ខេត្តកំពង់ធំ នៅថ្ងៃព្រសហ្បតិ៍ ១០រោច ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១១ ខែមករា ឆ្នាំ២០១៨ រដ្ឋបាលខេត្តកំពង់ធំ រៀបចំកិច្ចប្រជុំគណៈកម្មការរៀបចំសង្ក្រានថ្មីសំបូរព្រៃគុក ក្រោមអធិបតីភាពឯកឧត្តម សុខ លូ អភិបាលខេត្តកំពង់ធំ និងមានការអញ្ជើញចូលរួមពី ឯកឧត្តម លោកជំទាវ អភិបាលរងខេត្ត សហភាពសហព័ន្ធយុវជនកម្ពុជាខេត្តកំពង់ធំ កងកម្លាំងទាំងបី លោក លោកស្រី ប្រធានមន្ទីរជុំវិញខេត្ត។
បន្ទាប់ពីធ្វើការពិភាក្សាអំពីបទពិសោធន៍ដែលអនុវត្តការងារដំណើរការសង្ក្រានថ្មីសំបូរព្រៃគុករួចមក ឯកឧត្តម សុខ លូ មានប្រសាសន៍លើកឡើងថា ប្រាសាទសំបូរព្រៃគុក ត្រូវបានដាក់បញ្ចូលជាសម្បត្តិបេតិកភណ្ឌពិភពលោក កាលពីថ្ងៃទី៨ ខែកក្កដា ឆ្នាំ២០១៧កន្លងទៅនេះ ដូច្នេះសូមគណៈកម្មការរៀបចំសង្កានថ្មីសំបូរព្រៃគុក ត្រូវខិតខំរៀបចំដំណើរការនៃកម្មវិធីសង្ក្រានថ្មីសំបូរព្រៃគុក ឲ្យមានលក្ខណៈល្អប្រសើរជាងឆ្នាំមុន ដើម្បីកំដរបរិយាកាសឲ្យមានភាពសប្បាយរីករាយ ជូនបងប្អូនប្រជាពលរដ្ឋទូរទាំងប្រទេសជាពិសេសបងប្អូនដែលរស់នៅក្នុងខេត្តកំពង់ធំយើងទាំងមូល។ ឯកឧត្តមបន្ថែមទៀតថា ក្នុងនាមយើងជាថ្នាក់ដឹកនាំកម្មវិធី នឹងត្រូវត្រៀមខ្លួនរួចជាស្រេច
ក្នុងការដោះស្រាយបញ្ហាដែលកើតមានឡើង ក្នុងនោះបញ្ហាដែលយើងទាំងអស់គ្នាត្រូវគិតគូររួមមានបញ្ហាចរាចរណ៍ ការរៀបចំសន្តិសុខសណ្តាប់ធ្នាប់សាធារណៈ ត្រូវមានកន្លែងសម្រាប់ចតទុកដាក់យានជំនិះរបស់បងប្អូន ដែលមកទស្សនា ដែលមានសំដែងកម្មវិធីកំសាន្តសប្បាយ និងលេងល្បែង របាំប្រជាប្រិយ ការសម្តែងនូវសិល្បៈ របាំរបស់មន្ទីរវប្បធម៌និងវិចិត្រសិល្បៈខេត្ត ការប្រគុំតន្ត្រី ឡើងសរសរខ្លាញ់ ទាញព្រ័ត ចោលឈូង កញ្ញាធ្លាក់ទឹក ប្រដាក់បិទមុខជាដើម ក្នុងនោះក៏មានការដាក់តាំងនូវផលិតផលភូមិមួយផលិតផលមួយក្នុងខេត្ត ជាពិសេសផលិតផលកសិកម្ម សិប្បកម្ម និងការលក់ដូររបស់បងប្អូនអាជីវករ
ឲ្យមានសណ្តាប់ធ្នាប់ និងប្រកបដោយសោភ័ណ្ឌភាព៕
