កំពង់ធំៈ នៅថ្ងៃឈប់សម្រាក ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនកម្ពុជាខេត្ត ឈ្លៀតឳកាសដឹកនាំសហការី ចុះសួរសុខទុក្ខក្រុមគ្រួសារអតីតយុទ្ធជនកម្ពុជា ដែលកំពុងតែរស់នៅតាមមូលដ្ឋាន ក្នុងភូមិសាស្រ្តខេត្តកំពង់ធំ ដើម្បីសិក្សាស្វែងយល់ ពីជីវភាពរស់នៅពិតប្រកដរបស់ប្រជាពលរដ្ឋ និងអតីតយុទ្ធជន ដែលជាការផ្តាំផ្ញើររបស់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីត យុទ្ធជនកម្ពុជា ។
ជាក់ស្តែងនៅព្រឹកទី០១ខែតុលា ឆ្នាំ២០១៧ ក្រុមការងារសមាគមអតីតយុទ្ធជនកម្ពុជាខេត្ត បានបន្តដំណើរ ចុះសំណេះសំណាលសាកសួរសុខទុក្ខ និងស្វែងយល់ពីជីវភាពរស់នៅរបស់អតីតយុទ្ធជនមួយគ្រួសារ រស់នៅ ភូមិក្រវ៉ា ឃុំក្រវ៉ា ស្រុកបារាយណ៍ ខេត្តកំពង់ធំ ដែលមានឈ្មោះ អឿ អាន អាយុ៤៧ ឆ្នំា ចូលបម្រើក្នុងជួរកងទ័ព នៅឆ្នាំ១៩៨៩ ក្នុងអង្គភាពយោធាស្រុកបារាយណ៍ និងវរសេនាតូចលេខ១ នៃយោធាខេត្តកំពង់ធំ ហើយបានឈប់សម្រាកពីជួរកងទ័ពនៅឆ្នាំ ១៩៩៨ ។
បច្ចុប្បន្នលោក អឿ អាន ជាប្រធានប្រជាការពារភូមិ មានភរិយាឈ្មោះ ហ៊ុន សៀង អាយុ៤៩ឆ្នំា មានកូនចំនួន៥ នាក់ រស់នៅក្នុងបន្ទុក ក្នុងនោះមានកូនម្នាក់ពិការខួរក្បាល និងរៀងកាយតាំងពីកំណើត តែមានជីវភាពក្រលំបាកខ្វះខាត ដោយសារក្នុងគ្រួសារមានកូនច្រើនហើយឧស្សាហ៍មានជំងឺថែមទៀត និងពុំមានមុខរបរអ្វីជាដុំកំភួននោះឡើយ រស់នៅសព្វថ្ងៃបានព្រឹកខ្វះល្ងាច។
នៅក្នុងឱកាសនៃពិធីសំណេះសំណាលសាកសួរសុខទុក្ខនេះ ឯកឧត្តម ឧត្តមសេនីយ៍ត្រី សោម ស៊ុន មេបញ្ចាការតំបន់ប្រតិបត្តិការសឹករងកំពង់ធំ រួមទាំងក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានឧបត្ថម្ភជូនគាត់នូវ អង្ករចំនួន៥០ គីឡូក្រាម មីយើងចំនួន២កេស ទឹកត្រី ទឹកស៊ីអ៊ីវពីរយួរ ខោអាវប្រជាការពារមួយកំប្លេរ និងថវិកាចំនួន១០០.០០០ ៛ផងដែរ។
អាជ្ញាធរដែនដី និងប្រជាពលរដ្ឋដែលបានចូលរួមក្នុងពិធីនេះ បានថ្លៃងអំណរគុណដ៏ជ្រាលជ្រៅជាទីបំផុតចំពោះ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានរៀបចំបង្កើតសមាគមអតីតយុទ្ធជនកម្ពុជានេះឡើង ដើម្បីងាយស្រួលដឹងសុខ ដឹងទុក្ខ របស់អតីតយុទ្ធជនដែលរស់នៅតាមមូលដ្ឋាន និងសូមគាំទ្រសម្តេចជានាយករដ្ឋមន្ត្រីជារៀងរហូត ។
ដោយ ប៊ុន រដ្ឋា
