កំពង់ធំៈ អតីតយុទ្ធជនពិការភ្នែក មានជីវភាពក្រីក្រលំបាក ត្រូវបានទទួលផ្ទះឈើមួយខ្នង ដែលជាខ្នងផ្ទះ លើកទី៥៤ ជាអំណោយរបស់ខម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា តាមរយះឯកឧត្តម នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា និងបានផ្តល់ជូនលោក សុខ ភួន ជាអតីតយុទ្ធជនពិការភ្នែក ខាងឆ្វេងនិងស្មាខាងស្តាំក្នុងសមរភូមិនៅឆ្នាំ១៩៨៦ ។
ផ្ទះមួយខ្នងដែលសាងសង់អំពីឈើ ប្រក់ស័ង្កសីក្រាលក្តារ សង់ខ្ពស់ពីដី សាងសង់ដោយ សមាគមអតីតយុទ្ធជនខកម្ពុជាខេត្តកំពង់ធំ ត្រូវបានចំណាយថវិកាក្នុងការសាងសង់អស់ទឹកប្រាក់៥,៩៦០,០០០៛ ក្រោមការដឹកនាំសាងសង់ដោយ ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនកម្ពុជា ខេត្ត និងប្រធានសមាគមអតីតយុទ្ធជនស្រុកសណ្តាន់ ។
ផ្ទះមួយខ្នងដែលជាអំណោយរបស់សម្តេចតេជោ ហ៊ុន សែន ត្រូវបានឧត្តមសេនីយ៍ត្រី សោម ស៊ុន មេបញ្ជា ការតំបន់ប្រតិបត្តិការសឹករងកំពង់ធំ ចុះមកប្រគល់ជូនលោក សុខ ភួន ជាអតីតយុទ្ធជនពិការ នៅព្រឹកថ្ងៃទី ២២ ខែមករា ឆ្នាំ ២០១៨ ព្រមទាំងសហការី ដែលត្រូវបានធ្វើដំណើរក្នុងចម្ងាយផ្លូវ ១៣៥គីឡូម៉ែត្រ ពីទីរួមខេត្តកំពង់ធំ ឆ្ពោះទៅកាន់ភូមិស្រែវាលខាងកើត ឃុំដងកាំបិតស្រុកសណ្តាន់ ជាប់ព្រំប្រទល់ខេត្តព្រះវិហារ ។
លោក សុខ ភួន អាយុ៥៨ឆ្នំា អតីតប្រធានកងអនុសេនាតូចលេខ១ យោធាស្រុកសណ្តាន់ ខេត្តកំពង់ធំ បានចូលបម្រើក្នុងជួរកងទ័ពនៅឆ្នាំ១៩៧៩ ហើយបានពិការភ្នែកខាងឆ្វេង និងស្មាខាងស្តាំក្នុងសមរភូមិនៅឆ្នាំ១៩៨៦ បច្ចុប្បន្នលោក សុខ ភួន មានភរិយាឈ្មោះ ឯក ភួន អាយុ៥៨ ឆ្នំាដូចគ្នា ហើយមានកូនចំនួន ៤ មានមុខរបរ នេសាទត្រី និងស៊ីឈ្នួលជំរះស្មៅការឲ្យគេគ្រាន់បានប្រាក់ទិញអង្ករចិញ្ចឹមជីវិត ។
នៅក្នុងពិធីប្រគល់ផ្ទះថ្មីនេះ ក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានឧបត្ថម្ភជូនគាត់បន្ថែមទៀតនូវ អង្ករចំនួន ៥០ គីឡូក្រាម មីចំនួន២ កេស ទឹកត្រីទឹកស៊ីអ៊ីវ ៣យួរ ប៊ីចេង២កញ្ចប់ អាវរងាចំនួនបី សាប៊ូបោកខោអាវ២កញ្ចប់សាប៊ូដុសខ្លួនមួយដប និងថវិកាចំនួន២៥០,០០០ ៛ ។
លោក សុខ ភួន បានថ្លែងអំណរគុណចំពោះសម្តេចតេជោ ហ៊ុន សែន ប្រធានសមាគម និង ឧត្តមសេនីយ៍ត្រី សោម ស៊ុន ប្រធានសមាគមអតីយុទ្ធជនខេត្ត ដែលតែងតែខ្នះខ្នែងដោយមិនគិតពីការនឿយហត់ ជិតឆ្ងាយ ដាច់ស្រយ៉ាលក្តី ក៏តែងតែចំណាយទាំងថវិកា កំលាំងចិត្ត កំលាំងកាយ ដើម្បីចុះជួយដល់អតីតយុទ្ធជន គ្រប់ ទិសទី ទ្វើនិងកាយវិការទាំងនេះ ធ្វើឲ្យខ្ញុំមានចិត្ត រំភើបចិត្ត ស្ទើរនិយាយមិនចេញ ដោយមិននឹកស្មានថាមានថ្ងៃនេះ ដែលបានទទួលផ្ទះថ្មី ។ ដោយ ប៊ុន រដ្ឋា
