កំពង់ធំៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងកោតសរសើរដល់ថ្នាក់កនាំខេត្ត មន្ទីរអង្គភាពជុំវិញខេត្ត ថ្នាក់ដឹកនាំក្រុង ស្រុក ឃុំ សង្កាត់ទំាងអស់ ដែលមានសាមគ្គីភាព ឯកភាពផ្ទៃក្នុង រួបរួមគ្នាខិតខំធ្វើការងារសម្រេចបានល្អប្រសើរ និងសម្រេចបានកិច្ចការធំៗ ដូចជា ការពង្រឹងសន្តិភាព ស្ថេរភាពនយោបាយ សន្តិសុខសណ្តាប់ធ្នាប់សាធារណៈ ដោយមានការចូលរួមពីប្រជាពលរដ្ឋផងដែរ ជាពិសេសកងកម្លំាងប្រដាប់អាវុធ ដែលបានខិតខំការពារ សុវត្ថិភាពសាធារណៈជូនប្រជាពលរដ្ឋបានល្អប្រសើរ ។
ប្រសាសន៍នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៧ និងលើកទិសដៅការងារសម្រាប់អនុវត្តឆ្នាំ២០១៨ របស់រដ្ឋបាលខេត្តកំពង់ធំ នៅថ្ងៃទី២៥ ខែមករា ឆ្នាំ២០១៨ ដោយមានការអញ្ជើញចូលរួមពីឯកឧត្តម លោកជំទាវ អភិបាលរងខេត្ត សមាជិកក្រុមប្រឹក្សាខេត្ត លោកអភិបាលក្រុង-ស្រុក ថ្នាក់ដឹកនាំមន្ទីរអង្គភាពជុំវិញខេត្ត មន្ត្រីរាជការសាលាខេត្ត កងកម្លាំងទាំងបី ក្រុមប្រឹក្សាឃុំ-សង្កាត់ ប្រមាណជិត៤០០នាក់ ។
ឯកឧត្តម សុខ លូ អភិបាលខេត្តកំពង់ធំ បានមានប្រសាសន៍ អំពីលទ្ធផលនៃអង្គសន្និបាតនិង បានរកឃើញនូវបញ្ហាប្រឈមមួយចំនួន និងបានស្វែងរកដំណោះស្រាយនានា ព្រមទាំងទទួលបាននូវមេរៀនបទពិសោធន៍ល្អៗ ឯកឧត្តម បានធ្វើការវាយតម្លៃខ្ពស់ ប្រកបដោយមោទនភាពយ៉ាងក្រៃលែង ចំពោះលទ្ធផលការងារដែលសម្រេចបាន និងបានដាក់ចេញនូវទិសដៅការងារសម្រាប់អនុវត្តបន្ត ឆ្នាំ២០១៨ និងបងបានបញ្ជាក់ លទ្ធផលសម្រេចបាន នូវ វិស័យដីធ្លី ២). វិស័យព្រៃឈើ ៣). វិស័យបរិស្ថាន ៤). ជលផល ៥). ការអនុវត្តគោលនយោបាយភូមិ ឃុំ មានសុវត្ថិភាព និង ៦). វិស័យអគ្គិសនី ក្នុងនោះខេត្តបានរៀបចំកែលម្អសោភណ្ឌភាពក្រុងស្ទឹងសែន ពង្រឹងយន្តការច្រកចេញចូលតែមួយ ដើម្បីរួមចំណែកក្នុងការលើកកម្ពស់ការផ្តល់សេវាសាធារណៈជូនប្រជាពលរដ្ឋ ពង្រឹងការអនុវត្តអភិបាលកិច្ចល្អ និងការធ្វើអោយប្រសើរទ្បើងនូវប្រសិទ្ធភាពការងារ សំដៅកាត់បន្ថយភាពអសកម្មនានា ក្នុងការអភិវឌ្ឍសេដ្ឋកិច្ចសង្គម និងសុខុមាលភាព វិបុលភាពរបស់ ប្រជាពលរដ្ឋ ទូទាំងខេត្ត ។
សម្តេចក្រឡាហោម បានជំរុញថ្នាក់ដឹកនាំគ្រប់លំដាប់ថ្នាក់ ខិតខំបម្រើសេវាសាធារណៈឲ្យមានតម្លាភាព ប្រសិទ្ធភាព ឲ្យបានទាន់ពេលវេលាផងដែរ ។ សម្តេចក្រឡាហោម បន្ថែមទៀតថា ការធ្វើកំណែទម្រង់នានារបស់រាជរដ្ឋាភិបាលសព្វថ្ងៃនេះ យើងទទួលបានដំណើរការបានល្អ សមស្របទៅតាមស្ថានភាពរបស់ប្រទេសជាតិបច្ចុប្បន្ន និងមានការគាំទ្រពីមន្ត្រីរាជការ ធ្វើឲ្យការកែទម្រង់នេះទទួលបានលទ្ធផលល្អប្រសើរ ធ្វើឲ្យការអភិវឌ្ឍន៍សេដ្ឋកិច្ចប្រទេសជាតិ អាចរក្សាកំណើនបាន ៧%ក្នុងមួយឆ្នាំ ។ ម្យ៉ាងវិញទៀត ចំពោះបញ្ហាដែលនៅសេសសល់ពីឆ្នាំចាស់ ត្រូវយកមកធ្វើបន្តទៀតនៅឆ្នាំថ្មី ដើម្បីដោះស្រាយនៅក្នុងដែនសមត្ថកិច្ចរបស់ខ្លួន ។ ជាមួយគ្នានោះដែរ សម្តេចក្រឡាហោម បានអំពាវនាដល់មន្ត្រីរាជការទំាងអស់ ត្រូវខិតខំធ្វើអំពើល្អជាមួយប្រជាពលរដ្ឋ ថ្នាក់ដឹកនាំខេត្ត ក្រុង ស្រុក ត្រូវពង្រឹងគណៈបញ្ជាការឯកភាពឲ្យបានល្អ ពង្រឹងគោលនយោបាយភូមិ-ឃុំ មានសុវត្ថិភាព ជាពិសេសត្រូវលើកទឹកចិត្តប៉ុស្តិ៍នគរបាលរដ្ឋបាលឃុំសង្កាត់ និងប្រជាការពារ ត្រូវមានការសហការគ្នា និងចូលរួមគោរពច្បាប់ចរាចរណ៍ទំាងអស់គ្នា៕
ដោយ ប៊ុន រដ្ឋា
