កំពង់ធំៈ ឧត្តមសេនីយ៍ត្រី សោម ស៊ុន បានបញ្ជាក់ថា ទុក្ខព្រួយរបស់យោធា ដែលមន្រ្តីក្រោមុំឪវាទ គឺជាភារកិច្ចចាំបាច់បំផុតរបស់ថ្នាក់ដឹកនាំ ពោលគឺទុក្ខរបស់មន្រ្តីក្រោមុំឪវាទ គឺជាទុក្ខរបស់ថ្នាក់ដឹកនាំ ក្នុងការ យកចិត្តទុកដាក់ ទាំងការរស់នៅ ការស្នាក់នៅ ទាំងសុខភាពអនាម័យ និងសកម្មភាពផ្សេងៗរបស់មន្រ្តីថ្នាក់ក្រោម។
ជាក់ស្តែង ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំនាយទាហានក្រោមឱវាទ ទៅសួរសុខទុក្ខលោកវរសេនិយទោ កែវ ខែម នាយសេនាធិការរង ដែលមានជម្ងឺគ្រួសក្នុងប្រម៉ាត់ និងត្រូវបានលោកវេជ្ជបណ្ឌិត នៃមន្ទីរពេទ្យព្រះកេតុមាលា (១៧៩) ធ្វើការវះកាត់និងព្យាបាលយ៉ាងយកចិត្តទុកដាក់ ហើយទើបវិលយមកកាន់លំនៅដ្ឋានវិញ ស្ថិតនៅភូមិ ចេកមួយស្ទោង ឃុំមានជ័យ ស្រុកសណ្តាន់ ខេត្តកំពង់ធំ កាលពីថ្ងៃម្សិលមិញនេះ ។
ដំណើរការចុះសួរសុខទុក្ខ ត្រូវបានធ្វើឡើង នៅព្រឹកថ្ងៃទី១០ខែមករា ឆ្នាំ២០១៨ ដឹកនាំដោយ មេបញ្ជាការតំបន់ប្រតិបត្តិការសឹករងកំពង់ធំ និងមេបញ្ជាការរង នាយសេនាធិការរង តំណាងឲ្យថ្នាក់ដឹកនាំនៃអង្គភាពតំបន់ប្រតិបត្តិការសឹករងកំពង់ធំទាំងមូល ព្រមទាំងបាន នាំយកនូវថវិកាចំនួន ២,១៣៥,០០០ ទឹកផ្លែឈើ ២ កេស ទឹកបរិសុទ្ធ២ កេស និងទឹកដោះគោឆៅចំនួន ៤ យួរ សូមបញ្ជាក់ផងដែរថា ថវិកានិងភេសជ្ជៈទាំងអស់នេះគឺបានមកដោយសារការរួមចំណែករបស់នាយទាហាននៅក្នុងបញ្ជាការដ្ឋានតំបន់ប្រតិបត្តិការសឹករងកំពង់ធំ ។
លោកវរសេនីយ៍ទោ កែវ ខែម បានពោលពាក្យអគុណ ទាំងអួលណែនដើមក ចំពោះមេបញ្ជាការតំបន់ប្រតិបត្តិការសឹករងកំពង់ធំ និងថ្នាក់ដឹកនាំគ្រប់លំដាប់ថ្នាក់ ដែលបានយកចិត្តទុកដាក់ជួយដោះស្រាយការលំបាកខ្វះខាតរបស់គាត់កន្លងមក ក៍ដូចជាពេលដែលគាត់កំពុងមានជម្ងឺ និងសូមបួងសួងដល់វត្ថុសក្កិសិទ្ឋក្នុងលោកតាមជួយថែរក្សា អស់លោកទាំងអស់ និងក្រុមគ្រួសារ បានប្រកបតែនិងសេចក្តីសុខ សេចក្ដីចម្រើន សុខភាពល្អ និងមានជោគជ័យគ្រប់ភារកិច្ច ។
ដោយ ប៊ុន រដ្ឋា
