កំពង់ធំៈ តំបន់ប្រតិបត្តិការសឹករងកំពង់ធំ បានមូលមតិគ្នា ប្រារព្វពិធីដង្ហែរអង្គកឋិនសាមគ្គី នាំយកបច្ច័យ ពុទ្ធបរិស័ត និងសម្បុរសជន ចូលរួមចាប់មាឃផល តាមពុទ្ធសទ្ធាជ្រះថ្លែ ដើម្បីប្រមូលបច្ច័យប្រគេន ព្រះតេជ គុណប៉ែន ផានិត ព្រះគ្រូចៅអធិការវត្តឥន្ទកុមារ សម្រាប់ការសាងស់ព្រះវិហារ និងសមិទ្ធផលនានា ក្នុងវត្តឥន្ទកុមារ ស្ថិតនៅ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ នៅរសៀលថ្ងៃទី ៨ ខែតុលា ឆ្នាំ ២០១៧។
ក្បួនដង្ហែរអង្គកឋិនសាមគ្គី ត្រូវបានដង្ហែរចេញពីបញ្ជាការដ្ឋានតំបន់ប្រតិបត្តិការសឹករងកំពង់ធំ ឆ្ពោះទៅកាន់វត្តឥន្ទកុមារ ក្រោមការផ្តួចផ្តើមពិធីបុណ្យ ដោយ មេបញ្ជាការតំបន ប្រតិបត្តិការសឹករងកំពង់ធំ រួមទាំងមេបញ្ជាការ នាយទាហាន ពលទាហាន រួមទាំងលោកតា លោកយាយ សម្បុរសជនជាច្រើន បានមកចូលរួមយ៉ាងអធឹកអធ័ម ដើម្បីសាងកុសល់ផលបុណ្យ សម្រាប់ជាតិនេះ និងជាតិក្រោយឯទៀត ដែលជាពិធីបុណ្យ ត្រូវបានប្រជាពលរដ្ឋខ្មែរ ដែលជាសាសនាព្រះពុទ្ធ ប្រារព្វឡើង តៗគ្នារហូតពីជំនាន់មួយទៅជំនាន់មួយ ដែលជាទំនាមទំលាប់ប្រពៃណីខ្មែរ តាំងពីបុរាណកាលមក។
បុណ្យកឋិនទាន នាសម័យពុទ្ធកាល ពេលដែលព្រះសម្មាសម្ពុទ្ធទើបបានត្រាស់ដឹងថ្មីៗ ទ្រង់អនុញ្ញាតឲ្យភិក្ខុសង្ឃប្រើប្រាស់តែសំពត់បង្សុកូល គឺសំពត់ឥតម្ចាស់ ដែលភិក្ខុរកបានពីព្រៃស្មសាន ឬពីគំនរសំរាម ប៉ុន្តែក្រោយមកទើបទ្រង់អនុញ្ញាតឲ្យភិក្ខុអាចប្រើប្រាស់គហបតីចីវរ គឺសំពត់មានម្ចាស់ ដែលភិក្ខុបានមកដោយសារគេប្រគេន ចាប់ពីពេលនេះហើយ ដែលកឋិនទានចាប់ផ្ដើមមានកំណើតឡើង កឋិនទាន គឺជាបុណ្យមួយ ដែលមានតែក្នុងព្រះពុទ្ធសាសនាប៉ុណ្ណោះ និងជាទាន
មានមកតាមផ្លូវព្រះវិន័យ ហើយក៏ជាកាលទានដ៏ពិសេសមួយមានកំណត់ពេលវេលាច្បាស់លាស់ ពុំមែនចេះតែធ្វើនៅពេលណា ក៏បានតាមចិត្តចង់នោះឡើយ គឺរយៈកាលទទួលកឋិនទានក្ដី និងរយៈកាលកឋិនទានក្ដី អាចធ្វើបានតែក្នុងសម័យតែ ១ខែគត់ (២៩ថ្ងៃ) ចាប់ពីថ្ងៃ ១រោច ខែអស្សុជ ដល់ថ្ងៃ១៥កើត ខែកត្តិក បើខុសពីសម័យកាលនេះ ទោះបីអ្នកមានសទ្ធាធ្វើបុណ្យ មានលក្ខណៈសណ្ឋានដូច
កឋិនក៏ដោយ ក៏មិនអាចហៅថា កឋិនទានបានដែរ ព្រោះធ្វើខុសកាលទាន មិនចំសម័យ មួយខែចុងវស្សាន្តរដូវនេះ ពោលគឺមិនត្រូវ តាមពុទ្ធានុញ្ញាត ក្នុងវត្តមួយ បើការចាំវស្សា គ្មានភិក្ខុសោះ ក៏មិនអាចហែកឋិនចូលបានដែរ ព្រោះសាមណេរ គ្មានសិទ្ធិទទួលក្រាលគ្រងកឋិនទេ លុះតែយ៉ាងហោចបំផុត ត្រូវមានភិក្ខុ ១អង្គដែរ ហើយដែលបានចាំវស្សា អស់៣ខែ បានត្រឹមត្រូវ ទើបអាចហែកឋិនចូលបាន។
ឯកឧត្តម ឧត្តមសេនីយ៍ត្រី សោម ស៊ុន បានមានប្រសាសន៍ថាដោយប្រទេសមានសន្តិភាព មានការអភិវឌ្ឍន៍ ប្រជាពលរដ្ឋប្រុសស្រីសប្បាយនឹងការធ្វើបុណ្យកឋិនទាន រួមទាំងពិធីបុណ្យផ្សេងៗ ដែលជាទំនាមទំលាប់ របស់ដូនតា ក្រោមការដឹកនាំដ៏ឈ្លៀសវៃ របស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តីនៃព្រះរាជាណាចក្រកម្ពុជា បានធ្វើឲ្យវិស័យព្រះពុទ្ធសាសនា រស់រវើក និងបានដើរទទឹមគ្នារវាង ពុទ្ធចក្រ និងអាណាចក្រ មិនតែប៉ុណ្ណោះ ក្នុងអំឡុងសម្តេចតេជោ ដឹកនាំបានធ្វើ រីកចំរើនយ៉ាងឆាប់រហ័ស ដូចជាវត្តអារាម អាស្រម និងទីកន្លែងបូជាស្ការៈផ្សេងៗ ទោះជានៅចំណាត់មាត់ញក ក៏ដោយក៏មានវត្ត មានព្រះវិហារដែរ ជាក់ស្តែងក្នុងថ្ងៃនេះ បានដឹកនាំកឋិនសាមគ្គីរបស់តំបន់ប្រតិបត្តិការសឹករងកំពង់ធំ ដោយមានការចូលរួមជាង៣០កឋិនទាន ហើយបានរួបរួមបច្ច័យព្រគេនព្រះគ្រូចៅអធិការ ប៉ែន ផានិត ចំនួន១៨,៥៨០,០០០ រៀល សម្រាប់ការសាងសង់ ព្រះវិហារ និងសមិទ្ធិផលនានាក្នុងវត្តឥន្ទកុមារ ។
ដោយ ប៊ុន រដ្ឋា
