ពិធីបើកការប្រកួតកីឡាឧត្តមសិក្សា និងមធ្យមសិក្សាឯកទេស សម្រាប់ឆ្នាំសិក្សា២០១៣-២០១៤បានធ្វើឡើងនាល្ងាច ថ្ងៃទី១៧មិថុនានៅពហុកីឡដ្ឋានជាតិ ។ គួរបញ្ជាក់ថាការប្រកួតបានចាប់ផ្ដើមតាំងពីថ្ងៃទី១៥មិថុនាមកម្ល៉េះ។ ឯ ឧ ស៊ាន បូរ៉ាតរដ្ឋលេខាធិការក្រសួងអប់រំយុវជន និង កីឡា ឯ ឧ វ៉ាត់ ចំរើនអគ្គលេខាធិការគណៈកម្មាធិការគណៈកម្មាធិការជាតិអូឡាំពិកកម្ពុជា បានអញ្ជើញចូលរួមក្នុងពិធីបើកការប្រកួតប្រចាំឆ្នាំដ៏ធំនេះ។ ឯ ឧ រដ្ឋលេខាធិការ បានសំណូមពរឲ្យគ្រឹះស្ថាន ឧត្តមសិក្សា មធ្យមសិក្សាឯកទេសទាំងអស់បង្កើតសមាគម ក្លឹបកីឡានិស្សិតប្រចាំគ្រឹះស្ថានសិក្សារបស់ខ្លួន បំផុសសកម្មភាពអប់រំកាយ និង កីឡាដល់និស្សិត និងរួមចំណែកធ្វើឲ្យចលនាកីឡាក្លាយជាចលនាសង្គមជាតិទាំងមូល ។
ឯ ឧ ក៏ផ្តែផ្តាំឲ្យកីឡាករ-កីឡាការិនីទាំងអស់លេងគោរពតាមគោលការណ៍ FAIR-PLAY និងត្រូវចូលរួមចំណែកអនុវត្តន៍នូវពាក្យ ស្លោកកីឡាដើម្បីសុខុមាលភាពផ្លូវកាយនិងផ្លូវបញ្ញារបស់មនុស្សគ្រប់ៗរូប។ លោក ដួង មាសចំរើន ប្រធាននាយកដ្ឋានអប់រំកាយ និង កីឡាសិស្ស និស្សិតបានឲ្យដឹងថាសម្រាប់បាល់ទាត់ មាន ២៤ក្រុមចែកចេញជា ៧ ពូលដែលក្នុងនោះ៥ពូលមាន ៣ក្រុម និង ២ពូលមាន ៤ក្រុម ។
បាល់ទះបុរសមាន១២ក្រុមចែកជា ៤ ពូលដោយមួយពូលៗមាន ៣ក្រុម ឯ បាល់ទះនារីមាន ៥ ក្រុម លេងវិលជុំតែម្ដង ។ បាល់បោះបុរសមាន ៦ក្រុមប្រកួតតាមរូបមន្តវិលជុំដោយគ្មានចែកពូល និង បាល់បោះនារីមាន៧ ក្រុម ចែកជា ២ ពូលដោយពូល A មាន ៤ ក្រុម និង ពូល B មាន ៣ ក្រុម ។ចំពោះប្រភេទវិញ្ញាសាអត្តពលកម្មមានលោតកំពស់បុរស-នារី រត់ល្បឿន១០០ម៉ែត្របុរស-នារី ចោលដុំដែក បុរស-នារី លោតចម្ងាយបុរស-នារី និង វិញ្ញាសារត់ ៥គីឡូម៉ែត្របុរស និង ៣ គីឡូម៉ែត្រនារី។ អត្តពលិកសរុបមាន១១៤៥នាក់ក្នុងនោះកីឡាការិ នី២៤៩នាក់ និង ប្រើប្រាស់មន្ត្រីបច្ចេកទេសចំនួន៣៦៥នាក់។
