ខេត្តរតនគិរី ៖ ក្មេងប្រុសម្នាក់ស្លាប់ បន្ទាប់ទទួលការព្យាបាលពីលោកគ្រូពេទ្យឯកជនមួយកន្លែង (គ្មានផ្លាកយីហោ) ស្ថិតនៅភូមិ៣ ឃុំស្រែអង្ក្រង ស្រុកកូនមុំ កាលពីវេលាម៉ោង៨នឹង៣០នាទីព្រឹក ថ្ងៃទី២៥ ខែមករា ឆ្នាំ២០១៨។
យោងតាមរបាយការរណ៍ពីនគរបាលខេត្តបានឲ្យដឹងថា ក្មេងប្រុសម្នាក់ស្លាប់ ឈ្មោះ សុខ ឡេង អាយុ១២ឆ្នាំ បានឈឺរយៈពេលបីថ្ងៃមកហើយ រហូតដល់ថ្ងៃទីបួន ឪពុក បានយកក្មេងនេះមកចាក់ថ្នាំនៅពេទ្យឯកជនមួយ(គ្មានផ្លាកយីហោ)។តាមការបំភ្លឺរបស់ឪពុកឈ្មោះ ធឹម ហេម បានឲ្យដឹងថា កូនរបស់គាត់ត្រូវបានពេទ្យ ឈ្មោះ យឹម ស៊ីវ៉ន ភេទប្រុស បានចាក់ថ្នាំមួយម្ជុល និងព្យួរសេរ៉ូម ហើយថែមទាំងឲ្យផឹកថ្នាំងងុយដេក មួយគម្របដប ក្រោយមក កូនរបស់គាត់ស្រាប់តែមានសភាពខុសប្លែកពីធម្មតា។
ឪពុកក្មេងរងគ្រោះបន្តថា គ្រូពេទ្យ យឹម ស៊ីវ៉ន បានឲ្យ រូបលោក(ជាឪពុក) យកក្មេងនោះទៅផ្ទះវិញ ពេលចេញពីផ្ទះពេទ្យ បានប្រមាណជាង៣០០ ម៉ែត្រ កូនបានស្លាប់ តែម្តង។ទាក់ទិនបញ្ហាចោទប្រកាន់ខាងលើនេះ លោក យឹម ស៊ីវ៉ន សារព័ត៌មាន ខេមរា មិនអាចសុំការបំភ្លឺបានទេនៅរសៀលថ្ងៃទី២៦ មករានេះ ។ដោយឡែកលោក ភោក សារិទ្ធ អធិការនគរបាលស្រុកកូនមុំ បានឲ្យ សារព័ត៌មាន ខេមរា ដឹងតាមទូរស័ព្ទនៅព្រឹកថ្ងៃទី២៦ មករានេះ ថា ចាំបន្តិចសិនគាត់នឹងធ្វើរបាយការណ៍ជូន។ជុំវិញបញ្ហាស្លាប់ក្មេងប្រុសខាងលើនេះ មហាជនបានលើកឡើងថា អាជ្ញាធរនឹងសមត្ថកិច្ចស្រុកកូនមុំ តើគួរមានវិធានការយ៉ាងណាចំពោះគ្រូពេទ្យដែលចាក់ថ្នាំបណ្តាលឲ្យមានមនុស្សស្លាប់បែបនេះ? ព្រោះសូម្បីទីតាំងពេទ្យនោះ ក៏គ្មានយីហោងផង ឬទុកឲ្យធ្វើសកម្មភាពស្រាច់នឹងចិត្ត ។
ចំណែក លោក អ៊ុង រតនា ប្រធានមន្ទីរសុខាភិបាលខេត្តរតនគិរី គួរចុះអធិការកិច្ចចំពោះករណីនេះ ផង អាណិតប្រជាពលរដ្ឋដែលជួបទុក្ខហើយ មកជួបគ្រូពេទ្យគ្មានជំនាញថែមទៀត៕ យក្ខឡោម
