ខេត្តប៉ៃលិន ក្រុមសហភាពសហព័ន្ឋយុវជនកម្ពុជាខេត្តប៉ៃលិន និងក្រុមយុវជនស្មក្រចិត្តនិងក្រុមគ្រូពេទ្យស្មក្រចិត្តការិយាល័យអ្នកតំណាងរាស្ត្រខេត្តប៉ៃលិនដឹកនាំដោយលោកជំទាវបានស្រីមុំអ៊ីឈាន បានចុះជួយសំរួលការងារលំបាករបស់បងប្អូនពលករកម្ពុជាក្នុងការធ្វើដំណើរពីប្រទេសថៃ វិលត្រឡប់ទៅកាន់ស្រុកកំណើតវិញ ។ ក្នុងរយះពេលប៉ុន្មានថ្ងៃកន្លងទៅនេះ មានបងប្អូនពលករខ្មែរមានចំនួនកើនឡើងជាលំដាប់ ជាច្រើនពាន់នាក់បានសំរុកចេញពីប្រទេសថៃ ធ្វើដំណើរឆ្លងកាត់ច្រកទ្វាអន្តរជាតិព្រំ ខេត្តប៉ៃលិន ឆ្ពោះទៅកាន់ស្រុកកំណើតវិញ ។ ក្នុងដំណើរវិលត្រឡប់នេះ យើងសង្កេតឃើញមាន ក្នុងចំណោមបងប្អូនពលករ មាន យុវជន យុវតី និងស្ត្រីចំណាស់ៗ និងកុមារតូចៗ រួមនិងបង្វេចសំបាយខោអាវសំពីងសំពោងផងដែរ ។
បងប្អូនពលករភាគច្រើនស្ត្រី និងកុមារមានអាការះហត់ហេវ និងពលឡាន ។ បងប្អូនពលករត្អូញត្អែរក្នុងការខ្វះខាតសោហុយក្នុងការធ្វើដំណើរបន្តត្រឡប់ទៅផ្ទះសម្បែងវិញ ។ បងប្អូនពលករបានផ្តល់ព័ត៌មានថា មូលហេតុនៃការវិលត្រឡប់ឈប់ធ្វើការងារនៅប្រទេសថៃនេះ គឺដោយសារតែពួកខ្លួនមានការព្រួយបារម្ភភ័យខ្លាចអំពីសុវត្តិភាពផ្ទាល់ខ្លួនតែម្តង ក្នុងស្ថានភាពដែលប្រទេសថៃកំពុងគ្រប់គ្រងដោយកម្លាំងយោធានោះ ហើយក៏ដោយសារតែការទៅធ្វើការងារនេះពុំបានសុំទិដ្ឋាការ ឫសុំច្បាប់ទម្លាប់របស់ប្រទេសគេត្រឹមត្រូវឡើយ ។
ចាប់តាំងពីព្រលឹមស្រាងៗថ្ងៃទី១៤មិថុនា នៅច្រកទ្វាអន្តរជាតិព្រំខេត្តប៉ៃលិនមានភ្លៀងរលឹមធ្លាក់ជាប់រហូត បងប្អូនពលករខ្មែរបានធ្វើដំណើរឆ្លងកាត់ទ្វាព្រំដែនថៃ-កម្ពុជា បន្ទាប់ពីខាងភាគីថៃបានពិនិត្យនិង អនុញ្ញតអោយឆ្លងកាត់ដោយសំរួល ។ នៅខាងទឹកដីកម្ពុជា ឯកឧត្តមអ៊ីឈាន ប្រធានក្រុមប្រឹក្សាខេត្ត ឯកឧត្តមសៅសារ៉ាត់អភិបាលរងខេត្ត និងក្រុមសហភាពសហព័ន្ឋយុជនកម្ពុជាខេត្តប៉ៃលិន ក្រុមយុវជនស្ម័ក្រចិត្តការិយាល័យអ្នកតំណាងរាស្ត្រខេត្តប៉ៃលិន បានរងចាំទទួលជួយសំរួលបងប្អូនចូលមកកាន់កន្លែងឈប់សំរាកបណ្តោះអាសន្ន ទទួលទានភេសជ្ជៈ និងសួរនាំព័ត៌មានផ្សេងៗ និងសួរនាំអំពីតម្រូវចាំបាច់ជាក់ស្តែងរបស់បងប្អូនដែលចង់បាន ។
ក្រុមគ្រូពេទ្យស្ម័ក្រចិត្តនៃការិយាល័យអ្នកតំនាងរាស្ត្របានពិនិត្យសុខភាព និងចែកថ្នាំព្យាបាលដោយមិនគិតថ្លៃដល់បងប្អូន។ ដើម្បីបងប្អូនពលករបានវិលត្រឡប់ទៅផ្ទះសម្បែងវិញបានឆាប់រហ័សតាមសំណូមពរដែលបងប្អូនចង់បាននោះ ឯកឧត្តមអ៊ីឈានប្រធានក្រុមប្រឹក្សាខេត្ត លោកជំទាវ បានស្រីមុំ អ្នកតំណាងរាស្ត្រមណ្ឌលប៉ៃលិនបានបន្តចំណាយថវិកាផ្ទាល់ខ្លួនជួលរថយន្តកូរ៉េ និងរថយន្តកាមេរីដឹកជញ្ជូនបងប្អូនទៅដល់ត្រឹមរាជធានីភ្នំពេញ ហើយបងប្អូនបន្តដំណើរទៅកាន់ស្រុកកំណើតរបស់ខ្លួនរៀងៗខ្លួន ។
តាមរបាយការណ៏ជាក់ស្តែងបានបញ្ជាក់ថា ចាប់តាំងពីថ្ងៃទី១១ រហូតដល់ម៉ោង៥ល្ងាចថ្ងៃទី១៤ខែមិថុនាឆ្នាំ២០១៤នេះ មានពលករឆ្លងកាត់ពីប្រទេសថៃ ត្រឡប់មកកម្ពុជាវិញតាមច្រកអន្តរជាតិព្រំខេត្តប៉ៃលិនមានចំនួន២៧៨៥នាក់ ក្នុងនោះមានស្ត្រី ៧៧២នាក់ និងកុមារា កុមារី១៦៩នាក់ ។ ឯកឧត្តមអ៊ីឈាន និងលោកជំទាវបានស្រីមុំ បានចំណាយថវិកាផ្ទាល់ទៅលើស្បៀងអាហារ ថ្នាំពេទ្យ ឧបត្ថម្ភថវិកាផ្ទាល់ដល់ពលករដែលគ្មានថវិកាសោះ និងជួលរថយន្តដឹកជញ្ជូនសរុបទឹកប្រាក់មានចំនួន៦៨លានរៀល ៕
