កំពង់ធំ៖ ដើម្បីបង្កើននូវចំណងមិត្តភាព រវាងអតីតយុទ្ធជននៅក្នុងមូលដ្ឋាន នៃទឹកដីខេត្តកំពង់ធំ ដែលបច្ចុប្បន្ន រាជរដ្ឋាភិបាល ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តីនៃព្រះរាជាណាចក្រ កម្ពុជា បានយកចិត្តទុកដាក់ មកលើគ្រួសារអតីតយុទ្ធជនកម្ពុជា និងជម្រុញឲ្យមានការមើលថែរគ្រួសារ អ្នកមានគុណលើប្រទេសជាតិទាំងនេះ ពិសេសជាងប្រជាពលរដ្ឋធម្មតា។
ឯកឧត្តម ឧត្តមសេនីយ៍ត្រី សោម ស៊ុន បានមានប្រសាសន៍ថា ដោយមានការចង្អុលបង្ហាញ និងគាំទ្រពីសកម្មភាពរបស់សមាគមអតីតយុទ្ធជនកម្ពុជាខេត្ត ពីសំណាក់ ឯកឧត្តម នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា សមាគមអតីតយុទ្ធជនកម្ពុជាខេត្តកំពង់ធំ រួមទាំងសហការី បានប្រឹងប្រែងដោយលះបង់សេចក្តីសុខ និងពេលវេលា ដើម្បីកិច្ចការសង្គម ក្នុងការចងសម្ព័ន្ឋមេត្រីភាពរវាង កងកម្លាំង និងអតីតយុទ្ធជន រួមទាំងប្រជាពលរដ្ឋ ដោយជាកិច្ចការ ចាំបាច់បំផុតក្នុងការស្វែងយល់ ពីជីវភាពរស់នៅក្នុងបច្ចុប្បន្ន របស់គ្រួសារអតីតយុទ្ធជន ។
ជាក់ស្តែងនៅល្ងាចថ្ងៃទី០៥ខែតុលាឆ្នាំ២០១៧ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីយុទ្ឋជនកម្ពុជាខេត្ត បានបន្តដឹកនាំសហការីចុះសំណេះសំណាលសាកសួរសុខទុក្ខអតីតយុទ្ឋជនមួយគ្រួសារទៀតរស់នៅភូមិពាមគ្រែង ឃុំក្តីដូង ស្រុកកំពង់ស្វាយ ខេត្តកំពង់ធំ ។
លោកព្រឹន្ទបាលទោ ថោ លួ អាយុ៤៨ឆ្នំា អតីតយុទ្ធជន កន្លងមករស់នៅអង្ភភាពវរសេនាតូចលេខ៥៥ នៃយោធាខេត្តកំពង់ធំ ដែលបានចូលបំរើក្នុងជួរកងទ័ពនៅឆ្នាំ១៩៩៤ ហើយក៏បានត្រូវរបួសដោយសារក្រុមខ្មែរក្រហមចុចបំផ្ទុះមីននៅសមរភូមិត្រពាំងព្រះ ផ្លូវជាតិលេខ១២(៦២) នៅថ្ងៃទី០៨ខែវិច្ឆិកាឆ្នាំ១៩៩៧ លោក ថោ លួ មានភរិយាឈ្មោះ ភន ឃី អាយុ៤៩ឆ្នំា មានកូននៅបន្ទុកចំនួន៦ នាក់ ប្រកបរបរនេសាទត្រីគ្រាន់បានប្រាក់ចិញ្ចឹមជីវិត តែជាអកុសលនៅថ្ងៃទី ០៩ខែមិថុនាឆ្នាំ២០១៧ កន្លងមកនេះ លោក ព្រឹន្ទបាលទោ ថោ លួ បានគ្រោះថ្នាក់ចរាចរណ៍បណ្តាលឲ្យបាក់ជើងខាងឆ្វេង ដែលពេលនេះកំពុងសម្រាកព្យាបាលនៅផ្ទះ ដោយអបឆ្អឹងដែកមិនអាចធ្វើដំណើរទៅណាបានអស់រយៈពេលជិតបួនខែហើយ ក្នុងឱកាសសំណេះសំណាល ក្រុមការងារបានជួយឧបត្ថម្ភនូវអង្ករចំនួន៥០គីឡូក្រាម មីយើងពីរកេស ទឹកត្រីទឹកស៊ីអ៊ីវពីរយួរ និងថវិកា ចំនួន១០០.០០០៛ ។
ដោយ ប៊ុន រដ្ឋា
