំលែកទុក្ខ ដោយបាននាំយកអំណោយរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលមានគ្រឿងឧបភោគបរិភោគ រួមទាំងថវិកា ឧបត្ថម្ភជូនគាត់នូវអង្ករចំនួន៥០ គីឡូក្រាម មីយើងមួយកេស ទឹកត្រីទឹកស៊ីអ៊ីវពីរយួរ និងថវិកាចំនួន ៨០.០០០ ៛។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា ក្រោយពីបានបញ្ចប់ភារកិច្ចក្នុងអង្គភាព បានដឹកនាំសហការីចុះសំណេះសំណាលសាកសួរសុខទុក្ខ ជាមួយនឹងប្រជាពលរដ្ឋ នៅក្នុងភូមិសាស្រ្តខេត្តកំពង់ធំ ក៏បានប្រទះឃើញប្អូនស្រី អ៊ុន សុត ដែលជាស្រ្តីមេម៉ាយ មានជីវភាពក្រខ្សត់ ក្រោយស្វាមីចុះចោលទៅ ប្អូនស្រីខិតខំរកស្លឹកត្នោត និងឈើ ឬស្សី ដើម្បីបានសង់ខ្ទមធ្វើជាជម្រកស្នាក់នៅ ជាមួយនឹងកូនៗ៤នាក់ រហូតមកដល់បច្ចុប្បន្ន ក្នុងនោះឯកឧត្តម សោម ស៊ុន បាន ផ្តាំផ្ញើរ និងលើកទឹកចិត្តដល់ប្អូនស្រី អោយតស៊ូបន្ថែមទៀត អប់រំកូនចៅឲ្យក្លាយទៅជាមនុស្សល្អ រួមទាំង ជម្រុញឲ្យកូនចៅបានចូលរៀនគ្រប់គ្នា ដើម្បីបញ្ជ្រៀសគ្រោះអវិជ្ចា ។
ប្អូនស្រី អ៊ុន សុត បានប្តេជ្ញាចិត្តគាំទ្រសម្តេចតេជោ ហ៊ុន សែន ជានាយករដ្ឋមន្រ្តីគ្រប់អណ្ណត្តិ និងសូមថ្លែងអំណរគុណចំពោះឯកឧត្តម មេបញ្ជាការតំបន់ប្រតិបត្តិការសឹកកំពង់ធំ និងសហការី ដែលបានគិតគូរពីជីវភាពរបស់ក្រុមគ្រួសាររបស់ប្អូនស្រី ក៏ដូចជាប្រជាពលរដ្ឋដ៏ទៃ និងសូមជូនពរឲ្យជួបប្រទះតែសេចក្តីសុខ ជោគជ័យគ្រប់ភារកិច្ច។
ដោយ ប៊ុន រដ្ឋា
