កំពត ឯកឧត្តម ជាវ តាយអភិបាល នៃគណៈអភិបាលខេត្ត បានមានប្រសាសន៍ថា៖ បើទោះបីខេត្តកំពតបច្ចុប្បន្ននេះ មានសន្ទុះនៃភាពអភិវឌ្ឍន៍រីកចម្រើនលើគ្រប់វិស័យបម្រើបាននូវសេចក្ដីត្រូវការរបស់ប្រជាពលរដ្ឋយ៉ាងល្អប្រសើរក៏ពិតមែន។ ប៉ុន្តែអាជ្ញាធរខេត្តយើងក៏នៅតែត្រូវបន្ដខិតខំធ្វើការអភិវឌ្ឍន៍អោយបានកាន់តែរីកចម្រើនបន្តថែមទៀត ដើម្បីអោយឆ្លើយតបបានស្របទៅតាមមហិច្ឆិតានៃគោលនយោបាយរាជរដ្ឋាភិបាលដែលមានសម្ដេចតេជោហ៊ុន សែនជាប្រមុខ ដឹកនាំ។ពោលគឺផ្ដោតលើការអភិវឌ្ឍន៍ ផ្លូវ ភ្លើង ទឹក និងមនុស្ស ដែលជាការងារអាទិភាព ។
ឯកឧត្ដម ជាវ តាយ បានមានប្រសាសន៍បែបនេះនៅក្នុង ឱកាសដែលឯកឧត្ដមបានអញ្ជើញជាអធិបតីដឹកនាំកិច្ចប្រជុំគណៈអភិបាលខេត្ត កាលពីព្រឹកថ្ងៃ២៣ខែមករា ឆ្នាំ២០១៨ ដែលមានការចូលរួមពីលោក-លោកស្រីជាអភិបាលរងខេត្តនិងថ្នាក់ដឹកនាំអង្គភាពចំណុះសាលាខេត្ត។
ឯកឧត្ដមអភិបាលខេត្តក៏លើកឡើងបន្តទៀតថា៖ ដូចនេះយើងទាំងអស់គ្នាត្រូវរួមសហការគ្នាជាកម្លាំងសរុប វិធានការ សរុបក្នុងការដឹកនាំគ្រប់គ្រងកិច្ចការរដ្ឋបាលដែនដី ការពារសន្តិសុខសណ្ដាប់ធ្នាប់សុវត្ថិភាពសង្គម និងលើកកម្ពស់ការអភិវឌ្ឍន៍ សេដ្ឋកិច្ច សង្គមកិច្ច វប្បធ៌ម នៅក្នុងក្របខ័ណ្ឌនៃភូមិសាស្ត្រខេត្តកំពត ដែលជាខេត្តមួយមានសក្ដានុពល ទាំងវិស័យសេដ្ឋកិច្ចនិងទេសចរណ៍អោយបានកាន់តែប្រសើរឡើងថែមទៀត ស្របទៅតាមគោលនយោបាយរបស់រាជរដ្ឋាភិបាល ច្បាប់ លិខិតបទដ្ឋាន។ ឯកឧត្តមជាវ តាយ ក៏បានសំណូមពរ អោយអភិបាលរងខេត្ត ក៏ដូចថ្នាក់ដឹកនាំអង្គភាពចំណុះសាលាខេត្តទាំងអស់ត្រូវបន្តជំរុញបំពេញមុខងារ និងទទួលខុសត្រូវ ស្របទៅតាមលំដាប់ឋានានុក្រមនិងអនុវត្តតួនាទីភារកិច្ចដែលបានបែងចែកដោយទទួលខុសត្រូវអំពីការសម្រេច និងសកម្មភាពនានាក្នុងគណៈអភិបាលខេត្តផងដែរ។
គួរជំរាបថា៖កិច្ចប្រជុំ គណៈអភិបាលខេត្តកំពត នាពេលនេះ បានឆ្លងនិងផ្ដោតនូវរបៀបវារៈ លើកិច្ចផ្ដល់យោបល់អំពីរបាយការណ៍ស្ដីពីវឌ្ឍនភាព នៃការបំពេញតួនាទី ភារកិច្ច បញ្ហាប្រឈម និងសំណូមពរ របស់ក្រុមប្រឹក្សាខេត្ត។ ដែលអង្គប្រជុំបានពិភាក្សាផ្ដល់យោបល់លើរបាយការណ៍រដ្ឋបាលខេត្តដែលមាន១៩ទំព័រ ព្រមទាំងលើការបែងចែក តួនាទីភារកិច្ចនិងរបៀបរបបធ្វើការងាររបស់គណៈអភិបាលខេត្ត និបការផ្ដល់ឯកសណ្ឋានការងារសម្រាប់មន្រ្តីរដ្ឋបាលខេត្ត។
