(បន្ទាយមានជ័យ)៖ លោកឆែ សុធា ប្រធានសាខាគយ និងរដ្ឋាករខេត្តបន្ទាយមានជ័យ តំណាងឯកឧត្តម ណ្ឌិតគុណ ញឹម ប្រតិភូរាជរដ្ឋាភិបាលទទួលបន្ទុក អគ្គនាយក នៃអគ្គនាយកដ្ឋានគយ និងរដ្ឋាករកម្ពុជាសូមអោយសមត្ថកិច្ចតាមព្រំដែលរួមគ្នាទប់ស្កាត់ការនាំរថយន្តនិងម៉ូតូចូលដោយខុសច្បាប់និងរួមគ្នាបង្កើនចំណូលពន្ធកុំបង្កើនបទល្មើស។
ការថ្លែងដូចនេះកាលពីព្រឹកថ្ងៃទី២៩ ខែមករា ឆ្នាំ២០១៨នៅការិយាល័យគយច្រកតំបន់បឹងត្រកួនក្នុងពិធីប្រកាសផ្ទេរភារកិច្ច និងតែងតាំងមុខតំណែង ប្រធានការិយាល័យគយ និងរដ្ឋាករបឹងត្រកួន ស្រុកថ្មពួក ខេត្តបន្ទាយមានជ័យថ្មីលោកញឹក ប៊ុនលេខ ជំនួសលោកជា ប៊ុនថន ចូលនិវត្តន៍ ។ 
នាឱកាសនោះ លោកញឹម ប៊ុនថន ទើបឡើងកាន់តំណែងថ្មី បានឡើងប្តេជ្ញាចិត្តថា បំពេញភារកិច្ចរបស់ខ្លួនឲ្យបានខ្ជាប់ខ្ជួន, គោរពប្រតិបត្តិឲ្យបាននូវ អភិក្រម៤ប្រការ របស់ក្រសួងសេដ្ឋកិច្ច និងហិរញ្ញវត្ថុ, គោរពក្រមសីលធម៍ ជាមន្ត្រីគយ និងរដ្ឋាករ ក៏ដូចជាចូលរួមសហការឲ្យបានល្អផ្ទៃក្នុងអង្គភាព និងមន្ទីរអង្គភាព អាជ្ញាធរពាក់ព័ន្ធនានាជុំវិញស្រុកខេត្ត។
ជាពិសេស គោរពអនុវត្ត នូវភារកិច្ចសំខាន់ទាំង៣ របស់គយ រួមមាន៖ ប្រមូលចំណូលពន្ធ អាករ និងកម្រៃផ្សេងៗជូនរដ្ឋឲ្យបានគ្រប់ និងលើសផែនការ, បង្ការ និងបង្ក្រាបអំពើរត់គេចពន្ធឲ្យបានលទ្ធផលខ្ពស់ សម្រួលពាណិជ្ជកម្មអន្តរជាតិឲ្យបានសមស្រប។
លោកង៉ោ ម៉េងជ្រួនអភិបាលរងខេត្តបានថ្លែងថា ដើម្បីឆ្លើយតប ទៅនឹងភារកិច្ចនិងកិច្ចការដែលថ្នាក់លើប្រគល់ជូនសូមលោកប្រធានថ្មីខិតខំ ពង្រឹង និងការកែលម្អជាប្រចាំនូវដំណើរការគ្រប់គ្រងធនធានមនុស្ស គឺជាកត្តាសំខាង ចំបាច់បំផុត ដែលអគ្គនាយកដ្ឋានគយ និងរដ្ឋាករកម្ពុជា និងគ្រប់អង្គភាពពាក់ព័ន្ធទាំងអស់ត្រូវយកចិត្តទុកដាក់អនុវត្តឲ្យបាន និងមានប្រសិទ្ធភាពខ្ពស់ ។
លោកបន្តថា ចូលរួមសហការណ៍រវាងភាគីថៃអោយល្អប្រសើ រួមគ្នាអនុវត្តន៍តាមបន្ទាត់ព្រំដែនជាមួយគ្នា ដើម្បីតភ្ជាប់នូវខ្សែរពាណិជ្ជកម្មជាមួយគ្នា។
លោកឆែ សុធា ប្រធានសាខាគយ និងរដ្ឋាករខេត្តបន្ទាយមានជ័យបានបន្ថែមថា ដើម្បីជាកិច្ចតបស្នងចំពោះជំនឿ ទុកចិត្តដ៏ថ្លៃថ្លា របស់ថ្នាក់ដឹកនាំក្រសួងសេដ្ឋកិច្ច និងហិរញ្ញាវត្ថុ និងថ្នាក់ដឹកនាំអគ្គនាយកដ្ឋានគយ និងរដ្ឋាករកម្ពុជា ។
ត្រូវចូលរួមអនុវត្តអោយបានសកម្ម និងខ្ជាប់ខ្ជូននូវភារកិច្ចសំខាន់ៗទាំង៣ របស់គយ៖ ១-ប្រមូលចំណូលពន្ធ អាករ និងកម្រៃផ្សេងៗ ជូនរដ្ឋឲ្យបានគ្រប់ផែនការ ២-បង្ការ និងបង្ក្រាបអំពើពន្ធ ឲ្យបានទទួលលទ្ធផលខ្ពស់ ៣-សម្រួលពាណិកម្មអន្តរជាតិអោយបានសមស្រប ៕ដោយ៖ឃិន គន្ធា
