pai Len:
កំពង់ចាម: ល្បែងស៊ីសងខុសច្បាប់មួយកន្លែង ដែលមានអាប៉ោងជាប្រចាំផងនោះ ត្រូវបានកម្លាំងកងរាជអាវុធហត្ថស្រុកបាធាយ សហការណ៍ជាមួយកម្លាំងសមត្ថកិច្ចមូលដ្ឋាន ចុះធ្វើការបង្ក្រាប កាលពីរសៀលថ្ងៃទី២១ ខែតុលា ឆ្នាំ២០១៧ នៅចំណុចភូមិចុង ឃុំសំបូរ ស្រុកបាធាយ ខេត្តកំពង់ចាម ដោយឃាត់ខ្លួនបានក្រុមអ្នកញៀនល្បែងចំនួន៤នាក់ និងដកហូតបានវត្ថុតាងមួយចំនួនផងដែរ។
សមត្ថកិច្ចបានឲ្យដឹងថា បន្ទាប់ពីទទួលបានបទបទបញ្ជាពី លោកឧត្តមសេនីយ៍ត្រី សោ សាវឿន មេបញ្ជា ការកងរាជអាវុធហត្ថខេត្តកំពង់ចាម កម្លាំងកងរាជអាវុធហត្ថស្រុកបាធាយ សហការណ៍ជាមួយកម្លាំងសមត្ថកិច្ចមូលដ្ឋាន បានចុះបង្ក្រាប ទីតាំងលេងល្បែងចាក់អាប៉ោងមួយកន្លែង នៅចំណុចភូមិ-ឃុំ ខាងលើ ជាលទ្ធផលកម្លាំងជំនាញ ឃាត់ខ្លួនបានជនសង្ស័យចំនួន៤នាក់ រួមមាន ៖ 
១-ឈ្មោះ ឡេង ម៉ាប់ ភេទប្រុស អាយុ៤៨ឆ្នាំ ជនជាតិ ខ្មែរ រស់នៅភូមិជាលា ឃុំជាលា ស្រុកបាធាយ ខេត្តកំពង់ចាម ២-ឈ្មោះ ក្រូច អូន ភេទប្រុស អាយុ៣៨ឆ្នាំ រស់នៅភូមិភ្នំដឹល ឃុំតាំងក្រាំង ស្រុកបាធាយ ខេត្តកំពង់ចាម ៣-ឈ្មោះ ហួន ម៉ាប់ ភេទប្រុស អាយុ៤២ឆ្នាំ ជនជាតិខ្មែរ រស់នៅ ភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម និង៤-ឈ្មោះ ណាំ សំខាន់ ភេទស្រី អាយុ៥១ឆ្នាំ រស់នៅភូមិចុង ឃុំសំបូរ ស្រុកបាធាយ ខេត្តកំពង់ចាម ។
ក្នុងនោះសមត្ថកិច្ចបានធ្វើការដកហូតបាននូវវត្ថុតាងរួមមាន ម៉ូតូចំនួន១៣គ្រឿង ចានសម្រាប់បាញ់អាប៉ោងចំនួន២ មេអាប៉ោងចំនួន១ ប្រាក់រៀល
ចំនួន១លាន៨សែនរៀល ហាន់តោរចំនួន១សំរាប់។
បច្ចុប្បន្ន ជនសង្សយ័ទាំង៤នាក់ រួមជាមួយវត្ថុតាង ត្រូវបានកម្លាំងជំនាញ កសាងសំណុំរឿង ដើម្បីបញ្ជូនទៅតុលាការ ចាត់ការបន្តតាមនីតិវិធីច្បាប់ ៕
