ខេត្តកំពង់ធំៈ អតីតយុទ្ធជន នៅក្នុងខេត្តកំពង់ធំ បានសម្តែងនូវភាពកក់ក្តៅ ខណៈពេលដែលបានឃើញ ភាពពិត នៃសកម្មភាពរបស់សមាគមអតីតយុទ្ធជនខេត្ត បានប្រឹងប្រែងធ្វើការងារមនុស្សធម៌ ដោយចិត្ត ស្មោះ ក្នុងការចុះជួយដោះស្រាយបញ្ហាបងប្អូនអតីតយុទ្ធជន ដែលជួបនូវភាពខ្វះខាតបានទាន់ពេលវេលា ។
ជាក់ស្តែងក្រុមការងារបេះដូងមនុស្សធម៌ ដែលបានដឹកនាំដោយ ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ បានបន្តសកម្មភាពចុះសួរសុខទុក្ខ និងសំណេះសំណាល គ្រួសារអតីតយុទ្ធជនពិការ ឈ្មោះ ញ៉ឹម ញាន អាយុ ៤៦ ឆ្នំា ដែលកំពុងតែមានជម្ងឺ ដោយសារមុខរបួសរើឡើងវិញ លោក ញ៉ឹម ញាន ជាអតីតធ្លាប់ ចូលបម្រើកងទ័ពនៅឆ្នាំ១៩៩៣ អង្គភាពយោធាស្រុកស្ទោង ខេត្តកំពង់ធំ បានត្រូវរបួស ពិការនៅសមរភូមិផ្លូវជាតិលេខ១២ (៦២) តំបន់អូរពោធ៍ នៅឆ្នាំ១៩៩៧ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា បន្ទាប់ពីការងារស្នូលរបស់អង្គភាព ឆ្លៀតពេលដឹកនាំសហការី រួមទាំងមេឃុំ ចុះសួរសុខទុក្ខ លោក ញ៉ឹម ញាន មានភរិយា ឈ្មោះ ឌឹម អ៊ិត អាយុ៣៧ ឆ្នំា មានកូនចំនួន ២ នាក់នៅក្នុងបន្ទុក ពុំមានមុខរបរ ពិតប្រាកដនោះទេ បច្ចុប្បន្នរស់នៅភូមិ ព្រះនង្គ័ល ឃុំចំណាក្រោម ស្រុកស្ទោង ខេត្តកំពង់ធំ នៅព្រឹកថ្ងៃទី ថ្ងៃទី០៥ ខែមករា ឆ្នាំ២០១៨ ។
ក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានឧបត្ថម្ភជូនគាត់នូវអង្ករចំនួន ៥០ គីឡូក្រាម មីចំនួន២កេស ទឹកត្រីទឹកស៊ីអ៊ីវពីរយួរ ប៊ីចេងមួយកញ្ចប់ សាប៊ូបោកខោអាវចំនួន២កញ្ចប់ សាប៊ូដុសខ្លួនមួយដប មុងជ្រលក់ថ្នាំមួយ និងថវិកាចំនួន១៥០.០០០ ៛ ព្រមទាំងបានផ្តាំផ្ញើរ ឲ្យថែរក្សាសុខភាព ការពារទ្រព្យសម្បត្តិផ្ទះសំបែង ក្នុងរដូវក្តៅនេះ និងអប់រំកូនចៅឲ្យក្លាយទៅជាមនុស្សល្អ សិស្សល្អ ចៀសផុតពីគ្រោះថ្នាក់គ្រឿងញៀន ។
ដោយ ប៊ុន រដ្ឋា 
