កំពង់ធំៈ ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ បានបន្តសកម្មភាព ចុះសិក្សាស្វែងយល់ពីទុក្ខលំបាក របស់អតីតយុទ្ធជន ទោះជាអតីតយុទ្ធជន រស់នៅទីជិតទីឆ្ងាយក្តី ក៏ការធ្វើដំណើររុករកអតីតយុទ្ធជនមិនបានរាថយនោះឡើយ គឺធ្វើយ៉ាងឲ្យតែអតីតយុទ្ធជនរស់នៅមានភាពកក់ក្តៅ មិននៅឯកកោម្នាក់ឯងនោះឡើយ ។
ជាក់ស្តែងនៅល្ងាចថ្ងៃទី ១០ ខែ វិច្ឆិកា ឆ្នាំ ២០១៧ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ ប្រតិបត្តិការសឹករងកំពង់ធំ រួមទាំងព្រះគ្រូចៅអធិការវត្តខ្មាក់ អមដំណើរដោយលោក មេឃុំសាលាវិស័យ នាំគ្នាដើរកាត់ព្រៃ កាត់ទឹក ដើម្បីឆ្ពោះទៅរកផ្ទះអតីតយុទ្ធជន នៅចំកាត់មាត់ញក ដែលកំពុងតែជួបការលំបាកនិងមានភាពខ្វះខាត កំពុងរងចាំជំនួយពីសម្បុរសជន ស្ថិតនៅភូមិឬស្សីដួចថ្មី ឃុំសាលាវិស័យ ស្រុកប្រសាទបល្ល័ង្ក ខេត្តកំពង់ធំ ។
ឯកឧត្តម សោម ស៊ុន ប្រធានសមាគមអតីយុទ្ឋជនកម្ពុជាខេត្ត បានមានប្រសាសន៍ថា អតីតយុទ្ធជន គឺលោកអនុសេនីយ៍ទោ ថៃ វណ្ណធី អតីតមេបញ្ជាការកងអនុសេនាធំទី២ យោធាស្រុកប្រសាទបល្ល័ង្ក នៃយោធាខេត្តកំពង់ធំ ក្នុងសម័យសង្គ្រាម គាត់ជាបុរសពោះម៉ាយដោយភរិយាស្លាប់ចោលរយៈពេលជិត១០ ឆ្នាំហើយ បច្ចុប្បន្នរស់នៅជាមួយកូនចំនួន៤នាក់ រស់នៅក្នុងជម្រកផ្ទះធ្លុះធ្លាយទ្រុឌទ្រោម ដោយផ្ទះមួយខ្នងនេះ យើងខ្ញុំផ្តល់ស័ង្កសី និងចាត់ចែងកម្លាំងសាងសង់ផ្ទះឲ្យនៅឆ្នាំ២០០៩មកម្លេះ ។
លោកអនុសេនីយ៍ទោថៃ វណ្ណធី បានទទួលប្រាក់បៀវត្សប្រចាំខែក្នុងនាមអតីតយុទ្ធជនចំនួនជិត៦០០.០០០៛ ពីរាជរដ្ឋាភិបាលផងដែរ តែបច្ចុប្បន្នគាត់មានមុខរបរធ្វើជា កម្មករជម្រះស្មៅចំការ នឹងស៊ីឈ្នួលច្រូតស្រូវដើម្បីរកប្រាក់បន្ថែមសម្រាប់ចិញ្ចឹមកូន ក្នុងឱកាសសំណេះសំណាលសាកសួរសុខទុក្ខនេះក្រុមការងារយើងបានផ្ដល់ជូនគាត់នូវអង្ករចំនួន៥០ គីឡូក្រាម មីយើងពីរកេស ទឹកត្រីទឹកស៊ីអ៊ីវពីរយួរ អាវរងារចំនួន៣ សាប៊ូបោកខោអាវចំនួន២ កញ្ចប់ និងថវិកាចំនួន ២០០.០០០ ៛ ។
ដោយ ប៊ុន រដ្ឋា
