សាំង សារ៉ាវី:
ខេត្តតាកែវ ៖ នៅថ្ងៃទី១០ ខែតុលា ឆ្នាំ២០១៧ កម្លាំងជំនាញអធិការដ្ឋាននគរបាលក្រុងដូនកែវ ឃាត់ខ្លួនជនសង្ស័យ០៤នាក់ ពាក់ព័ន្ធករណីចោរកម្ម និងចែកចាយគ្រឿងញៀនខុសច្បាប់ ។ ជនសង្ស័យទាំង០៤នាក់ខាងលើមានទី១-ឈ្មោះ ទួន ចិត្ត ភេទប្រុស មានទីលំនៅផ្សារអង្គរកា ស្ថិតក្នុងភូមិអង្គរកាឃុំត្រពាំងធំខាងត្បូង ស្រុកត្រាំកក់ ទី២-ឈ្មោះ សៅ ស្រុន ផាន់នីន ភេទប្រុស អាយុ២១ ឆ្នាំ មានទីលំនៅភូមិត្រពាំងឬស្សី សង្កាត់
បារាយណ៍ ក្រុងដូនកែវ ទី៣-ឈ្មោះ សៅស្រុន នីអាណាន់ ភេទប្រុស អាយុ២៥ឆ្នាំ មានទីលំនៅភូមិ សង្កាត់ជាមួយគ្នា និងទី៤-ឈ្មោះ យ៉ុង សំឡូត ភេទប្រុស អាយុ២២ឆ្នាំ មានទីលំនៅភូមិព្រៃសណ្តែក ឃុំព្រៃស្លឹក ស្រុកទ្រាំង ខេត្តតាកែវ ។ លោកវរសេនីយ៍ទោ ឆាយ សាវុធ អធិការនគរបាលក្រុងដូនកែវ បានឱ្យដឹងថា បន្ទាប់ពីឃាត់ខ្លួនជនសង្ស័យឈ្មោះ សៅស្រុន នីអាណាន់ និងបក្សពួករបស់ខ្លួនឈ្មោះ សៅស្រុន ផានីន និងឈ្មោះ យ៉ុង សំឡូត បានកាលពីថ្ងៃទី០៨ ខែតុលា ឆ្នាំ២០១៧ ពាក់ព័ន្ធករណីចោរកម្ម រួចមក នៅចំពោះមុខសមត្ថកិច្ចជនសង្ស័យឈ្មោះ សៅស្រុន នីអាណាន់ បានសារភាពថា កាលពីអំឡុងខែកញ្ញា ឆ្នាំ២០១៧ (មិនចាំថ្ងៃ) ខ្លួនបានលួចម៉ូតូ០១គ្រឿងម៉ាកហុងដា C125 សេរី២០១៥ ពណ៌ខ្មៅ ពីថៅកែរបស់ខ្លួនឈ្មោះ ហេង វណ្ណា ភេទប្រុស មានទីលំនៅភូមិដំណាក់ចង្អើរ សង្កាត់ដំណាក់ចង្អើរ ក្រុងកែប ខេត្តកែប ហើយបានយកមកលាក់ទុកនិងស្នាក់នៅផ្ទះរបស់ឈ្មោះ យ៉ុង សំឡូត បានមួយយប់ លុះព្រឹកឡើងខ្លួន និងបក្សពួកមានឈ្មោះ យ៉ុង សំឡូត និងឈ្មោះ សៅស្រុន ផានីន(ប្អូនប្រុសបង្កើតឈ្មោះ សៅស្រុន នីអាណាន់ )បានយកម៉ូតូដែលលួចបានខាងលើទៅបញ្ចាំអោយឈ្មោះ ទួន ចិត្ត បានប្រាក់ចំនួន៣០០ដុល្លា ព្រមទាំងបានទិញថ្នាំញៀនពីឈ្មោះទួន ចិត្ត ចំនួន០១កញ្ចប់ធំ ក្នុងតម្លៃ១៥០ដុល្លា ។ លោកអធិការ បានបន្តថា បន្ទាប់ពីសាកសួរជនសង្ស័យទាំង០៣នាក់ខាងលើរួចមក ទើបនៅថ្ងៃទី១០ ខែតុលា ឆ្នាំ២០១៧ កម្លាំងអធិការដ្ឋាន
នគរបាលក្រុងដូនកែវ សហការជាមួយកម្លាំងអធិការដ្ឋាននគរនាលស្រុកត្រាំកក់ បានធ្វើការឃាត់ខ្លួនជនសង្ស័យឈ្មោះ ទួន ចិត្ត ពីបទទទួលផលចោរកម្ម និងចែកចាយគ្រឿងញៀន នៅនឹងផ្ទះជនសង្ស័យតែម្តង ព្រមទាំងបានដកហូតម៉ូតូ០១គ្រឿង ដែលជារបស់ជនរងគ្រោះ ថ្នាំញៀនចំនួន០២កញ្ចប់ ទូរស័ព្ទ០១គ្រឿង និងសម្ភារសម្រាប់ប្រាស់ថ្នាំញៀនមួយចំនួន ។ បច្ចុប្បន្នជនសង្ស័យ និងវត្ថុតាងកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងខេត្ត ចាត់ការតាមផ្លូវច្បាប់ ។
