កំពង់ធំៈ ក្រៅពីការងារស្នូលរបស់អង្គភាព ឯកឧត្តម មេបញ្ជាការសឹករងកំពង់ធំ បានដឹកនាំសហការី ចុះសិក្សាស្វែងយល់ ពីជីវិតពិត ក្នុងការរស់នៅ ប្រកបមុខរបរប្រចាំថ្ងៃ និងសុខទុក្ខរបស់អតីតយុទ្ធជន ដែលកំពុងតែជួបនូវការខ្វះខាត ស់នៅក្នុងមូលដ្ឋាន នៃទឹកដីខេត្តកំពង់ធំ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីយុទ្ធជនកម្ពុជាខេត្ត បានអញ្ជើញចុះសំណេះសំណាល សួរសុខទុក្ខ ដល់ក្រុមគ្រួសារអតីតយុទ្ធជន ដែលកំពុងតែ ជួបនូវការខ្វះខាត គ្រួសារទៀត បច្ចុប្បន្នកំពុងរស់នៅភូមិអូររំដេង ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ នៅល្ងាចថ្ងៃទី១៥ ខែមករា ឆ្នាំ២០១៨។
អតីតយុទ្ធជន លោកអនុសេនីយ៍ត្រីស៊ឹង អ៊ត អាយុ ៤៩ឆ្នំា អតីតធ្លាប់ជា យោធិននៅក្នុងអង្គភាព វរសេនាធំលខ៤ កងពលលេខ ៥ ចាស់ កន្លងមកធ្លាប់ឈរជើងប្រចាំការនៅសមរភូមិអានសេះ ជាប់ព្រំដែនកម្ពុជា-ថៃ ក្នុងសម័យរដ្ឋកម្ពុជាផងដែរ លោកមានកូនចំនួន០៧ នាក់ នៅក្នុងបន្ទុកចំនួន ៥ នាក់ ហើយ ០២ នាក់ទៀត មានគ្រួសារមិនដឹងថារស់នៅទីណានោះទេ ។
លោក ស៊ឹង អ៊ត សព្វថ្ងៃមុខរបួសអំបែងគ្រាប់ បៀមជាប់នៅក្នុងសាច់ឧស្សារធ្វើទុក្ខនៅពេលត្រជាក់ខ្លាំងម្តងៗ រូបគាត់មិនអាចប្រកបការងារអ្វីធ្ងន់ធ្ងរបានទេ តែទោះបីរាងកាយមានស្នាមរបួសយ៉ាងណាក្តី ភាពស្រឡាញ់សន្តិសុខ សុវត្តិភាព ចង់ឲ្យប្រជាពលរដ្ឋរស់នៅមានសេចក្តីសុខ គាត់បានចូលរួម ជាប្រជាការពារភូមិ ក្រៅពីនោះបានដើរស៊ីឈ្នួលគេ និងឡើងត្នោតបន្តិចបន្តួច ចំណែកភរិយាដើរដាក់ទ្រូយកកូនកង្កែប ដើម្បីគ្រាន់បានថវិកាសម្រាប់ទិញអង្ករចិញ្ចឹមជីវិត និងផ្គត់ផ្គង់ការសិក្សាដល់កូន ។
ក្នុងឳកាសនៃការចុះសួរសុខទុក្ខ អតីតយុទ្ធជន ដោយឃើញពីភាពលំបាកខ្វះខាត ឯកឧត្តម សោម ស៊ុន និងក្រុមការងារសមាគមអតីតយុទ្ធជនកម្ពុជាខេត្ត បានឧបត្ថម្ភជូនគាត់នូវអង្ករចំនួន ៧៥ គីឡូក្រាម , មីចំនួន ០២កេស , ទឹកត្រីចំនួន ០២យួរ ,មុមុងជ្រលក់ថ្នាំចំនួន០២ សាប៊ូបោកខោអាវចំនួន០២កញ្ចប់ , សាប៊ូដុសខ្លួន ០១ ដប , ប៊ីចេងចំនួន០២កញ្ចប់ប់ , អាវរងាចំនួន ០៥ អាវ និងថវិកាចំនួន ១០០,០០០ ៛ ។
ដោយ ប៊ុន រដ្ឋា
